“Magpabilin Kamo nga Nagabantay”
1 Sang ginpamulong ni Jesus ang narekord sa Mateo 26:38-41, nagahinampot sia sa labing makahalanguyos nga tion sang iya tawhanon nga pagkabuhi. Ang kaluwasan sang tanan nga katawhan nabutang sa katalagman. Ang mga disipulo ni Jesus dapat ‘magpabilin nga nagabantay.’
2 Nagatindog kita karon sa atangan sang pag-abot ni Jesus subong manluluwas kag manugtuman sang paghukom. Subong·mabinantayon nga mga Cristiano nga nakahangop sang pagkahilingagawon sang mga tion, wala kita nagarelaks na lamang kag nagahulat sing kaluwasan. Nakahibalo kita nga dapat kita mangin handa sa tanan nga tion. Kinahanglan, kita magpadayon sa “pagpangabudlay sing lakas kag sa pagpanikasog” sa aton pag-alagad kay Jehova. (1 Tim. 4:10) Kamusta ang kada isa sa aton sing indibiduwal? Nagapabilin bala kita nga nagabantay?
3Pag-usisa sa Aton Kaugalingon: Si Jesus man nagpaandam: “Hatagi sing igtalupangod ang inyo, kaugalingon.” (Luc. 21:34, 35) Dapat kita mangin mabinalak-on sa aton kaugalingon, nagapat-od nga kita “walay kasawayan, kag inosente . . . sa tunga sang kaliwatan nga tiko kag balingag.” (Filip. 2:15) Nagakabuhi bala kita kada adlaw subong mga Cristiano, nga nagailog kay Jesus kag nagalakat nahisuno sa mga prinsipio nga ginbalay sa Pulong sang Dios? Kon ginausisa naton ang aton kaugalingon sa kapawa sang Kasulatan, nagabantay gid bala kita subong sang ginsugo ni Jesus?—Roma 13:11-14.
4 Ang mga gulang dapat mangin makugi sa pagtuman sang ila mga asaynment sa kongregasyon, nakahibalo nga manabat sila sa kon paano nila ginaatipan ang panong. (Heb. 13:17) Ang mga ulo sang pamilya may pinasahi nga obligasyon nga dumalahan ang ila mga panimalay sa mga dalanon ni Jehova. (Gen. 18:19; Jos. 24:15; ipaanggid ang 1 Timoteo 3:4, 5.) Subong man, daw ano gid ka kinahanglanon nga tumanon naton tanan ang Makasulatanhon nga sugo nga maghigugmaanay sa isa kag isa! Amo ini ang tanda sang matuod nga Cristianismo.—Juan 13:35.
5 Mangin Alisto sa Pagpaandam sa Iban: Kapin pa sa paghatag sing igtalupangod sa aton kaugalingon ang nadalahig sa pagpabilin nga nagabantay. May hilikuton kita nga himuon ang iban nga mga disipulo. (Mat. 28:19, 20) Ang gugma sa isigkatawo dapat magapahulag sa aton nga paandaman ang iban agod mahimo sila makalampuwas sa kalaglagan nga nagaatubang sa sining kalibutan. Amo ini ang salabton sang tanan nga mga Cristiano. Kinahanglanon ini nga bahin sang aton pagsimba. (Roma 10:9, 10; 1 Cor. 9:16) Sa masami nagasumalang kita sing dipagsapak ukon pagpamatok sa sining nagaluwas-kabuhi nga hilikuton. May obligasyon kita sa pagpadayon, bisan pa nga ang kalabanan wala nagasapak sa aton paandam. (Ezeq. 33:8, 9) Ang matuod nga gugma sa Dios kag sa isigkatawo magapahulag sa aton nga magpadayon.
6 Indi ini ang tion sa pagpatumbaya. Indi kita dapat mangin mahunahunaon sing tuman sa adlaw-adlaw nga mga kabalaka sa kabuhi ukon sa mga kalipayan sining sistema sa bagay nga mangin isa ini ka siod. (Luc. 21:34, 35) Kon kinahanglan gid man ang pagkahilingagawon, karon na ang tion. Yadto lamang ang nagamata, nagahanda, kag nagabantay ang makalampuwas. Kon ginatuman naton ang mga sugo ni Jesus kag “magmadinalag-on sa pagpalagyo sini tanan nga butang,” magapasalamat gid kita sing daku!—Luc. 21:36.