Mangin Makapalig-on
1 Sanglit nagakabuhi kita sa “makahalanguyos nga mga tion nga mabudlay atubangon,” kita tanan nagakinahanglan sing pagpalig-on. (2 Tim. 3:1) Nakahibalo gid sini nga kinahanglanon bisan sang panahon niya, si Pablo mabinalak-on sa paggamit sang pagpakig-upod sa iya mga kauturan subong kahigayunan para sa “pagbayluhanay sing pagpalig-on.” Ginlaygayan niya ang iya mga kauturan nga “padayunon ang mga butang . . . nga makapalig-on sa isa kag isa.” (Roma 1:11, 12; 14:19) Ining mga panikasog nagmadinalag-on sa “pagpalig-on sa mga kalag sang mga disipulo, nga nagalaygay sa ila sa pagpabilin sa pagtuo.” (Binu. 14:22) Kinahanglan gid naton ina nga sahi sang pagpalig-on karon.
2 Mahimo kita mangin makapalig-on sa iban paagi sa aton ginasiling. Kon ginagamit sing nagakaigo, ang aton mga pulong mahimo mangin “kaangay sang mga mansanas nga bulawan sa pinuna nga pilak.” (Hulu. 25:11) Paagi sa pagpakigbahin sa mga miting, kita “nagapalig-unay sa isa kag isa.” (Heb.10:25) Ang dila mahimo magamit sa positibo nga paagi kon nagasugiray kita sing mga eksperiensia, nagahatagay sing komendasyon, ukon nagahambalanay sing espirituwal nga mga butang. Inang makapalig-on nga paggamit sang dila ‘maayo para sa pagpalig-on, nagahatag kon ano ang maayo sa mga nagapamati.’—Efe.4:29.
3 Maghambalanay Tuhoy sa mga Butang nga Makapalig-on: Sa Filipos 4:8, si Pablo naghatag sing mabuligon nga mga panuytoy para sa aton panghambal. Nagsiling sia nga dapat naton binagbinagon ang bisan anong butang nga matuod, seryoso nga hunahunaon, matarong, putli, hiligugmaon, ginasiling nga maayo, halangdon, kag dalayawon. Pirme kita makapat-od nga ang ginasiling naton matuod kag mapuslanon sa iban kon napasad ini sa Pulong sang Dios. (Juan 17:17) Ang aton Cristianong dedikasyon, ang aton natun-an sa mga miting sa kongregasyon, ang paagi nga ginatuman naton sing bug-os ang aton ministeryo, kag ang iban pa, mga butang nga hunahunaon sing seryoso. Ang makapalig-on nga mga paghambalanay nahanungod sa mga talaksan kag mga prinsipio sang Pulong sang Dios pat-od nga makabulig sa aton nga mangin “maalam para sa kaluwasan.” (2 Tim. 3:15) Sarang naton mapabutyag ang aton apresasyon para sa putli nga paggawi nga ginahimo sadtong yara sa matinlo nga organisasyon ni Jehova. Sarang naton madayaw-ang mahigugmaon nga mga buhat sang kalulo sang aton mga kauturan. (Juan 13:34, 35) Ang mga butang nga ginasiling nga maayo nagalakip sa maayong Cristianong mga kinaiya sang pagtuo, kalipay, paghidait, kag pagbatas nga makita naton sa aton mga kauturan. Ang paghambalanay nahanungod sa sinang mga butang ‘maayo para sa kalig-unan’ sang iban.—Roma 15:2.
4 Kada adlaw, nagaatubang kita sing makapaluya nga mga kabalaka sang kalibutan. Daw ano ka makaparepresko nga ipahigad ini nga mga butang kag makig-ambit sa mahigugmaon nga pagpakig-upod sa aton mga kauturan! Ngaa indi mag-abot sing temprano sa Kingdom Hall agod imo ini mahimo? Sa liwat, pagkatapos sang miting may dugang pa kita nga kahigayunan sa pagpalig-on sa isa kag isa. Ining hamili nga tion nga ginahinguyang naton.sing tingob isa ka bahandi nga dapat pakabahandion. Kon pirme kita makapabakod kag makapalig-on, ang iban matinuuron nga makasiling tuhoy sa aton: “Ginpaumpawan nila ang akon espiritu.”—1 Cor. 16:18.