Magpalig-unanay Samtang Nagaministeryo
1 Ginapabilihan gid naton tanan kon makabaton kita sang makapalig-on nga “pulong nga napamulong sa husto nga tion.” (Hulu. 25:11, NW) Kon nagabantala kita upod sa iban, paano naton mapat-od nga ang aton paghambalanay makapalig-on?
2 Makapalig-on nga Paghambalanay: Makapalig-on gid kon ang aton ginahambalan samtang nagabantala amo ang mga topiko nga makapabakod sa aton kaangtanan sa Dios! (Sal. 37:30) Mahimo naton istoryahan ang tuhoy sa aton presentasyon ukon ang aton makapalig-on nga mga eksperiensia sa pagbantala sa latagon sining karon lang. (Binu. 15:3) May nadumduman bala kita nga isa ka makawiwili nga punto sa aton personal nga pagbasa sang Biblia, sa pinakabag-o nga isyu sang magasin, ukon sa mga miting sa kongregasyon nga puede naton masugid? Puede naton hinun-anunan ang pila ka punto sa isa ka pamulongpulong publiko nga nabatian naton sa Kingdom Hall sining karon lang.
3 Mahimo maluyahan kita sing buot kon may tagbalay nga namangkot kag wala naton ini masabat. Mapuslanon gid kon pagkatapos sini binagbinagon naton sing pila ka minutos upod sa aton kaupod kon paano sabton ang pamangkot kon mag-utwas ini liwat, ayhan paagi sa pagbinagbinag sang libro nga Reasoning. Kag kon may nanamian kita sa presentasyon sang aton nga kaupod, ang sinsero nga komendasyon makapalig-on gid sa iya.
4 Magmatumato: May yara bala sa aton grupo sang pagtinuon sa libro nga wala pa naton makaupod sa pagbantala sining karon lang? Ang paghagad sa iya nga mag-upod sa aton sa pagministeryo mahimo magresulta sa “pagbayluhanay sing pagpalig-on.” (Roma 1:12) Magapasalamat gid ang regular kag auxiliary nga mga payunir kon may mag-upod sa ila ilabi na sa kaagahon ukon sa kasisidmon nga diutay lamang ang nagabantala. Mabuligan naton sila paagi sa pag-upod sa ila sa pagministeryo. May yara bala manugbantala nga maluya na ukon masakiton kag limitado na lamang ang iya mahimo sa ministeryo? Kon updon mo sia, ayhan sa imo ginatun-an sa Biblia, mapalig-on gid kamo nga duha.—Hulu. 27:17.
5 Ang komendasyon kag pagpabutyag sing apresasyon bisan sa magagmay lamang nga mga butang makapalig-on gid. Dumduma ini kon nagabantala upod sa iban kay luyag naton nga ‘padayon nga . . . palig-unon ang isa kag isa.’—1 Tes. 5:11.