Gin-usisa ni Jehova​—Ngaa Mapuslanon?

¹ Ang tagsatagsa nagahandum sing maayong panglawas. Apang, madamo sang may maayong panglawas ang nagapatan-aw gihapon sa doktor kon kaisa. Ngaa? Luyag nila matukiban ang bisan anong nagalambo nga mga problema sa lawas agod sarang ini mabulong. Ang pag-amlig sang aton espirituwal nga kapagros labi pa ka importante. Ang kahamuot ni Jehova nasandig sa pagpabilin nga “mapagros sa pagtuo.”​—Tito 1:13.

² Karon na ang nagakaigo nga tion agod usisaon ni Jehova. Ngaa? Bangod si Jehova yara sa iya balaan nga templo, kag ginausisa niya ang tagipusuon sang tanan nga tawo. (Sal. 11:​4, 5; Hulu. 17:3) Kaangay ni David, ginapangabay naton si Jehova nga usisaon kita sing maid-id: “Usisaa ako, O Jehova, kag tilawi ako; ulaya ang akon mga bato-bato kag ang akon tagipusuon.”​—Sal. 26:2.

³ Dapat kita magbantay batok sa mga katalagman sa aton espirituwal nga kapagros nga mahimo maghalin sa sulod naton bangod sang aton dihimpit nga unod. Ang Hulubaton 4:23 nagalaygay: “Labaw sa tanan nga pagaamligan, bantayi ang imo tagipusuon, kay gikan sa sini amo ang mga tuburan sang kabuhi.”

⁴ Ang aton espirituwal nga kapagros mahimo man mabutang sa katalagman bangod sang malaut, imoral nga kalibutan nga nagapalibot sa aton. Kon tugutan naton ang aton kaugalingon nga magsuod sing labi sa sining malauton nga sistema, mahimo kita magahunahuna kaangay sini kag magapalambo sing kalibutanon nga mga panimuot. Ukon mahimo naton sundon ang kalibutanon nga mga estilo sang pagkabuhi kag madaug sang espiritu sang kalibutan.​—Efe. 2:​2, 3.

⁵ Mahimo gamiton ni Satanas ang paghingabot sa panikasog nga hapayon kita sa espirituwal. Sing mas masunson, malimbungon niya nga ginagamit ang kalibutanon nga mga ganyat sa pagsulay sa aton. Si Pedro nagalaygay sa aton nga ‘huptan ang aton mga igbalatyag kag mangin mabinantayon,’ kay si Satanas “subong sang nagangurob nga leon nga nagaluyong, nga nagapangita sang iya tulukbon.” Ginalaygayan kita nga ‘magtindog sing malig-on batok sa iya, nagapabilin nga mabakod sa pagtuo.’​—1 Ped. 5:​8, 9.

⁶ Ang aton espirituwal nga kapagros kinahanglan amligan paagi sa paghupot sang aton pagtuo nga malig-on kag paagi sa pagpabakod sa sini kada adlaw. Si apostol Pablo nagapanugda nga tilawan naton pirme ang aton pagtuo. Kon paano nga ginasunod naton sing maalamon ang praktikal nga laygay nga ginahatag sa aton sang isa ka sangkol nga doktor, nagapamati man kita kay Jehova kon ang Iya espirituwal nga pag-usisa nagapakita sing isa ka problema nga nagakinahanglan tadlungon. Nagapaposible ini para sa aton nga “mapasag-uli.”​—2 Cor. 13:​5, 11.

⁷ Si Jehova amo gid ang dakung Manug-usisa. Ang iya panayasat pirme husto. Paagi sa iya Pulong kag sa ‘matutom nga ulipon,’ nagareseta sia sing isa ka mapagros nga espirituwal nga dieta. (Mat. 24:45; 1 Tim. 4:6) Ang regular nga pagkaon sa sining dieta sa puluy-an kag sa mga miting sa kongregasyon nagabulig sa aton nga magpabilin nga mapagros sa espirituwal. Ang regular nga pag-ehersisyo sa espirituwal sa ministeryo mapuslanon man. Busa, ginaabiabi naton ang regular nga pag-usisa ni Jehova, nagasalig nga huptan niya kita nga yara sa labing maayo nga espirituwal nga kapagros.