Ang mga Magasin Nagabantala Sang Ginharian
1 Subong mga Saksi ni Jehova, kilala kita tungod sang aton makugi nga pagbantala tuhoy sa Ginharian sang Dios. Ang mga magasin nga Ang Lalantawan kag Magmata! nga ginapanagtag naton may daku nga papel sa pagbulig sa minilyon ka tawo nga mahibaluan ang tuhoy sa mga katuyuan sang Dios. Ang mensahe nga ginaunod sini maayong balita gid, kay ginabantala sini ang langitnon nga Ginharian sang Dios subong ang lamang nga paglaum para sa katawhan. Gani ang Abril kag Mayo nagahatag sing maayo nga higayon sa pagtanyag sing suskripsion sa sining duha ka magasin.
2 Ang mga magasin nagahinun-anon sang matuod nga mga kinahanglanon sang mga tawo—emosyonal, sosyal, kag espirituwal. Bangod sang pagkalusod sang moralidad kag mga talaksan sang pamilya, Ang Lalantawan kag Magmata! nagabulig sa mga tawo nga mapauswag ang kalidad sang ila kabuhi paagi sa pagpakita sa ila kon paano iaplikar ang mga prinsipio sang Biblia. Nalipay kita sa pagtanyag sing mga magasin sa Abril kag Mayo.
3 Makagalanyat Gid Ini: Ang Lalantawan kag Magmata! matigayon sa mga pinamulong sang halos tanan nga populasyon sang kalibutan. Bangod sini, ang aton mga magasin kilala. Yari ang pila ka rason kon ngaa naganyat ang mga tawo sa sini:
◼ Subong mga balasahon nga may integridad kag kamatuoran, maathag sini nga ginapakita ang kinatuhayan sang maayo kag malain.
◼ Nagahatag ini sing paglaum tuhoy sa isa ka matarong nga paraiso nga magaabot, pasad sa saad sang Dios nga ang duta pagagamhan sang iya Ginharian.
◼ Madamong suno-sa-tion nga mga topiko ang ginapresentar, nga nagaganyat sa mga tawo sang tanan nga ginhalinan kag kultura.
◼ Ang mga artikulo malip-ot, edukasyunal, matuod, kag wala sing ginadampigan kag wala nagakompromiso.
◼ Ang makagalanyat nga mga ilustrasyon nagapukaw sing interes, kag ang simple nga estilo sang pagsulat nagapahapos sang pagbasa sa magasin.
4 Ipanagtag Ini Sing Lapnag: Ang epektibo nga pagpanagtag sa mga magasin nagasandig sing daku sa aton kakugi sa paghanda sang aton mga presentasyon, pag-iskedyul sang aton tion, kag pag-organisar sang aton hilikuton sa pagbantala. Ang praktikal nga mga panugda ginhatag sa Enero 1996 kag Oktubre 1996 nga mga guwa sang Ang Aton Ministeryo sa Ginharian, nga maayo repasuhon kag iaplikar.
5 Mangin Pamilyar sa mga Magasin: Samtang ginabasa mo ang tagsa ka guwa, hunahunaa ang isa ka tawo nga mahimo malipay sa pagtigayon sing isa ka kopya. Mangita sing espesipiko nga mga punto ukon mga kasulatan nga mabalikwat mo sa imo presentasyon. Maghunahuna sing pamangkot nga magamit mo sa pag-umpisa sing paghambalanay kag sa pagpukaw sing interes sa topiko.
6 Ibagay ang Presentasyon sa Tawo: Maghanda sing simple, mapasigosigo nga presentasyon nga mahimo mabagay sa lalaki, babayi, tigulang, ukon pamatan-on, kakilala man ukon estranghero.
7 Mangin Mahunahunaon sa Lalantawan kag Magmata!: Sanglit ang mga magasin mahapos isulod sa gamay nga bag ukon bulsa, mahimo kita makadala sing mga kopya kon nagalakbay ukon nagapamalaklon. Itanyag ini kon nagapakigsugilanon sa mga himata, kaingod, kaupod sa trabaho, kabutho, ukon manunudlo. Magtalana sing isa ka adlaw kada semana, para lamang sa pagpanaksi paagi sa magasin.
8 Magpakita Sing Apresasyon sa mga Magasin: Wala gid nagakadula ang balor sini. Ang importante nga mensahe sini wala nagadaan sa paglipas sang tion. Sa pagkamatuod, kon panikasugan gid naton nga ipahamtang ang tanan nga magasin nga makuha naton, ang daan nga mga guwa indi magatumpok sa aton mga talaguan.
9 Ang Pagpanaksi sa Dalan Epektibo: Amo ini ang isa sang labing maayo nga mga paagi sa pagtanyag sing mga magasin sa madamo nga tawo. Ang iban nga mga manugbantala nagapangabudlay sa masako nga mga duog sing tayuyon sa mga adlaw sang pagpamalaklon.
10 Ang Teritoryo Sang mga Negosyo Mapatubason: Sa pagpangabudlay sa mga balaligyaan, diutay lamang ang wala sing tawo. Ang kalabanan nga mga negosyante matinahuron, kag ang madamo malipayon nga nagabaton sa mga magasin. Gamita ang mga artikulo nga nagakabagay sa ginaduaw nga palatikangan.
11 Ang mga Ruta sa Magasin May Potensial: Sanglit ang mga magasin ginabalhag sing makaduha sa isa ka bulan, nagakaigo lamang nga duawon liwat ang mga tawo nga nagabasa sini kag tanyagan sing masunod nga mga guwa. Dapat kita maghimo sing tayuyon nga mga pagduaw liwat, indi lamang agod makapahamtang sing mga magasin kundi agod mapalambo man ang interes sang mga tawo sa Biblia. Ang mga ruta sa magasin isa ka labing maayo nga kuluhaan sing potensial nga mga estudyante sa Biblia.
12 Himusli ang Abril kag Mayo: Natigayon sang Lalantawan kag Magmata! ang pagsalig sang minilyon ka mainapresyahon nga mga bumalasa. Sanglit epektibo ini kaayo sa pagbantala sang Ginharian, dapat naton pat-uron nga nagadala kita sini kag ginatanyag ini sa tanan nga higayon. Kabay nga ang mga bulan sang Abril kag Mayo mangin tumalagsahon para sa pagpanagtag sing mga magasin!