Dayawa Pirme si Jehova
1 May pila ka hilikuton nga tuman gid ka importante sa aton nga pirme ini nagakabagay sang aton igtalupangod. Ini amo ang pagkaon, pagginhawa, kag pagtulog. Ginbutang ni apostol Pablo ang pagbantala sang maayong balita sa sini man nga kategoriya sang naglaygay sia: “Pirme kita magdulot sa Dios sing halad sang pagdayaw.” (Heb.13:15) Gani ang pagdayaw kay Jehova isa ka butang nga dapat naton tinguhaan nga himuon kada adlaw.
2 Si Jesus nagsiling: “Dapat ko iwali ang maayong balita sang ginharian sang Dios.” (Luc. 4:43) Sadtong tatlo ka tuig kag tunga nga pag-alagad niya, ang tanan nga butang nga ginhimo niya kada adlaw naangot sing direkta sa pila ka paagi sa paghimaya sa Dios. Amo man sini ang balatyagon ni Pablo. Talupangda ang 1 Corinto 9:16: “Kailo ako kon indi ko pag-iwali ang maayong balita!” Ang iban nga matutom nga mga Cristiano ginpalig-on nga mangin pirme handa sa pagpangapin sang ila paglaum sa iban. (1 Ped. 3:15) Karon ang makugi nga mga payunir kag mga manugbantala sang kongregasyon nagapanikasog sa pag-ilog sinang maayong mga halimbawa.
3 Kon ginabinagbinag naton ang kakugi ni Jesus, ginapahulag kita nga sundon sing suod ang iya mga tikang. (1 Ped. 2:21) Paano naton mahimuslan sa adlaw-adlaw ang mga kahigayunan nga dayawon si Jehova kon nagatrabaho kita sing bug-os tion? Ano naman ang mga obligasyon sa pamilya nga nagakinahanglan sang madamo naton nga tion? Ang kalabanan nga mga pamatan-on masako sa kinahanglanon nga pag-eskwela. Ang iban mahimo magbatyag nga indi nila mahimo madayaw si Jehova sing aktibo kada adlaw. Mahimo ginapaligad sang iban ang bug-os nga bulan nga wala nagabantala sang maayong balita sa pila ka paagi.
4 Si Jeremias isa nga indi mahimo maghipos. Sang indi sia makapamulong sa ngalan ni Jehova sa malip-ot nga tion, nabatyagan niya ang indi maagwanta nga pagdabdab sang kalayo sa sulod niya. (Jer. 20:9) Bisan pa may mga problema sia, si Jeremias pirme nakakita sing mga paagi nga ipamulong ang mensahe ni Jehova sa iban. Mailog bala naton ang iya halimbawa kag makahimo sing mga kahigayunan agod madayaw ang aton Manunuga sa kada adlaw?
5 Ang aton pagpakighambal tuhoy kay Jehova indi dapat paglatiran sang pormal, nahimos na nga daan nga mga tion sa pagpanaksi upod sa iban nga mga manugbantala sa teritoryo sang kongregasyon. Ang ginakinahanglan lamang naton amo ang isa ka nagapamati nga dulunggan. May mga tawo kita nga masugilanon kada adlaw nagakari sila sa aton balay, nagatrabaho kita upod sa ila, ukon nagasakay kita upod sa ila sa bus. Ang ginakinahanglan lamang amo ang isa ka mainabyanon nga panamyaw kag ang isa ka nagapahunahuna nga pamangkot ukon komento nga magaumpisa sang paghambalanay. Nasapwan ini sang madamo subong ang ila labing mapatubason nga porma sang pagpanaksi. Kon may tuman kadamo kita nga kahigayunan sa pagpakigsugilanon sa iban nahanungod sa maayong balita, indi gid mahunahuna nga mapaligad naton ang isa ka bulan nga wala nagapanaksi sa Ginharian.
6 Ining pribilehiyo sa pagdayaw kay Jehova indi gid magauntat subong sang ginpakita sang salmista sa Salmo 150:6. Kon ang aton tagipusuon nagapahulag sa aton nga himuon ini pirme, pagahimuslan naton ang mga kahigayunan sa adlaw-adlaw nga makapakighambal tuhoy kay Jehova kag sa iya Pulong.