Tayuyon nga Pagtambong sa mga Miting—Kinahanglanon sa Pagtindog Naton sing Malig-on
1 Sa mga miting sa kongregasyon ginabinagbinag naton ang maayong mga panghunahuna kag ginasangkapan kita sing espirituwal nga hinganib agod “makatindog kita sing malig-on batok sa mga padugi sang Yawa.”—Efe. 6:11; Filip.4:8.
2 Ginaaman sang mga Miting Kon Ano ang Aton Kinahanglanon: Sa mga miting ang mga pangamuyo ginadulot sa pagdayaw sa Dios kag sa pagpangabay sa iya sang mga kinahanglanon sang kongregasyon. (Filip. 4:6, 7) Ang pagbuylog sa mga ambahanon sang Ginharian nagapahalipay sa aton kag nagapaposible nga mapabutyag naton ang aton mga balatyagon samtang ginasimba naton si Jehova. (Efe. 5:19, 20) Ang aton pag-inupdanay sa Kingdom Hall antes kag pagkatapos sang mga miting nagapalig-on sa aton, nagapabakod sa aton, kag nagapapagsik sa aton.—1 Tes. 5:11.
3 Sang nagligad nga Abril ang pinasahi nga pamulongpulong nga “Ang Katapusan sang Butig nga Relihion Malapit Na” makusog nga nagpadaku sang pagkahilingagawon sang paghimo sing madagmit nga buhat sa pagguwa sa Babilonia nga Daku. (Bug. 18:4) Sadtong Hunyo kag Hulyo, daw ano ka makapapagsik nga gintuptupan sang tatlo ka gintun-an nga mga artikulo sa Lalantawan ang mga silak sang kapawa nga nag-iwag sang banas sang mga matarong! (Hulu. 4:18) Hunahunaa lamang kon ano kuntani ang nawasi naton kon wala kita makatambong sa sadtong mga miting!
4 Subong sang ginapakita sang Organisado sa Pagtuman sang Aton Ministeryo sa pahina 72, ang Teokratikong Eskwelahan sa Pagministro isa ka tayuyon nga aman para sa edukasyon sang bilog nga kongregasyon. Sining karon ginabuligan kita nga mahibaluan sing maayo pa ang maragtas sang organisasyon paagi sa paggamit sang Proclaimers nga libro. Indi naton dapat pagwasihon ini nga panudlo.
5 Ang aton Miting sa Serbisyo nagasangkap sa aton nga mangin mas epektibo sa ministeryo. Ginpakita ini sa miting diin nakabaton kita sing mga instruksion sa pagpanagtag sang Kingdom News Num. 34. Ang mga pagpakamaayo ni Jehova sa sining hilikuton bugana, subong sang makita sa tumalagsahon nga mga resulta sa bug-os nga kalibutan. (Ipaanggid ang 2 Corinto 9: 6, 7.) Yadtong tayuyon nga nagatambong sa mga miting nakabulig sa pagpalambo sang suporta nga ginhatag sa kampanya.
6 Sa Pagtinuon sa Libro sang Kongregasyon, ang aton balatyagon sang pagkahilingagawon ginapadaku sang mga butang nga ginatun-an naton gikan sa Revelation nga libro. Bangod sang madasig nga paglakat sang mga hitabo sa kalibutan, dapat naton mahangpan ang katumanan sang mas madalom nga mga tagna sang Bugna.
7 Pasulabi ang Tayuyon nga Pagtambong sa mga Miting: Sa madamong kadutaan ginakilala sang aton mga kauturan kon daw ano ka importante ang mga miting kada semana. Halimbawa, sa Burundi, Rwanda, Liberia, kag Bosnia kag Herzegovina, ang nagatambong nga mga bag-unan sa mga miting doble ukon tatlo ka pilo sangsa kabug-usan nga kadamuon sang mga manugbantala. Sa sining paagi si Jehova nagabulig sa mga kauturan sa pagpabilin nga malig-on sa isa ka espiritu.—Fil. 1:27; Heb. 10:23-25.
8 Ang bisan sin-o nga ayhan nagapatumbaya sa pagtambong sing tayuyon sa mga miting dapat karon maghimo sing mga tikang agod matadlong ini nga huyog. (Hulu.18:1; Manugw. 4:9-12) Agod makatindog sing malig-on, kinahanglan naton ang alalangay nga pagpalig-unay upod sa mga hamtong, subong sang ginaaman sang tayuyon nga pagtambong sa mga miting.—Roma 1:11, 12.