Maghanda kag Magkalipay sa mga Miting sa Kongregasyon
1 Subong isa ka katilingban sang mga kauturan, maalamon kita nga nagatipon sing tayuyon para sa aton semanal nga mga miting. (1 Tim. 4:15, 16) Paano kita magakalipay kag makapanginpulos sing labi gid gikan sa sini?
2 Dapat pirme mag-iskedyul sing tion sa paghanda para sa mga miting. Bisan kon daw ano man kita kasako maalamon nga makakita sing tion sa paghanda para sa mga miting. Ang paghanda sing ulupod subong isa ka pamilya labi gid ka mapuslanon.—Efe. 5:15, 16.
3 Para sa Teokratikong Eskwelahan sa Pag ministro: Panikasugi nga sundan ang semanal nga iskedyul sa pagbasa sa Biblia. (Jos. 1:8) Repasuha ang materyal nga pagatuptupan, kag dalha ang kinahanglanon nga mga publikasyon agod masundan mo ang mga humalambal.
4 Para sa Miting sa Serbisyo: Tan-awa ang programa nga ginbalay sa Ang Aton Ministeryo sa Ginharian. Basaha ang mga artikulo nga pagahinun-anunan. Kon ang materyal gikan sa isa ka artikulo sa Lalantawan pagabinagbinagon, pangitaa ina kag basaha man ini. Kon ang mga presentasyon sa pag-alagad sa latagon igapasundayag, repasuha ini sing abanse agod mangin handa ka nga gamiton ini sa imo ministeryo
5 Para sa Pagtinuon sa Lalantawan: Basaha sing abanse ang tulun-an, nagatanda sang mga sabat sa mga pamangkot. Tan-awa ang ginhinambitan nga mga kasulatan. Pamalandungi kon paano nagahisanto ang leksion sa nahibaluan mo na. Maghanda sing malip-ot nga mga komento sa dimagkubos isa ukon duha ka parapo. Isa ini ka importante nga paagi sa ‘pagpahayag sing dayag sang aton paglaum.’—Heb. 10:23.
6 Para sa Pagtinuon sa Libro sang Kongregasyon: Una, tan-awa ang materyal; binagbinaga ang titulo sang kapitulo kag mga subtitulo. Tandai ang pangunang mga ideya. Repasuha ang nagasakdag nga mga bersikulo sa Biblia. Tilawi nga sabton ang mga pamangkot sa imo kaugalingon nga mga tinaga. Nian repasuha ang tulun-an sa imo hunahuna.—2 Tim. 2:15.
7 Magkalipay sa mga Miting: Agod magkalipay sing bug-os sa mga miting, importante nga mag-abot sing husto sa oras agod makapakigbahin sa nagabukas nga ambahanon kag pangamuyo, nga nagapangabay sang espiritu ni Jehova. Kon wala kamo sing magagmay nga kabataan nga alatipanon, ayhan labing maayo nga maglingkod kamo malapit sa atubangan sang tilipunan diin mas diutay ang sablag. Mabuhinan sang mga ginikanan nga may magagmay nga kabataan nga ayhan dapat dalhon sa guwa sa tion sang mga miting ang tublag sa kalalangan sang paglingkod malapit sa alagyan kag sa likod.
8 Magpahuway sing makadali antes ka magtambong agod magpabilin ka nga nagabugtaw kag alisto. Ang pagpangita sa mga kasulatan nga ginabasa magabulig sa imo sa pagdumdom sang imo nabatian. Ipakighambal sa imo pamilya kag sa mga abyan ang tuhoy sa imo natun-an. Ang pagpadapat sa sining mga panugda magahimo sa mga miting nga mas makalilipay, kag tunay gid ini nga “magapukaw [sa aton] sa gugma kag maayong mga buhat.”—Heb. 10:24, 25.