Pagtuman sang Aton Panaad sa Adlaw-adlaw

¹ Si salmista David napahulag sa pagpahayag kay Jehova: “Magaamba ako sing pagdayaw sa imo ngalan sing dayon, agod nga mahimo ko adlaw-adlaw ang akon mga saad.” (Sal. 61:8) Nakahibalo si David nga ang pagpanaad isa gid ka boluntaryo nga butang. Apang, nahangpan man niya nga kon nanaad sia, obligado sia nga tumanon ini.

² Sang naghimo kita sang aton dedikasyon kay Jehova, nanaad kita sing kinabubut-on nga himuon ang iya kabubut-on. Ginsikway naton ang aton kaugalingon kag ginhimo ang pag-alagad kay Jehova subong ang aton pangunang dalanon sa kabuhi. (Luc. 9:23) Hanti, dapat man naton himuon ang aton panaad adlaw-adlaw. (Manugw. 5:​4-6) Ang aton dayag nga pagpahayag sadtong ginbawtismuhan kita sa tubig dapat makita sa aton bug-os nga pagkabuhi, kay nakahibalo kita nga “paagi sa baba ang isa nagahimo sing dayag nga pagpahayag nga sa kaluwasan.” (Roma 10:10) Nagalakip ini sang pagbantala sang maayong balita. (Heb. 13:15) Ang personal nga mga sirkunstansia nagakalainlain gid, apang sa adlaw-adlaw mahimo naton tanan nga tulumuron nga ipaambit ang maayong balita sa iban.

³ Maghimo sing mga Kahigayunan sa Pagpanaksi Adlaw-adlaw: Agod mapaambit ang maayong balita adlaw-adlaw dapat kita maghimo sing mga kahigayunan sa bisan diin nga ginatugot sang aton mga sirkunstansia. Madamong makalilipay nga mga eksperiensia ang naagom sang mga nanaksi sing di-pormal sa ulubrahan ukon sa eskwelahan kag sa mga kaingod ukon sa iban pa nga nasumalang nila kada adlaw. Bisan ang pagsulat ukon pagtelepono mahimo mangin paagi sa pagpanaksi sa iban. Ining tanan nga paagi subong man ang tayuyon nga pagpain sing tion para sa pagpanaksi sa mga pamalay kag sa paghimo sing mga pagduaw liwat makadul-ong sa kalipay nga bunga sang pagdumala sing isa ka pagtuon sa Biblia sa puluy-an. Huo, makahimo kita sing mga kahigayunan sa pagpanaksi kada adlaw.

⁴ Ginbasa sang isa ka utod nga babayi ang Pag-usisa sa Kasulatan sa Adlaw-adlaw sa tion sang iya pahuway sa trabaho. Gin-agda niya ang iya kaupod sa trabaho sa pagbasa sang teksto sa sina nga adlaw upod sa iya, kag nagdul-ong ina sang ulihi sa isa ka pagtuon sa Biblia upod sa iya kaupod sa trabaho. Tunga sa oras sila nga nagatuon kada adlaw, sing lima ka adlaw sa isa ka semana. Nakita sang ila isa pa ka kaupod sa trabaho ang ila adlaw-adlaw nga pagtuon. Nagpakilala sia sang ulihi nga isa gali sia ka di-aktibo nga utod nga lalaki. Napahulag sang kakugi sang utod nga babayi, ginpakig-angutan niya ang isa ka gulang agod mangin aktibo sia liwat. Naimpluwensiahan sing positibo sining utod nga babayi ang duha pa ka tawo bangod sang pagpanikasog nga himuon ang iya panaad sa adlaw-adlaw.

⁵ Kon ginapahulag kita sang isa ka mapinasalamaton nga tagipusuon, ang paghimo sang aton panaad sa dedikasyon kada adlaw magahatag sa aton sing kalipay kag kaayawan. Kaangay sang salmista, makasiling kita: “Dayawon ko ikaw, O Jehova nga Dios nakon, sa bug-os ko nga tagipusuon, kag himayaon ko ang imo ngalan tubtob sa tion nga walay latid.”​—Sal. 86:12.