Mangin Huwaran sa Paghambal kag sa Paggawi
1 Ginlaygayan ni apostol Pablo si Timoteo nga mangin huwaran sa paghambal kag sa paggawi. (1 Tim. 4:12) Dapat man kita magpakita sing huwaran nga paghambal kag paggawi, labi na kon nagapangabudlay sa ministeryo, kay sa paghimo sini mahibaluan kon bala nalab-ot naton ukon wala ang tagipusuon sang mga nasugilanon naton.
2 Dapat naton ipakita ang tanan nga bahin sang maayong pamatasan, lakip na ang katahuran, patugsiling, kalulo, kag taktika. Ang maayong pamatasan sa ministeryo mahimo mapaanggid sa mga panimpla sa aton pagkaon. Kon wala ini, ang makapapagros nga pagkaon mahimo nga wala sing sabor kag dimakagalana. Amo man sini ang epekto sang indi pagpakita sing maayong pamatasan.—Col. 4:6.
3 Mangin Huwaran sa Paghambal: Ang mainabyanon nga yuhum kag mainit nga panamyaw kinahanglanon kon nagatanyag sing maayong balita. Kon timplahan naton ang aton introduksion sing pagkamainabyanon kag pagkahanuot, ginapaalinton naton sa tagbalay nga interesado gid kita sa iya. Kon nagahambal sia, mamati sing maayo kag tahura ang iya opinyon. Kon nagahambal ka, himua ini nga may taktika kag kalulo.—Ipaanggid ang Binuhatan 6:8.
4 Kon kaisa masugilanon naton ang isa ka indibiduwal nga indi mainabyanon kag maawayon pa gani. Ano ang dapat nga mangin reaksion naton? Si Pedro naglaygay sa aton nga maghambal nga may “malulo nga balatyagon kag tudok nga pagtahod.” (1 Ped. 3:15; Roma 12:17, 18) Si Jesus nagsiling nga kon sikwayon sang tagbalay ang mensahe sang Ginharian, dapat lamang naton ‘itaktak ang yab-ok sa aton mga tiil.’ (Mat. 10:14) Ang aton huwaran nga mga pamatasan sa idalom sini nga mga kahimtangan mahimo nga magapahumok sa ulihi sang tagipusuon sang nagapamatok.
5 Mangin Huwaran sa Pagginawi: Ang pagbantala sang maayong balita sa masako nga mga dalan kag publiko nga mga duog nagakinahanglan nga dapat kita mangin mapatugsilingon, indi gid magahod ukon mapilit, kag nga wala naton ginabalabagan ang mga nagalabay. Kon yara kita sa puluy-an sang mga interesado, dapat kita maggawi subong malulo nga mga bisita. Ang aton kaupod nga kabataan dapat magpakita sing pagtahod sa tagbalay kag sa iya pagkabutang kag dapat mamati kon kita nagahambal. Kon ang kabataan masamok, magabilin ini sing dimaayo nga impresyon.—Hulu. 29:15.
6 Ang aton personal nga panagway dapat magpakita sa iban nga mga ministro kita sang Pulong sang Dios. Sa aton panapot kag pamustura, indi kita dapat mangin baraghal kag mahigko ukon madayaw kag indi maugdang. Ang aton panagway dapat pirme “takus sa maayong balita.” (Ipaanggid ang Filipos 1:27.) Sa paghimo sini, wala kita nagahatag sa iban sing kabangdanan sa kasandad ukon kasawayan sa aton ministeryo. (2 Cor. 6:3, 4) Ang aton huwaran nga paghambal kag pagginawi nagadugang sing makagalanyat nga kalidad sa mensahe sang Ginharian, nga nagadala sing kadungganan kay Jehova.—1 Ped. 2:12.