Maayo nga mga Pamatasan—Kinaiya Sang Diosnon nga mga Tawo
1 Ang maayo nga mga pamatasan talagsa na lang karon. Ngaa amo sini? Ang mga tawo pirme nagadali amo nga mahimo talagsa na lang nila madumduman ang sadsaran nga matinahuron nga mga paggawi, subong sang pagsiling sing “Palihug,” “Salamat,” ukon “Excuse me.” Sa kabilugan, ang pagkawalay patugsiling kag pagkawalay pasunaid daw nagapangibabaw sa tawhanon nga katilingban. Gintagna sang Pulong sang Dios ang paglain sang mga pamatasan sa katapusan nga mga adlaw sang nagsiling ini nga ang mga tawo mangin ‘mahigugmaon sang kaugalingon, bugalon, wala sing kinaugali nga gugma, palabilabihon, wala sing pagpugong sa kaugalingon, wala sing gugma sa kaayuhan, kag matig-a sing ulo.’ (2 Tim. 3:1-4) Ining tanan nga kinaiya nagapatubas sing malain nga mga pamatasan. Subong diosnon nga mga tawo, ang mga Cristiano dapat mag-andam nga wala nila ginailog ang kakulang sing pagtahod sa iban sining kalibutan.
2 Ano ang mga Pamatasan? Ang maayo nga mga pamatasan malaragway subong ang sensitibo nga paghangop sa mga balatyagon sang iban, ang ikasarang sa pagkabuhi sing mahidaiton upod sa iban. Ang mga aspeto sang maayo nga mga pamatasan amo ang pagkamapasunairon, pagkamatinahuron, pagkaayo, pagkamataktikanhon, pagkamapatugsilingon. Ini nga mga kinaiya naghalin sa gugma sang isa sa Dios kag sa isigkatawo. (Luc. 10:27) Wala ini sing bili, apang bilidhon gid ini sa pagpauswag sang aton kaangtanan sa iban.
3 Si Jesucristo nagpahamtang sing himpit nga halimbawa. Ginsunod niya ang mga talaksan sang Dios. Bisan makaisa wala sia magsayop sa iya mga pamatasan. Pirme niya ginsunod ang Bulawanon nga Kasuguan: “Kon ano ang luyag ninyo nga himuon sang mga tawo sa inyo, himua man ninyo ini sa ila.” (Luc. 6:31) Wala bala kita nagadayaw sa mapatugsilingon kag mahigugmaon nga paagi ni Jesus sa pagpakig-angot sa iya mga disipulo? (Mat. 11:28-30) Ang iya maayo nga mga pamatasan wala maggikan sa mga pagsulundan nga ginpanugda sa mga libro tuhoy sa maayo nga pamatasan. Naggikan ini sa sinsero kag maalwan nga tagipusuon. Ginpalambo ni Jesus ang maayo nga mga pamatasan kutob sang iya pagkapamatan-on kag paagi sa pag-aplikar sa diosnon nga mga prinsipio. Dapat naton tinguhaan nga ilugon ang iya maayo nga halimbawa.
4 San-o kinahanglan sang mga Cristiano ang maayo nga mga pamatasan? Sa pinasahi lamang bala nga mga okasyon, kon san-o nabalaka kita sa paghatag sing maayo nga impresyon? Kinahanglan lamang bala ini kon nagatinguha nga impluwensiahan ang iban? Indi! Dapat naton ipakita ang maayo nga mga pamatasan sa tanan nga tion. Sa anong mga paagi ilabi na nga dapat kita mabalaka sa sini sa aton pagpakig-upod sa isa kag isa sa kongregasyon?
5 Sa Kingdom Hall: Ang Kingdom Hall amo ang aton duog sa pagsimba. Yari kita diri sa imbitasyon ni Jehova nga Dios. Sa sini nga kahulugan, mga dinapit kita. (Sal. 15:1) Mga huwaran nga dinapit bala kita kon magkadto kita sa Kingdom Hall? Ginahatagan bala naton sing nagakaigo nga igtalupangod ang aton pamayo kag pamustura? Pat-od gid nga luyag naton likawan ang di-pormal ukon sobra nga pamuni. Nagatambong man sa mga kombension ukon sa aton semanal nga mga miting sa kongregasyon, ang katawhan ni Jehova kilala tungod sa ila maayo nga hitsura nga nagakaigo sa mga nagaangkon nga nagatahod sa Dios. (1 Tim. 2:9, 10) Sa amo ginapakita naton ang nagakaigo nga patugsiling kag pagtahod sa aton langitnon nga Tagbalay kag sa iban pa nga mga dinapit nga gin-agda.
6 Ang isa pa ka paagi nga mapakita naton ang maayo nga mga pamatasan may kaangtanan sa mga miting amo ang pag-abot sing husto sa tion. Matuod, indi ini pirme mahapos. Ang iban mahimo nga malayo ang puluy-an ukon mahimo may daku nga pamilya nga himuson. Ang ila panikasog sa pagtambong sa Cristianong mga miting sing tayuyon dalayawon gid. Apang, napanilagan nga sa pila ka kongregasyon, mga 25 porsiento sang mga manugbantala ang kinabatasan na nga nagaabot pagkatapos sang nagabukas nga ambahanon kag pangamuyo. Serioso ini nga butang. Dapat naton dumdumon nga ang mga pamatasan may yara kaangtanan sa aton pagkamahunahunaon sa balatyagon sang iban. Si Jehova, ang aton mainayuhon nga Tagbalay, naghimos sining espirituwal nga kapiestahan para sa aton kaayuhan. Ginapakita naton ang aton apresasyon kag kabalaka sa iya mga balatyagon paagi sa pag-abot sing temprano. Dugang pa, ang pag-abot sing ulihi sa mga miting nagatublag kag nagapakita sing di-pagtahod sa mga nauna na nga nag-abot.
7 Kon magtipon kita, natalupangdan bala naton ang mga bag-uhan nga nagtambong? Ang pag-abiabi sa ila bahin sang maayo nga mga pamatasan. (Mat. 5:47; Roma 15:7) Ang mainayuhon nga panamyaw, mainit nga pangamusta, mainabyanon nga yuhum—ang tanan diutay lamang nga butang, apang nagadugang ini sa pagpakilala sa aton subong matuod nga mga Cristiano. (Juan 13:35) Sa tapos makakadto sa Kingdom Hall sa nahauna nga tion, isa ka lalaki ang nagsiling: “Mas madamo ako sing nakilala nga mahigugmaon nga mga tawo, nga indi ko gid kilala, sa isa ka adlaw sangsa nasugilanon ko sa relihion nga gindak-an ko. Maathag gid nga nasalapuan ko ang kamatuoran.” Subong resulta, ginbag-o niya ang iya kabuhi, kag pagkatapos sang pito ka bulan nabawtismuhan sia. Huo, ang maayo nga mga pamatasan may daku nga mga epekto!
8 Indi pagkalimti ang mga tigulang kag mga masakiton sa tunga naton. Kon mabuot kita sa mga estranghero nga makilala naton, indi bala dapat nga “labi na gid sa mga may labot sa aton sa pagtuo”? (Gal. 6:10) Ang prinsipio naaplikar: “Magpakita ka sing patugsiling sa pagkatawo sang tigulang nga tawo.” (Lev. 19:32) Indi gid naton dapat nga pasapayanan sila sa aton mga pagtilipon.
9 Pagtalupangod Sing Maayo: Ang maayo nga mga pamatasan nagakinahanglan nga mamati kita sing maayo kon ginahatag ang espirituwal nga instruksion. Sa tion sang mga miting sang kongregasyon, ang Cristianong mga ministro sang Dios nagahambal agod ipaambit ang pila ka espirituwal nga dulot sa pagpabakod sa aton. (Roma 1:11) Pagpakita gid sang indi maayo nga mga pamatasan sa bahin naton kon madukaan kita, magahod nga nagausang sing chewing gum, pirme maghutik sa aton tupad, magkadto sing di-nagakaigo sa kasilyas, magbasa sing wala labot nga publikasyon, ukon mag-atipan sang iban nga mga butang sa tion sang miting. Ang mga gulang dapat mangin huwaran sa sini nga bahin. Ang maayong Cristianong mga pamatasan magapahulag sa aton sa pagpakita sing nagakaigo nga pagtahod sa humalambal kag sa iya pasad-sa-Biblia nga mensahe paagi sa paghatag sa iya sang aton bug-os nga igtalupangod.
10 Dugang pa, bilang patugsiling sa humalambal kag sa tumalambong, indi naton dapat pagtugutan ang elektroniko nga mga pager kag cellular nga mga telepono sa pagtublag sang aton mga miting.
11 Mga Pamatasan kag mga Kabataan: Ang mga ginikanan dapat pirme mangin alisto sa paggawi sang ila mga kabataan sa Kingdom Hall. Kon ang bata maghibi ukon magsinabad sa tion sang miting kag nagatublag ini sa iban, nagakaigo nga dalhon ang bata sa guwa sang awditoryum sa gilayon kon mahimo agod pahipuson sia. Mabudlay ini kon kaisa, apang dumduma, nagapakita ini nga alisto ka sa ginabatyag sang iban. Ang mga ginikanan nga may magagmay nga kabataan nga mahimo magsinabad masami nga nagapakamaayo sa paglingkod sa likod nga bahin sang awditoryum agod pila lamang ang madisturbo kon kinahanglan gid man nga magtindog sila sa tion sang miting. Siempre pa, ang iban pa sa tumalambong mahimo magpakita sing nagakaigo nga pasunaid sa mga pamilya paagi sa pagtigana sang mga raya sa likod para pungkuan nila, kon kinahanglanon.
12 Ang mga ginikanan dapat man mangin alisto sa paggawi sang ila kabataan antes kag pagkatapos sang mga miting. Ang mga kabataan indi dapat magdalagan sa sulod sang tinukod, kay mahimo ini bangdan sang mga aksidente. Ang pagduludalagan sa guwa sang Kingdom Hall mahimo man mangin makatalagam, ilabi na sa mga gab-i nga madulom. Ang mabaskog nga mga paghambalanay sa guwa mahimo makatublag sa mga kaingod kag makahatag sing di-maayo nga impresyon sa aton pagsimba. Ang mga ginikanan nga nagapanikasog sing mahalungon nga tatapon ang ila kabataan sa sulod kag sa guwa sang Kingdom Hall ginadayaw bangod nagaamot ini sa kalipay sang aton pagpuyo sa paghiusa.—Sal. 133:1.
13 Sa Pagtinuon sa Libro: Ginaapresyar naton ang pagkamaabiabihon sang aton mga kauturan nga nagapagamit sang ila mga puluy-an para sa mga miting sang kongregasyon. Mahimo ini magkinahanglan sing nagakaigo nga paghanda kag sing di-kasulhayan para sa ila. Kon nagatambong, dapat naton ipakita ang maayo nga mga pamatasan kag pagtahod kag pagpatugsiling sa ila pagkabutang. Antes magsulod, dapat naton pahiran sing maayo ang aton mga sapatos agod indi mahigkuan ang salog ukon alpombra. Dapat tatapon sang mga ginikanan ang ila mga kabataan, nagapat-od nga nagatener sila sa bahin sang balay nga gintangdo para sa pagtinuon sa libro. Bisan pa nga ang grupo mahimo nga magamay lamang kag ang palibot daw indi pormal, indi kita dapat mangin pamilyar sing di-nagakaigo sa puluy-an sang iban. Dapat updan sang ginikanan ang isa ka bata kon magkadto sia sa kasilyas. Dugang pa, bangod ang pagtinuon sa libro isa ka miting sang kongregasyon, dapat kita manapot kaangay sang pagpanapot naton kon nagakadto sa Kingdom Hall.
14 Ang Maayo nga mga Pamatasan Importante: Ang pagpakita sing Cristianong mga pamatasan wala lamang nagapabanaag sing maayo sa aton ministeryo kundi nagapauswag man sing maayong kaangtanan sa iban. (2 Cor. 6:3, 4, 6) Subong mga sumilimba sang malipayon nga Dios, natural lamang para sa aton nga magyuhum, mangin mainayuhon, kag maghimo pa gani sing magagmay kag maayo nga mga butang nga nagapahalipay sa iban. Ining maayo nga mga pamatasan magapatahom sang aton kabuhi subong diosnon nga mga tawo.