Maghanda sang Imo Kaugalingon nga Presentasyon sa Magasin
1 Ginapabilihan naton ang mga magasin nga Lalantawan kag Magmata! tungod sa suno-sa-tion kag impormatibo nga mga artikulo sini, nga nagatuptop sang tanan nga butang halin sa kalibutanon nga mga isyu pakadto sa “madalom nga mga butang sang Dios.” (1 Cor. 2:10) Madumduman naton tanan ang madamong bag-o kag makapalig-on nga butang nga nabasa naton sa sining mga balasahon, nga amo ang ginagamit ni Jehova sa pagsugid sing amat-amat sang kamatuoran. (Hulu. 4:18) Nalangkag kita sa pagpanagtag sini sing lapnag kon mahimo.
2 Usisaa ang Inyo Teritoryo: Ano nga sahi sang mga tawo ang nagapuyo sa inyo lugar? Kon pirme sila nagadali, ayhan dapat ka maghanda sing malip-ot kag direkta sa punto nga presentasyon. Kon ang mga tawo sa inyo teritoryo indi masako, ayhan madamo pa ikaw sing masiling. Kon ang kalabanan nga tagbalay nagaobra kon adlaw, ayhan mas maayo nga duawon sila sa ila puluy-an sa gab-i. Ukon ayhan masugilanon mo ang iban kon adlaw paagi sa pagpanaksi sa dalan ukon sa pagbantala sa mga tindahan. Ang iban nga manugbantala nakatigayon sing maayong mga resulta paagi sa pagpalapit sa mga tawo sa mga paradahan sang salakyan kag sa mga parke.
3 Hibalua sing Maayo ang mga Magasin: Basaha ang tagsa ka guwa sa gilayon nga mabaton mo ini. Pilia ang mga artikulo nga sa banta mo makagalanyat sa mga tawo sa inyo teritoryo. Anong mga tema ang nagawili sa ila? Mangita sing espesipiko nga punto nga mabalikwat mo gikan sa artikulo nga ginaplano mo nga gamiton. Maghunahuna sing isa ka pamangkot nga makapukaw sing interes. Magpili sing isa ka teksto nga mabasa sa tagbalay kon may kahigayunan ka nga mahimo ini. Maghunahuna kon paano ka makapasad sing sadsaran para sa isa ka pagduaw liwat.
4 Ihanda ang Imo Introduksion: Pilia sing mahalungon ang mga tinaga nga gamiton mo sa pag-umpisa sing isa ka paghambalanay. Nangin madinalag-on ang iban paagi sa sining nagabukas nga komento: “Nakabasa ako sing isa ka makawiwili nga artikulo sa sining magasin, kag luyag ko ipaambit ini sa iban.” Madamo ang nagaumpisa paagi sa isa ka pamangkot tuhoy sa mga punto nga mahambalan nga ginaplano nila nga gamiton. Halimbawa:
5 Kon nagapadaku sang artikulo nahanungod sa paglapnag sang krimen, makapamangkot ka:
◼ “Ano ang kinahanglan agod mahimo kita makatulog sa gab-i nga wala nahadlok nga basi makawatan ukon mahalitan?” Ipaathag nga may impormasyon ikaw nahanungod sa solusyon sa sining problema. Ang solusyon magadula sa ulihi sang tanan man nga sahi sang problema sa katilingban. Patuhuyi ang pila ka butang sa magasin nga nagahatag sini nga paglaum. Sa imo pagbalik, mapatalupangod mo sa tagbalay ang kapitulo 1 sang Ihibalo nga libro.
6 Kon nagatanyag sing artikulo nahanungod sa pagkabuhi sang pamilya, makasiling ka sini:
◼ “Isa gid ka hangkat sa kalabanan nga mga ginikanan ang magbuhi sing isa ka pamilya karon nga mga adlaw. Madamong libro na ang nasulat tuhoy sini, apang bisan ang mga eksperto wala nagahiliugyon. May isa bala nga makahatag sing masaligan nga panuytoy?” Ipaambit ang isa ka espesipiko nga komento gikan sa magasin nga nagapakita sang maalamon nga laygay nga masapwan sa Biblia. Sa imo pagduaw liwat, hambali ang Makasulatanhon nga mga punto tuhoy sa pagpadaku sa kabataan nga ginatuptupan sa Ihibalo nga libro, pahina 145-8.
7 Kon nagagamit sing artikulo nahanungod sa isa ka problema sa katilingban, makasiling ka:
◼ “Madamong tawo ang ginahul-an bangod sang mahuol nga mga tion nga ginapuy-an naton. Nagahunahuna ka bala nga gintuyo sang Dios nga magkabuhi kita sa sining paagi?” Ipakita ang isa ka artikulo nga nagapakita kon paano malandas ang karon nga mga problema ukon nagahatag sing mga rason sa pagpaabot sing isa ka palaabuton nga hilway sa kabalaka. Sa imo masunod nga pagduaw, hambali ang ilustrasyon kag kapsion sa pahina 4-5 sang Ihibalo nga libro, kag nian idul-ong sing direkta sa isa ka pagtuon sa Biblia sa puluy-an.
8 Makigbagay sa Tagbalay: Masugilanon mo ang mga tawo nga may lainlain nga mga interes kag mga ginhalinan. Maghanda sing sadsaran nga presentasyon nga mapasibu mo sa tagsa ka tagbalay. Ibagay ang imo inugsiling sa lalaki, babayi, tigulang, ukon pamatan-on. Wala sing estrikto nga mga pagsulundan sa kon ano ang dapat mo isiling. Gamita ang bisan ano man nga komportable para sa imo kag magtigayon sing mga resulta. Apang, mangin mapagsik, maghambal sing tinagipusuon, kag mamati sing maayo. Mahantop sang mga “matarong nga nahuyog” ang imo pagkahanuot kag magapamati sing maayo.—Binu. 13:48.
9 Buligi ang Isa kag Isa: Paagi sa pagbayluhanay sing mga ideya, makatuon kita sing bag-ong mga paagi sa pagpabutyag sang aton kaugalingon. Ang pag-ensayo sang aton mga presentasyon sing dungan nagahatag sa aton sing kompiansa. (Hulu. 27:17) Kon ginaensayo mo ang imo inugsiling, mangin mas relaks ka sa ganhaan. Ang mga ginikanan dapat maghinguyang sing tion sa pagbulig sa ila kabataan sa paghanda, sa pagpamati samtang nagaensayo sila sang ila presentasyon, kag sa paghatag sing mga panugda para sa pag-uswag. Ang mga bag-uhan mahimo makabenepisyo paagi sa pag-upod sa mas eksperiensiado nga mga manugbantala.
10 Ang paghanda sang imo kaugalingon nga presentasyon sa magasin indi dapat mangin mabudlay. Paghunahuna lamang ini sang isa ka espesipiko nga butang nga isiling kag nian pagpabutyag sini sa makagalanyat nga paagi. Paagi sa paghunahuna nga daan, makahanda ka sing matahom nga presentasyon nga pagapamatian sing maayo.
11 Ang pagpanagtag sing mga magasin amo ang isa sang pangunang mga paagi nga ginapalapnag naton ang mensahe sang Ginharian sa bug-os nga kalibutan. Kon makapahamtang ka sing Ang Lalantawan kag Magmata! sa sinsero nga mga tawo, ang mga magasin amo na ang magahambal. Dumduma pirme ang kabilihanan sini kon paano nga ang mensahe sini mahimo nga makaluwas sing kabuhi. Ini nga sahi sang ‘paghimo sing maayo kag pagpaambit sang mga butang sa iban’ nagapahamuot gid kay Jehova!—Heb. 13:16.