Ang Pulong sang Dios Nagahatag sing Panuytoy
1 “Nagapuyo kita sa kalibutan nga may tuman kadamo nga problema kag tuman ka diutay lamang nga solusyon. Minilyon ang tayuyon nga ginagutom. Nagadamo pa ang nagiyan sa droga. Madamo pa nga pamilya ang nagakabungkag. Ang incesto kag kasingki sa pamilya amo pirme ang unod sang balita. Ang hangin nga aton ginahaklo kag ang tubig nga aton ginainom amat-amat nga nahiluan. Samtang, nagadamo pa sa aton ang nabiktima sang krimen.”
2 Amo sina ang pamuno sang libro nga The Bible—God’s Word or Man’s? Ang introduksion sini labi pa ka sibu-sa-tion karon sangsa ginbalhag ang libro sang nagligad nga pito ka tuig. Dapat mahibaluan sang mga tawo nga ang Pulong sang Dios nagahatag sing panuytoy kag nagaaman sing mga solusyon sa tanan nga problema nga nagapiot sa ila. Panikasugan naton nga buligan ang mga tawo sa Disiembre paagi sa pagtanyag sa ila sang New World Translation kag sang libro nga The Bible—God’s Word or Man’s? Sa pagkamatuod, ang pagbilin sing literatura pamuno lamang. Dapat kita magduaw liwat sa tuyo nga makasugod sing pagtuon sa Biblia. Ginapasalig ang bulig kon manikasog kita. (Mat. 28:19, 20) Yari ang pila ka ginpanugda nga mga presentasyon:
3 Kon masugilanon mo ang tigulang nga tawo, mahimo nga tilawan mo ini nga paagi:
◼ “Mahimo bala ako mamangkot: Sang bata ka pa, paano nagatamdanay ang mga tawo sa komunidad? [Pasabta sia.] Tuhay na karon ang kahimtangan, indi bala? Ano sa banta mo ang rason? [Pasabta sia.] Aktuwal naton nga makita ang katumanan sang tagna sa Biblia. [Basaha ang 2 Timoteo 3:1-5.] Luwas sini, ang Biblia nagasaad sing mas maayo nga kalibutan sa malapit nga palaabuton. Bangod sina ginapalig-on namon ang tanan nga basahon ang Biblia. Natalupangdan mo bala kon daw ano kaathag ang pamulong sa sining Biblia, ang New World Translation, nga ginbasa ko?” Ipaathag nga ginsulat ini sa modernong Ingles. Ipakita ang libro nga The Bible—God’s Word or Man’s? kag ipakita ang kapitulo 10, nga nagapaathag sang isa pa ka tagna nga nakita naton nga nagakatuman. Itanyag ang Biblia kag ang libro.
4 Kon magduaw ka liwat sa tigulang nga tawo nga napahamtangan mo sing Biblia kag libro, makasiling ka:
◼ “Sang nagligad naton nga paghambalanay, nag-ugyon kita nga ang modernong katilingban nag-usmod kon ipaanggid sa kabuhi sang nagligad nga pila ka tuig. Apang, luyag ko ipakita sa imo nga ang Biblia nagasaad sing mas maayo nga kalibutan sa palaabuton. [Basaha ang Bugna 21:3, 4.] Dapat ini magpalig-on sa aton nga tan-awon kon ano pa ang ginasiling sang Biblia.” Buksi ang God’s Word nga libro sa kapitulo 14 kag basaha ang mga parapo 3-4. Magtanyag sing walay bayad nga pagtuon sang Biblia sa puluy-an.
5 Kon nagapakigsugilanon sa batan-on nga tawo, makasiling ka:
◼ “Luyag ko mamangkot sa imo: Subong isa ka pamatan-on, sa banta mo may rason ka bala agod mangin optimistiko sa palaabuton? Kamusta ang palaabuton para sa imo? [Pasabta sia.] Sing makalilipay, may tunay nga rason agod mangin optimistiko sa palaabuton. [Basaha ang Salmo 37:10, 11.] Sanglit ang tawo may lainlain nga pagtamod tuhoy sa Biblia, ginbalhag namon ining libro, The Bible—God’s Word or Man’s? Talupangda ang rason nga ginahatag sini para basahon ang Biblia. [Basaha ang parapo 16-17 sa mga pahina 10-11.] Sa tion nga makumbinsi kita nga ang Biblia matuod, may pat-od kita nga paglaum para sa palaabuton. Malipay ako sa pagbilin sing isa ka kopya sining libro sa imo sa manubo nga kontribusyon.”
6 Kon magbalik ka agod duawon ang batan-on nga tawo nga nagbaton sing “God’s Word” nga libro, mahimo ka makasugod paagi sa pagsiling:
◼ “Ginaapresyar ko nga mabatian kon daw ano ang imo kabalaka sa palaabuton. Dumduma nga ginpakita ko sa imo ang isa ka teksto sa Biblia nga nagasaad sa aton sing isa ka makalilipay kag malig-on nga palaabuton. Yari ang isa pa. [Basaha ang Bugna 21:3, 4.] Ang libro nga ginbilin ko sa imo nagahatag sing makahalaylo nga pamatuod nga ang Biblia amo ang Pulong sang Dios, indi sang tawo. Talupangda kon paano kita sini dapat maapektuhan. [Basaha ang parapo 1-2 sa mga pahina 184-5.] Kon luyag mo, malipay ako sa pagtuon sang Biblia upod sa imo nga wala sing bayad.” Kon ginbaton ang pagtuon, pamangkuta ang indibiduwal kon may kopya sia sang Biblia. Kon wala, itanyag ang New World Translation.
7 Ang tawo nga wala makahibalo kon diin mangayo sing panuytoy sa pag-atubang sang mga problema sa kabuhi mahimo magahulag sa sining paagi:
◼ “Nagakabuhi kita sa tion nga halos ang tanan nagaatubang sing malubha nga mga problema. Madamo ang nagapangayo sing panuytoy sa tanan nga sahi sang mga manuglaygay. Diin sa banta mo kita makasapo sing maligdong nga laygay nga magabulig gid sa aton? [Pasabta sia.] Ginapakita sang Biblia nga kinahanglan naton ang panuytoy.” Basaha ang Jeremias 10:23. Buksi ang The Bible—God’s Word or Man’s? sa pahina 187 kag basaha ang parapo 9. “Ining libro magabulig sa imo nga maapresyar kon paano, sa idalom sang Ginharian sang Dios, ang tanan naton nga problema madula.” Itanyag ang libro.
8 Kon sa nahauna nga pagduaw ginhambalan ninyo ang nahanungod sa pagkinahanglan sang tawo sing panuytoy, mapadayon mo ang paghambalanay sa pagduaw liwat paagi sa pagsiling:
◼ “Sang una naton nga pagkilalahay, nag-ugyon kita nga kinahanglan naton ang panuytoy gikan sa Dios agod maatubang sing madinalag-on ang mga problema sa kabuhi. Nahanungod sina, sa banta ko maapresyar mo ang nagahinakop nga mga komento sa libro nga ginbilin ko sa imo. [Basaha ang parapo 12-13 sa pahina 189 sa God’s Word nga libro.] Nalipay ako sa pagtanyag sa imo sing walay bayad nga pagtuon sang Biblia sa puluy-an, kag handa ko nga ipasundayag ini sa imo karon mismo.”
9 Pakamaayuhon ni Jehova ang aton mga panikasog samtang ginabuligan naton ang mga tigulang kag mga batan-on nga maapresyar ang kabilihanan sang Pulong sang Dios kag sang panuytoy sini sa aton kabuhi.—Sal. 119:105.