Tipigi

Ginpanugda nga mga Presentasyon sa Pag-alagad sa Latagon

Gamita ang masunod nga mga panugda agod mabuligan ka sa paghanda sing mga presentasyon para sa tanyag nga literatura sa kada bulan.

Mangin Suod kay Jehova

“Madamo sang nagapati sa Dios ang luyag mangin suod sa iya. Nakahibalo ka bala nga ginaagda kita sang Dios nga mangin suod sa iya? [Basaha ang Santiago 4:8.] Ini nga publikasyon gindesinyo agod buligan ang mga tawo sa paggamit sang ila mismo Biblia agod mangin suod sa Dios.” Basaha ang parapo 1 sa pahina 16.

“Madamo karon sing inhustisya. Sibu gid ini sa ginalaragway diri. [Basaha ang Manugwali 8:9b.] Madamo ang nagapalibog kon bala nagaulikid gid ang Dios sa aton. [Basaha ang nahauna nga duha ka dinalan sa parapo 4 sa pahina 119.] Ini nga kapitulo nagapaathag kon ngaa gintugutan sang Dios ang inhustisya sa sulod sang pila ka tion.”

Is There a Creator Who Cares About You?

“Diin naton masapwan ang labing maayo nga laygay sa paglubad sang mabudlay naton katama nga mga problema? [Tuguti sia nga makasabat. Nian basaha ang Mateo 7:28, 29.] Ginapakita sini kon ano ang reaksion sang mga tawo sa Sermon ni Jesus sa Bukid. Talupangda kon ano ang ginsiling sang iban. [Ipakita ang mga komento sa pahina 152.] Ini nga kapitulo nagahinun-anon sa kabuhi kag mga panudlo ni Jesus.”

“Napaligban mo na bala: ‘Kon may Dios, dulaon bala niya ang pag-antos kag inhustisya sa kalibutan?’ [Tuguti sia nga makasabat. Nian basaha ang Bugna 21:3, 4.] Ini nga libro nagapaathag kon ano ang himuon sang Dios agod madula ang pag-antos kag ang ginhalinan sini.” Ipakita ang kapitulo 10.

Ihibalo nga Nagadul-ong sa Kabuhi nga Walay Katapusan

“Kon gin-agda ikaw nga magpuyo sa isa ka matahom nga palibot kaangay sini, batunon mo bala ina nga pangagda? [Ipakita ang laragway sa pahina 4-5, kag tuguti sia nga makasabat.] Talupangda kon ano ang ginasiling sang Pulong sang Dios nga yabi agod matigayon ining sahi sang pagkabuhi sing walay katapusan. [Basaha ang Juan 17:3.] Ini nga libro magabulig sa imo nga matigayon ang ihibalo nga nagadul-ong sa kabuhi nga walay katapusan.” Sambita nga hinun-anunan ninyo ang una nga lima ka parapo sang kapitulo 1 sa masunod nga pagduaw.

Ipakita ang retrato sa pahina 188-9, kag nagagamit sing mga pinamulong sa kapsion, pamangkuta ang tagbalay: “Nagalaum ka bala nga mabuhi sa Paraiso, kon ang ihibalo tuhoy sa Dios magatugob sa duta? [Tuguti sia nga makasabat. Nian basaha ang Isaias 11:9.] Ini nga libro magabulig sa imo nga matun-an kon ano ang ginasiling sang Biblia tuhoy sa Paraiso kag kon paano kita mangin bahin sini.” Sambita nga hinun-anunan ninyo ang parapo 11-16 sa kapitulo 1 sa masunod nga pagduaw.

Magtuon Gikan sa Daku nga Manunudlo

“Sa banta mo mangin mas maayo ayhan nga duog ang duta kon sundon sang mga tawo ining pinamulong? [Basaha ang Mateo 7:12a. Nian tuguti sia nga makasabat.] Ini nga libro nagaunod sing madamo nga leksion gikan sa labing daku nga manunudlo nga nagkabuhi.” Ipatalupangod ang mga retrato kag mga kapsion sa kapitulo 17.

“Kalabanan sang mga ginikanan karon nagatinguha nga ipatudok sa ila kabataan ang maayong mga pamatasan. Sa banta mo importante bala ini? [Tuguti sia nga makasabat. Nian basaha ang Hulubaton 22:6.] Talupangda nga ginapalig-on ang mga ginikanan nga sugdan ang paghanas sa ila mga kabataan sugod sa lamharon nga edad. Ini nga libro gindesinyo sa pagbulig sa ila sa paghimo sini.” Ipatalupangod ang mga retrato kag mga kapsion sa kapitulo 15, 18 ukon 32.

“Masami nga nagakakibot ang mga ginikanan sa mga ginapamangkot sang ila kabataan. Ang pila sining mga pamangkot mabudlay sabton, indi bala? [Tuguti sia nga makasabat. Nian basaha ang Efeso 6:4.] Ini nga libro makabulig sa mga ginikanan nga masabat ang mga pamangkot sang ila kabataan.” Ipadaku ang pila ka retrato kag mga kapsion sa kapitulo 11 kag 12 ukon 34 tubtob 36.

Life—⁠How Did It Get Here? By Evolution or by Creation?

“Tanan kita nagakabalaka sa mga krimen kag kasingki sa aton lugar. Sa banta mo may makahatag ayhan sing matuod nga solusyon sa sini nga problema? [Tuguti sia nga makasabat.] Ang Dios may solusyon.” Buksi ang pahina 196; basaha kag komentuhi ang Hulubaton 2:21, 22 sa parapo 19. Ipakita ang tig-ulo sang kapitulo 16, kag itanyag ang libro.

Buksi ang pahina 6, kag magsiling: “Madamo nga tawo ang nagahunahuna nga resulta lamang sang aksidente ang pagluntad sang aton matahom nga duta kag ang kabuhi sa sini. Ano sa banta mo ang rasonable nga paathag kon paano ini tanan nagluntad? [Tuguti sia nga makasabat.] Madamo nga ebidensia ang nagasuportar sa ginasiling sang Biblia nga may isa ka Manunuga nga tuman ka gamhanan kag nagahigugma gid sa aton. Sia ang matuod nga Dios, kag ang iya ngalan amo si Jehova.” Basaha ang Salmo 83:18, kag ipaathag sing malip-ot kon ngaa gintuyo niya nga mangin paraiso ang bug-os nga duta.

Mankind’s Search for God

“Bangod sang tuman kadamo nga relihion sa karon, napaligban mo na bala kon paano naton mahibaluan kon ano nga relihion ang ginakahamut-an sang Dios?” Pagkatapos sia makasabat, buksi ang pahina 377. Ipatalupangod ang punto sa numero 7, kag pamangkuta ang tagbalay kon bala nagaugyon sia nga dapat mahiusa sang matuod nga relihion ang tanan nga rasa sang katawhan. Buksi ang isa sa mga ginhinambitan nga mga teksto, kag kon ginatugot sang tion, ipaathag ang pila pa ka punto sa listahan. Kon interesado gid sia, itanyag ang libro. Kon manuglakat ka na, mahimo ka mamangkot, “Paano dapat maapektuhan sang matuod nga relihion ang paggawi sang isa ka tawo?” Maghimo sing kahimusan para sa isa ka pagduaw liwat agod masabat ang pamangkot.

Kon may magsiling nga katapo sia sang isa ka daku nga relihion, sarang ka makasiling: “Makawiwili makighambal sa mga tawo nga lainlain sing relihion. Nanuhaytuhay nga direksion ang nakadtuan sang katawhan sa pagpangita sa Dios. [Kon nagakaigo, basaha ang Binuhatan 17:26, 27.] Sa masami, ginasunod sang mga tawo ang relihion sang ila mga ginikanan. [Basaha ang parapo 12 sa pahina 8.] Ang pagtuon tuhoy sa iban nga relihion mabuligon kag edukasyunal. Ini nga libro nagapaathag sang ginhalinan, mga buhat, kag mga panudlo sang dalagku nga mga relihion sa kalibutan.” Ipakita ang isa ka halimbawa kon ano ang ginasiling sang libro tuhoy sa iya relihion, subong sang masapwan sa masunod nga mga pahina: Sikhismo (100-1); Hinduismo (116-17); Budhismo (141); Taoismo (164-6); Confucianismo (177); Shintoismo (190-5); Judaismo (220-1); kag Islam (289).

Revelation—⁠Its Grand Climax At Hand!

“Siguro nakabati ka na tuhoy sa [sambita ang isa ka balita]. Kon makaagom sing wala ginapaabot nga kamatayon ang mga tawo, madamo ang naligban kon ano nga lugpay ang mahatag sa mga pamilya sang mga biktima. Ano sa banta mo?” Tuguti sia nga makasabat. Nian buksi ang pahina 299, kag ipakita ang laragway sang pagkabanhaw nga gin-ilustrar. Magpadayon paagi sa pagsiling: “Madamo ang nakibot sang matun-an nila nga banhawon lunsay ang matarong kag dimatarong nga mga tawo sa Paraiso sa duta. [Basaha ang Binuhatan 24:15 nga ginkutlo sa parapo 9 sa pahina 297, kag ihatag ang paathag sa parapo 10.] Ginabinagbinag sining libro ang madamo pa nga makawiwili nga detalye tuhoy sa katuyuan sang Dios sa palaabuton.”

The Bible—⁠God’s Word or Man’s?

“Nagakabuhi kita sa tion nga halos tanan nga tawo may yara mabug-at nga mga problema. Madamo ang nagaliso sa tanan nga sahi sang mga manuglaygay. Ang iban sa espiritista nagapangayo sing bulig. Sa banta mo diin ayhan kita makasapo sing maayong laygay nga makabulig gid sa aton? [Tuguti sia nga makasabat.] Ang Biblia may ginasiling nga importante nga kamatuoran nga dapat naton hangpon. [Basaha ang 2 Timoteo 3:⁠16. Nian buksi ang pahina 187, kag basaha ang parapo 9.] Buligan ka sining libro nga mahangpan kon ngaa ang pag-aplikar sang ginasiling sang Biblia nagaresulta gid pirme sa labing maayo.”

Ang Pinakabantog nga Tawo nga Nagkabuhi

“Sa sining tion sang Krismas madamo nga tawo ang nagapamensar kay Jesus. Apang, bangod madamong malain nga butang ang nagakatabo sa bug-os nga kalibutan, madamo ang nagaduhaduha kon bala nagaulikid gid si Jesus sa aton. Ano ang ginabatyag mo sa sini?” Tuguti sia nga makasabat. Buksi ang kapitulo 24, kag binagbinaga sing malip-ot kon ngaa nagkari si Jesus sa duta. Nian basaha ang Juan 15:13 kag ipadaku ang gugma nga ginabatyag ni Jesus para sa iban.

“Kon masambit ang ngalan ni Jesucristo, ang iban nagapensar nga isa sia ka lapsag ukon isa ka nagaantos nga tawo nga nagatagumatayon na. Ang nahibaluan nila tuhoy kay Jesus nagadalahig lamang sa iya pagkabun-ag kag kamatayon. Masami napasapayanan ang dalayawon nga mga butang nga iya ginsiling kag ginhimo sa bug-os niya nga pagkabuhi. Ang iya nahimuan nagaapektar sa tanan nga tawo nga nagkabuhi sa sining duta. Amo nga importante nga tun-an naton sa bug-os naton nga masarangan ang dalayawon nga mga butang nga ginhimo niya para sa aton.” Basaha ang Juan 17:3. Buksi ang una nga pahina sang introduksion, kag basaha ang ikap-at nga parapo.

Ano ang Ginapatuman Sang Dios sa Aton?

“Sa banta mo gintuyo bala sang Dios nga magkabuhi kita nga napalibutan sing mga kagamo subong sang ginaatubang naton karon? [Tuguti sia nga makasabat. Nian basaha ang Mateo 6:10.] Napaligban mo na bala kon ano gid ang Ginharian sang Dios?” Buksi ang leksion 6, kag basaha ang mga pamangkot sa panugod sang leksion. Sugdi ang paghinun-anon sa leksion, ukon maghimo sing kahimusan nga himuon ini sa masunod nga pagduaw.

“Walay sapayan sang pag-uswag sang modernong katilingban, ang balatian kag kamatayon padayon nga nagapaantos kag nagadulot sing tuman nga kalisod sa katawhan. Nakahibalo ka bala kon ano ang himuon ni Jesus sa mga balatianon, mga tigulang, kag bisan gani sa mga patay?” Tuguti sia nga makasabat. Kon luyag mahibaluan sang tawo ang sabat, buksi ang leksion 5, kag basaha ang mga pamangkot para sa parapo 5-6. Binagbinaga ang mga parapo, ukon maghimo sing kahimusan nga himuon ini sa masunod nga pagduaw.

Simbaha ang Lamang Matuod nga Dios

“Sa banta mo diin kita makapangayo sing bulig agod maatubang ang mga pag-ipit sa kabuhi? [Tuguti sia nga makasabat. Nian basaha ang Roma 15:4.] Talupangda nga ginaamanan kita sang Kasulatan sing mga instruksion, lugpay, kag paglaum, nga magapabakod sa aton agod mabatas ang mga kabudlayan. Ining libro may mabuligon nga mga panugda kon paano kita makabenepisyo sing labi sa pagbasa sang Biblia.” Ipadaku ang apat ka punto nga ginbalay sa pahina 30.

“Sugod pa sang mga adlaw nga nagkabuhi si Jesus sa duta, madamo nga tawo ang nagpangamuyo nga magkari ang Ginharian sang Dios. Napaligban mo na bala kon ano ang buot silingon sang pagkari sinang Ginharian sa katawhan? [Tuguti sia nga makasabat. Nian basaha ang Daniel 2:44.] Ginapaathag sining libro kon ano ang Ginharian sang Dios, ano ang pagahimuon sini, kag kon paano kita makabenepisyo sa matarong nga paggahom sini.” Ipatalupangod ang ilustrasyon sa pahina 92-3.