‘Ibantala Naton Ang Pulong’
1 Subong sang ginasiling sang Biblia nahanungod sa “katapusan nga mga adlaw,” ang kalabanan nga mga tawo karon may yara lamang “dagway sang diosnon nga debosyon.” (2 Tim. 3:1, 5) Ini bangod wala ginsakdag sang mga lider sang relihion ang Biblia. Ginapakamaayo pa nila nga balikwaton ang mga panudlo sang mga pilosopo kag mga teologo ukon binagbinagon ang sosyal kag politikal nga mga isyu sa baylo nga ibantala ang Pulong sang Dios. Madamong lider sang relihion ang nagahunahuna nga ang Biblia karaan na, kag gani ginapakamaayo nila nga pasanyugon ang teoriya sang ebolusyon sa baylo sang panudlo sang Biblia nahanungod sa Manunuga. Wala gani ginagamit sang kalabanan nga mga klerigo ang personal nga ngalan sang Dios, kag wala sila nagapamatok sang ginkuha ini sa kalabanan nga modernong mga badbad sang Biblia.
2 Kaangay sang mga lider sang relihion sadtong kaadlawan ni Jesus, ang mga klero karon nagabantala sa walay pulos. (Mat. 15:8, 9) Kaangay gid ini sa gintagna ni manalagna Amos, may “tiggulutom, indi sa tinapay, kag kauhaw, indi sa tubig, kundi sa pagpamati sang mga pulong ni Jehova.” (Amos 8:11) Labaw sa iban pa nga butang, ang mga tawo nagakinahanglan sing espirituwal nga pagkaon sa Pulong sang Dios.
3 Kon Paano Paayawan ang Espirituwal nga Kinahanglanon sang Katawhan: Ginlaygayan ni Pablo si Timoteo nga magpabilin sa “balaan nga mga sinulatan, nga makapaalam [sa isa] para sa kaluwasan,” kag ginsugo niya sia nga “ibantala ang pulong” sa iban. (2 Tim. 3:14, 15; 4:2) Subong mga Saksi ni Jehova, dapat kita magpabilin sa ginatudlo sang Biblia kon kita nagabantala, busa nagailog kay Jesus, nga nagsiling: “Ang akon ginatudlo indi akon, kundi iya sang nagpadala sa akon.” (Juan 7:16) Luyag naton nga mahibaluan sang mga tawo nga ang Pulong sang Dios amo ang ginhalinan sang impormasyon nga ginapaambit naton sa ila.—1 Cor. 2:4-7.
4 Ang mga tawo dapat anay makabati sang kamatuoran gikan sa Biblia agod makatuo kay Jehova. Si Pablo makatarunganon nga nagsulat: “Kag, paano bala ang pagtuo nila sa iya nga wala nila mabatii? Kag, paano bala ang pagkabati nila kon walay manugwali?” (Roma 10:14) Paagi sa pagbantala sang Pulong sang Dios, ginabuligan naton ang iban nga makatigayon sing pagtuo paagi sa sibu nga ihibalo. Ina nga ihibalo nagabalhin sang kabuhi para sa ikaayo. Ang Ingles nga awtor nga si Charles Dickens nagsulat nahanungod sa Biblia: “Amo ini anay kag mangin ang labing maayo nga libro sa kalibutan, bangod nagatudlo ini sa imo sang labing maayo nga mga leksion nga paagi sini ang bisan sin-o nga tawhanon nga tinuga nga nagatinguha nga mangin matinuuron kag matutom mahimo matuytuyan.”
5 Ang mga ginagutom sa espirituwal nga kamatuoran makakilala gilayon nga ginasuportahan ini sang awtoridad sang Pulong sang Dios. Sadto anay sang 1913, si Frederick W. Franz, subong isa ka lamharon nga estudyante sa kolehiyo, ginhatagan sing pulyeto nga natig-uluhan sing Where Are the Dead? Pagkatapos mabasa ang sabat sang Biblia, sia nagsiling: “Amo ini ang kamatuoran.” Padayon naton nga ibantala ang Pulong sing makugi kag busa makig-ambit sa kalipay nga mabatian ang iban nga nagasiling: “Amo ini ang kamatuoran.”