Pamangkot
◼ Ano ang dapat himuon kon may matabo nga kalamidad nga nagaapektar sa mga kauturan?
Kon May Matabo nga Kalamidad sa Inyo Lugar: Indi makugmat. Magpakatawhay, kag magkonsentrar sa kon ano gid ang malahalon—ang kabuhi, indi ang mga pagkabutang. Atipana ang gilayon nga mga kinahanglanon sa pisikal sang imo pamilya. Nian pahibalua ang mga gulang tuhoy sa imo kahimtangan kag sa imo nga nahamtangan.
Ang mga gulang kag ministeryal nga mga alagad may importante nga papel sa paghatag sing bulig. Kon may abanse nga paandam nga ginhatag, kaangay sa mga bagyo, dapat pat-uron sining mga utod nga lalaki nga ang tanan yara sa indi peligruso nga lugar, kag kon may tion pa, dapat magkuha kag magpanagtag sing mga suplay nga mahimo nga kinahanglan.
Pagkatapos sina, pangitaon sang mga konduktor sa pagtinuon sa libro ang tagsa ka pamilya kag hibaluon ang ila kahimtangan. Ang nagadumala nga manugtatap ukon ang isa pa ka gulang dapat sugiran sang kahimtangan sang tagsa ka pamilya, bisan pa nga ang tanan maayo. Kon may mahalitan, ang mga gulang magahimo sing kahimusan nga mapabulong sia. Magaaman man sila sing bisan anong materyal nga mga butang subong sa kalan-on, panapton, pasilungan, ukon mga kagamitan sa balay nga ginakinahanglan. (Juan 13:35; Gal. 6:10) Ang lokal nga mga gulang magahatag sing espirituwal kag emosyonal nga suporta sa kongregasyon kag magahimos gilayon kon mahimo nga masugdan liwat ang mga miting sa kongregasyon. Pagkatapos matimbangtimbang ang kahimtangan, dapat sugiran sang gulang ang manugtatap sa sirkito tuhoy sa bisan ano nga kasamaran, kahalitan sa Kingdom Hall ukon sa mga puluy-an sang mga kauturan. Nian tan-awon sang manugtatap sa sirkito ang iban pa nga mga kongregasyon agod mahibaluan kon daw ano kalapnag ang problema, kag pagkatapos sina teleponohan ukon telegramahan niya ang sanga talatapan upod ang isa ka report tuhoy sa kahimtangan.
Kon May Matabo nga Kalamidad sa Iban nga Lugar: Ilakip ang naapektuhan nga mga kauturan sa inyo mga pangamuyo. (2 Cor. 1:8-11) Kon luyag mo maghatag sing bulig nga kuwarta, mahimo ninyo mapadala ang inyo mga donasyon sa Sosiedad, diin isa ka pundo ang ginatigana para sa sining katuyuan. Ang direksion amo ang: Watch Tower Society, P. O. Box 2044, 1060 Manila. (Binu. 2:44, 45; 1 Cor. 16:1-3; 2 Cor. 9:5-7; tan-awa ang Disiembre 1, 1985, Watchtower, pahina 20-2.) Indi magpadala sing mga materyales ukon mga suplay sa lugar nga may kalamidad kon wala ginapangabay sing espesipiko sang mga kauturan nga nagadumala. Malikawan sini ang kagumon kag mapat-od ang nagakaigo nga pagpanagtag sa kon ano ang kinahanglanon.—1 Cor. 14:40.
Pagkatapos matulutimbang sing maayo ang kahimtangan, ang Sosiedad magapamat-od kon bala dapat magporma sing isa ka relief committee. Ang masaligan nga mga kauturan pahibaluon. Ang tanan dapat makigkooperar sa mga gulang agod ang gilayon nga mga kinahanglanon sang tanan nga kauturan mahatag sing nagakaigo.—Tan-awa ang Jehovah’s Witnesses—Proclaimers of God’s Kingdom, pahina 310-15.