Handa Ka Bala sa Kinaugali nga Kalamidad?
1. Ngaa maalamon nga maghanda sa mga kalamidad?
1 Kada tuig, minilyon ka tawo sa bug-os nga kalibutan, lakip na ang kadamuan sang aton mga kauturan, ang naapektuhan sang mga linog, tsunami, mabunok nga ulan, buhawi, bagyo, kag mga baha. Bangod indi mapaktan ang mga kinaugali nga kalamidad kag mahimo nga maapektuhan ang bisan sin-o sa aton, maalamon gid nga maghanda kita.—Hulu. 21:5.
2. Ngaa dapat gid naton pahibaluon ang mga gulang sang aton bag-o nga adres kag (mga) numero sang telepono?
2 Sing Abanse: Kon kaisa mahimo kita paandaman sang mga awtoridad sa nagahilapit nga kalamidad. Importante nga pamatian naton ini nga paandam. (Hulu. 22:3) Sa sini nga mga kahimtangan tinguhaan sang mga gulang nga kontakon ang tanan sa kongregasyon agod mabuligan sila sa pagpreparar. Pagkatapos sang kalamidad, tinguhaan man sang mga gulang nga kontakon ang tanan nga katapo sang kongregasyon agod mapat-od kon luwas sila kag hibaluon kon ano nga bulig ang ila ginakinahanglan. Mahimo mauyang ang hamili nga tion kon ang gulang wala sing bag-o nga impormasyon sa pagkontak sa ila. Gani importante gid nga pahibaluon sang mga manugbantala ang sekretaryo kag ang ila manugtatap sang pagtinuon sa libro sang ila bag-o nga adres kag (mga) numero sang telepono.
3. Paano kita makakooperar sa mga gulang kon nagapuyo kita sa duog nga masami may kalamidad?
3 Kon ang kongregasyon yara sa duog nga masami may kalamidad, mahimo pangabayon sang mga gulang ang mga manugbantala nga hatagan sila sang ngalan kag numero sang telepono sang ila paryente ukon abyan nga wala nagapuyo sa ila duog kag kon sin-o ang kontakon sa tion sang emerhensia. Makabulig ini sa mga gulang agod mahibaluan kon diin sila nagbakwit. Makahimo man sing plano ang mga gulang kon ano ang ila pagahimuon para sa kongregasyon sa tion sang emerhensia, nga nagalakip sang mga butang subong sang paghupot sing listahan sang mga suplay nga nakahanda pirme para sa tion sang emerhensia, kahimusan sa pagbakwit, kag mga plano sa pagbulig sa mga may kasablagan. Importante gid nga magkooperar kita sa sini nga mga kahimusan.—Heb. 13:17.
4. Ano ang dapat naton himuon kon may kalamidad sa aton duog?
4 Pagkatapos Sang Kalamidad: Ano ang dapat mo himuon kon may kalamidad sa inyo duog? Pat-ura nga matatap ang panguna nga mga kinahanglanon sa pisikal sang imo pamilya. Kon masarangan mo, buligi ang iban nga naapektuhan. Tinguhai gilayon nga makontak ang inyo manugtatap sang pagtinuon sa libro ukon ang iban nga gulang. Dapat mo ini himuon bisan pa nga luwas ka kag wala nagakinahanglan sing bulig. Kon nagakinahanglan ka sing bulig, saligi nga ginahimo gid sang imo mga utod ang tanan nila nga masarangan agod mabuligan ka. (1 Cor. 13:4, 7) Dumduma nga nahibaluan ni Jehova ang imo kahimtangan; magsalig sa iya pagsakdag. (Sal. 37:39; 62:8) Mangin alisto sa mga kahigayunan nga makahatag sing espirituwal kag emosyonal nga bulig sa iban. (2 Cor. 1:3, 4) Kon posible, ipadayon gilayon ang inyo teokratikong hilikuton.—Mat. 6:33.
5. Paano kita subong mga Cristiano naapektuhan sang kalamidad?
5 Samtang ginakulbaan gid ang mga tawo sa kalamidad, makapaabot kita nga may pagsalig sa palaabuton. Sa indi madugay ang tanan nga kalamidad pagadulaon na. (Bug. 21:4) Samtang nagakatabo ini, makahimo kita sing rasonable nga mga tikang agod mahandaan ang tion sang kagamo kag kabudlayan samtang ginahuptan naton ang aton kakugi sa pagbantala sang maayong balita.