“Magmapinasalamaton Kamo”
1 Ang kalabanan sa aton ginhanas kutob sa pagkabata nga magsiling sing “palihug” kag “salamat” kon may nagpakita sa aton sing kaayo. Si Pablo nagalaygay sa aton nga pirme ‘kita magmapinasalamaton,’ kag dapat kita ilabi na nga magpasalamat kay Jehova. (Col. 3:15, 16) Apang paano naton ipabutyag ang aton pagpasalamat sa aton Dakung Manunuga? Kag ano ang aton mga rason agod magpasalamat sa iya?
2 Si apostol Pablo nagsulat: “Salamat sa Dios, kay naghatag sia sa aton sing kadalag-an paagi sa aton Ginuong Jesucristo!” (1 Cor. 15:57) Sa tion sang Memoryal kada tuig, ginapahanumdom kita sang walay latid nga gugma nga ginpakita sang Dios kag ni Cristo sa pag-aman sing gawad. (Juan 3:16) Sanglit ang kalabanan sa aton namatyan sing mga hinigugma, daw ano gid ang aton pagpasalamat sa saad ni Jesus nga pagkabanhaw! Ang aton tagipusuon puno gid sing pasalamat kon binagbinagon naton ang paglaum nga makalampuwas sa katapusan sining sistema nga indi na kinahanglan nga mapatay pa. (Juan 11:25, 26) Mabudlay makakita sing mga tinaga agod ipabutyag ang pasalamat tungod sa tanan makatilingala nga mga butang nga maaguman pa naton sa nagapakari nga dutan-on nga Paraiso. (Bug. 21:4) Ano ang maayo pa nga rason ni bisan sin-o agod ‘magmapinasalamaton’ sa Dios?
3 Kon Paano Ipabutyag ang Pasalamat sa Dios: Nagakaigo gid pirme nga ipabutyag naton ang aton pasalamat sa pangamuyo kay Jehova tungod sa iya kaayo. (Sal. 136:1-3) Ginapahulag man kita nga ipakita ang aton pasalamat sa iya sa iban pa positibo nga mga paagi. Halimbawa, pat-od gid nga magatambong kita sa Domingo, Marso 23, sa Memoryal sang kamatayon ni Cristo. Malipayon naton nga ‘ginapadunggan si Jehova sang aton hamili nga mga butang’ agod magamit sa materyal nga mga kinahanglanon sang lokal nga kongregasyon kag sang bug-os kalibutan nga hilikuton. (Hulu. 3:9) Ginasakdag naton sing bug-os ang mga gulang kag nagabulig sa ila, busa nagapakita sang aton pasalamat sa Dios tungod sa bulig nga ginahatag niya paagi sa ila. (1 Tes. 5:12, 13) Kada adlaw, nagapanikasog kita nga huptan ang matarong nga pagginawi nga nagahimaya sa ngalan sang Dios. (1 Ped. 2:12) Si Jehova nalipay sa sining tanan nga pamatuod sang aton pagpasalamat.—1 Tes. 5:18.
4 Ang Aton Labing Maayo nga Pagpabutyag sing Pasalamat: Ang bug-os kalag nga pagpakigbahin sa pagbantala sa Ginharian nga hilikuton, pagpadungog sa ngalan ni Jehova, pagpabutyag sing pasalamat sa pangamuyo, kag mainunungon nga pagpangapin sa kamatuoran amo ang pila sa labing maayo nga mga pagpabutyag sing tinagipusuon nga pasalamat nga sarang naton mahimo sa aton Manunuga. Nalipay si Jehova nga makita kita nga nagahimo sing sagrado nga pag-alagad bilang pagsakdag sa iya kabubut-on nga “ang tanan nga sahi sang mga tawo maluwas.” (1 Tim. 2:3, 4) Amo ina kon ngaa tuman kadamo nga manugbantala ang nagasabat sa panawagan sa Pebrero nga Ang Aton Ministeryo sa Ginharian nga mag-auxiliary payunir sa mga bulan sang Marso, Abril, kag Mayo. Mabuylugan mo bala ang mga payunir sa Abril? sa Mayo?
5 Kon ang aton paglaum nga magkabuhi sing dayon matuman, labi pa gid kita nga may rason nga magpadayon sa pagpakita sing malipayon nga pagpasalamat kay Jehova.—Sal. 79:13.