Pagtuytoy Sa Mga Estudyante Sa Organisasyon Sa Likod Sang Aton Ngalan
1 “Isa ini ka mensahe nga ginahambal sa kapin sa 200 ka pamulong. Isa ini ka mensahe nga mabatian sa kapin sa 210 ka kadutaan. Isa ini ka mensahe nga ginadul-ong sing personal sa bisan diin man nga may mga tawo. Ini tanan bahin sang labing daku nga hilikuton sa pagbantala nga ginahimo sa kalibutan, isa ka mensahe nga nagahiusa sa minilyon sa bug-os nga duta. Ang mga Saksi ni Jehova gin-organisar sa paghimo sini nga hilikuton sa kapin na sa isa ka gatos ka tuig!”
2 Amo sini ang umpisa sang panaysayon (sa Ingles) sa video nga Jehovah’s Witnesses—The Organization Behind the Name. Nagapadayon ini sa pagsabat sa mga pamangkot: Sin-o gid ang mga Saksi ni Jehova? Paano ginaorganisar ang ila hilikuton? Ginatuytuyan? Ginagastuhan? Ginapadulot sini sa mga tumalan-aw ang katunayan nga “ang mga Saksi ni Jehova sa bug-os nga kalibutan ginhanas subong isa ka organisasyon sa pagbulig sa ila mga isigkatawo nga makatukod sing pagtuo sa Biblia,” kag ginapalig-on sila nga tan-awon nila mismo ang organisasyon sa likod sang aton ngalan. Pagkatapos makatan-aw sini nga video, isa ka babayi nga nagatuon ang naghibi sa kalipay kag apresasyon kag nagsiling: “Paano bala nga indi mahangpan sang isa nga amo ini ang organisasyon sang matuod nga Dios, si Jehova?”—Ipaanggid ang 1 Corinto 14:24, 25.
3 Isa pa ka babayi ang madugay na nga nagatuon sa Biblia, apang indi niya mabaton ang katunayan nga ang Trinidad isa ka butig nga doktrina. Nian ginpatan-aw sa ila nga mag-asawa ang video. Nawili gid sila sa presentasyon kag ginsulit nila ini tan-aw sadto man nga gab-i. Sa ila masunod nga pagtuon, ginpabutyag sang asawa ang iya handum nga mangin isa ka Saksi. Nagsiling sia nga ginsentro lamang niya ang iya igtalupangod sa iya pagtuo sa Trinidad apang wala niya pagtan-awa ang aton organisasyon kag ang mga tawo sa sulod sini. Gikan sa video narealisar niya nga nakita niya ang matuod nga organisasyon sang Dios. Luyag niya gilayon magbantala sa pamalaybalay. Pagkatapos sia mapaathagan sang kinahanglanon nga mga tikang para mangin dibawtismado nga manugbantala, sia nagsiling: “Sugdan na naton ini.” Naghalin sia sa iya simbahan, nagsugod sa pag-alagad sa latagon, kag nangin sampaton sa pagpamatuod nga sayop ang Trinidad.
4 Madugay na napamatud-an nga ang mga estudyante sa Biblia nagauswag sing mas maayo sa espirituwal kag nagahamtong sing mas madasig kon makilala nila ang organisasyon ni Jehova kag makig-upod sa sini. Sing talalupangdon, pagkatapos mabawtismuhan ang 3,000 sang Pentecostes, “nagpadayon sila sa paghugod sang ila kaugalingon sa panudlo sang mga apostoles kag sa pagpakig-upod sing tingob.” (Binu. 2:42, footnote) Kinahanglan naton buligan ang mga estudyante nga himuon man ini karon. Paano naton ini mahimo?
5 Abagaha ang Responsabilidad: Dapat mahangpan sang tagsa ka disipulo nga responsabilidad niya nga tuytuyan ang estudyante sa Biblia sa organisasyon sang Dios. (1 Tim. 4:16) Ang tagsa ka sesyon sa pagtuon dapat tamdon subong isa ka paagi sa pag-uswag padulong sa makalilipay nga adlaw kon simbuluhan sang isa ka bag-uhan ang iya dedikasyon kay Jehova paagi sa bawtismo sa tubig. Ang isa sa mga ipamangkot sa iya sa tion sang seremonya sa bawtismo amo: “Nahangpan mo bala nga ang imo dedikasyon kag bawtismo nagapakilala sa imo subong isa sa mga Saksi ni Jehova nga nagapakig-upod sa ginatuytuyan sang espiritu sang Dios nga organisasyon?” Gani, importante nga mahangpan niya nga indi sia makaalagad sa Dios kon indi sia makig-upod sing aktibo upod sa matuod nga Cristianong kongregasyon.—Mat. 24:45-47; Juan 6:68; 2 Cor. 5:20.
6 Padayon nga tudluan ang estudyante tuhoy sa lokal nga kongregasyon kag sa internasyonal nga organisasyon sa likod sang mga Saksi ni Jehova. Himua ini sa kada sesyon sang pagtuon sa Biblia, sugod sa nahauna. Kutob gid sa umpisa, agdaha ang estudyante sa mga miting, kag padayon sia nga agdahon.—Bug. 22:17.
7 Gamita ang mga Galamiton nga Ginaaman: Ang aton labing maayo nga mga publikasyon nga magamit sa pagdumala sing mga pagtuon sa Biblia sa puluy-an amo ang brosyur nga Ano ang Ginapatuman sang Dios sa Aton? kag ang libro nga Ang Ihibalo nga Nagadul-ong sa Kabuhi nga Walay Katapusan. Lunsay sini ginapatalupangod ang kinahanglanon nga makig-upod sa kongregasyon. Ang katapusan sang leksion 5 sa Ginapatuman nga brosyur nagasiling: “Dapat mo tun-an sing padayon ang nahanungod kay Jehova kag tumanon ang iya mga ginapatuman. Ang pagtambong sa lokal nga Kingdom Hall sang mga Saksi ni Jehova magabulig sa imo.” Ang Ihibalo nga libro sulit-sulit nga nagapalig-on sa estudyante nga makig-upod sa mga miting. Ang kapitulo 5, parapo 22, nagapalab-ot sini nga imbitasyon: ‘Mainit kamo nga ginapalig-on sang mga Saksi ni Jehova nga magbuylog sa ila sa pagsimba sa Dios “sa espiritu kag kamatuoran.” (Juan 4:24)’ Ang kapitulo 12, parapo 16, nagasiling: “Samtang ginapadayon mo ining pagtuon kag ginahimo nga kinabatasan ang pagtambong sa mga miting sang mga Saksi ni Jehova, ang imo pagtuo mapalig-on sing dugang pa.” Ang kapitulo 16, parapo 20, nagasiling: “Ugalia ang pagtambong sa mga miting sang mga Saksi ni Jehova.” Ini nagadugang: “Magabulig ini sa imo nga mahangpan kag iaplikar ang ihibalo gikan sa Dios sa imo kabuhi kag magadala sa imo sing kalipay. Ang pagpabilin nga isa ka bahin sang bug-os kalibutan nga Cristianong paghiliutod magabulig sa imo sa pagpabilin nga malapit kay Jehova.” Ginapaathag sing tul-id sang kapitulo 17 kon paano ang isa makakita sing matuod nga kalig-unan sa tunga sang katawhan sang Dios. Samtang nagatuon upod sa iban, responsabilidad naton nga ipadaku ini nga mga bahin sa materyal.
8 Ang brosyur nga Mga Saksi ni Jehova—Nahiusa nga Nagahimo sang Kabubut-on sang Dios sa Bug-os nga Kalibutan isa ka maayo nga galamiton nga ginbalhag agod mangin pamilyar ang mga indibiduwal sa lamang kitaon nga organisasyon nga ginagamit karon ni Jehova sa paghimo sa iya kabubut-on. Ang detalyado nga impormasyon nga ginaunod sini tuhoy sa aton ministeryo, mga miting, kag organisasyon magapalig-on sa bumalasa nga makig-upod sa aton sa pagsimba sa Dios. Sa tion nga matukod ang isa ka pagtuon sa Biblia, ginarekomendar nga hatagan naton sing isa ka kopya sini nga brosyur ang estudyante agod mabasa niya sa iya kaugalingon. Indi na kinahanglan nga tun-an ini upod sa iya subong sa ginahimo anay.
9 Ang pila sa mga video nga ginhimo sang Sosiedad maayo gid nga mga galamiton sa pagtuytoy sa mga estudyante sa organisasyon sa likod sang aton ngalan. Ini amo ang: (1) The New World Society in Action, ang rebisyon sang 1954 nga pelikula nga nagapadaku sang mahim-ong, masaligan, kag mahigugmaon nga espiritu nga paagi sini ang organisasyon ni Jehova nagapanghikot; (2) United by Divine Teaching, nga nagausisa sang mahidaiton nga paghiusa nga ginpakita sa aton internasyonal nga mga kombension sa Nasidlangan nga Europa, Bagatnan nga Amerika, Aprika, kag Asia; (3) To the Ends of the Earth, nga nagtanda sang ika-50 nga anibersaryo sang Watchtower Bible School of Gilead kag nagapakita sang epekto sang mga misyonero sa bug-os kalibutan nga hilikuton sa pagbantala; (4) Jehovah’s Witnesses Stand Firm Against Nazi Assault, nga nagasugid sang makakulunyag nga sugilanon tuhoy sa kaisog kag kadalag-an sang mga Saksi walay sapayan sang mapintas nga paghingabot ni Hitler sa ila; kag, siempre pa, (5) Jehovah’s Witnesses—The Organization Behind the Name.
10 Magtalana sing Progresibo nga mga Tulumuron Para sa mga Miting: Dapat ipaathag sa mga estudyante nga kinahanglan naton ang pribado nga pagtuon sa Biblia sa puluy-an kag ang mga paghinun-anon sa hulot-klasehan nga ginaaman sa mga miting sa kongregasyon. (Juan 6:45) Ang isa ka bag-uhan dapat mag-uswag dungan sa paghangop niya sa Kasulatan kag sa organisasyon. Agod matigayon ina, wala sing makatal-us sa pagtambong sa mga miting. (Heb. 10:23-25) Agdaha sia gilayon sa mga miting sa kongregasyon. Ang pila ka bag-ong mga interesado nagsugod sa pagtambong sa mga miting bisan antes pa sang regular nga pagtuon sa Biblia sa puluy-an. Sa pagkamatuod, luyag naton mismo magpakita sing nagakaigo nga halimbawa paagi sa pagtambong sing regular.—Luc. 6:40; Filip. 3:17.
11 Ihatag ang nagakaigo nga impormasyon tuhoy sa mga miting kag kon paano ini ginahimo agod mangin komportable ang estudyante sa pagtambong niya sa iya nahaunang miting. Sanglit ang iban nga mga tawo indi mahim-os kon magkadto sa bag-ong mga lugar sa nahaunang tion, ayhan mas maayo nga updan ang estudyante pakadto sa Kingdom Hall kon magtambong sia sa iya nahaunang miting. Mangin komportable sia kon kaupod mo sia samtang ginakilala niya ang mga katapo sang kongregasyon. Labaw sa tanan, mangin maayo nga tagbalay sa imo bisita, ginapabatyag sia nga ginaabiabi kag komportable.—Mat. 7:12; Filip 2:1-4.
12 Agdaha ang estudyante sa pagtambong sa pinasahi nga adlaw nga asambleya, sirkito nga asambleya, ukon distrito nga kombension sa nahaunang kahigayunan. Ayhan malakip mo sia sa inyo mga kahimusan sa transportasyon.
13 Ipatudok ang Tinagipusuon nga Apresasyon: Ang Organisado sa Pagtuman sang Aton Ministeryo, pahina 92, nagapaathag: “Kon ang imo tudok nga apresasyon sa organisasyon ni Jehova ginapabanaag sa imo pagpakighambal sa mga interesado, mas mahapos para sa ila nga magtubo sa apresasyon kag magapahulag sa ila nga maghimo sing daku pa nga pag-uswag sa pagkilala kay Jehova.” Pirme maghambal sing positibo, indi gid sing negatibo, tuhoy sa inyo lokal nga kongregasyon. (Sal. 84:10; 133:1, 3b) Sa imo mga pangamuyo sa pagtuon sa Biblia, hinambiti ang kongregasyon kag ang kinahanglanon sang estudyante nga makig-upod sing regular upod sini.—Efe. 1:15-17.
14 Luyag gid naton nga palambuon sang mga bag-uhan ang tinagipusuon nga apresasyon para sa makalilipay nga pag-inupdanay kag ang espirituwal nga kalig-unan nga masapwan sa tunga sang katawhan sang Dios. (1 Tim. 3:15; 1 Ped. 2:17; 5:9) Subong mga Saksi ni Jehova, himuon naton ang aton bug-os nga masarangan sa pagtuytoy sa mga estudyante sang Pulong sang Dios sa organisasyon sa likod sang aton ngalan.
[Kapsion sa pahina 3]
Ang mga estudyante mas madasig nga nagauswag sa espirituwal kon mahangpan nila mismo ang organisasyon
[Kapsion sa pahina 4]
Agdaha gilayon ang mga estudyante sa pagtambong sa mga miting