Buligi ang Iban sa Pagtambong sa mga Miting

¹ “Ang bisan sin-o nga abyan sa kaingod . . . nga maluyag sa pagtambong sa mga miting mainit nga ginaagda.” Sugod sang nagguwa ini nga pahibalo sa Nobiembre 1880 nga guwa sang Zion’s Watch Tower, ang mga Saksi ni Jehova malangkagon nga nagaagda sa mga tawo sa pagtipon sing tingob sa pagtuon sa Biblia. (Bug. 22:17) Isa ini ka kinahanglanon nga bahin sang matuod nga pagsimba.

² Importante Gid nga Magtambong: Ang mga pagpakamaayo nagaresulta kon makig-upod kita sa kongregasyon. Labi pa naton nga makilala ang aton dalayawon nga Dios, si Jehova. Sa kongregasyon, nagatipon kita agod ‘tudluan ni Jehova.’ (Isa. 54:13) Ginabalay sang iya organisasyon ang dalayon nga programa sang instruksion sa Biblia nga labi nga nagapasuod sa aton sa iya kag nagahatag sing praktikal nga bulig sa pag-aplikar sang “tanan nga laygay sang Dios.” (Binu. 20:​27; Luc. 12:42) Ang mga miting nagahatag sing personal nga paghanas sa kalantip sa pagtudlo sang Pulong sang Dios. Ang mga pahanumdom gikan sa Kasulatan nagabulig sa aton nga matigayon ang madinalag-on nga mga kaangtanan sa iban kag kay Jehova mismo. Ang pagpakig-upod sa mga tawo nga nagahigugma sa Dios nagapabakod sang aton pagtuo.​—⁠Roma 1:​11, 12.

³ Direkta nga Agdaha: Kutob sa nahauna nga pagtuon, agdaha ang tagsa ka estudyante sang Biblia sa mga miting. Hatagi sia sing handbill. Pukawa ang iya interes paagi sa pagsugid sing isa ka punto nga nagpalig-on sa imo gikan sa katapusan nga miting kag paagi sa pagbinagbinag sang butang nga binagbinagon sa masunod nga miting. Ilaragway kon ano ang Kingdom Hall, kag pat-ura nga natultulan niya ini.

⁴ Kon ang estudyante wala nagatambong sa gilayon, padayon sia nga agdaha. Maghinguyang sing pila ka minuto kada semana agod ipakita sa iya kon paano nagapanghikot ang aton organisasyon. Gamita ang Nagahimo sang Kabubut-on sang Dios nga brosyur kag ang video nga Jehovah’s Witnesses​—⁠The Organization Behind the Name agod mangin pamilyar sia sa aton kag sa aton mga miting. Upda ang iban nga mga manugbantala agod makilala sila sang estudyante. Sa pangamuyo, pasalamati si Jehova tungod sa organisasyon kag sambita ang kinahanglanon sang estudyante nga makig-upod sa sini.

⁵ Indi magpangalag-ag nga buligan ang bag-ong mga interesado sa pagtipon upod sa aton. Samtang ang ila apresasyon kay Jehova nagatubo, mapahulag sila nga iaplikar ang ila natun-an kag mangin bahin sang nahiusa nga organisasyon sang Dios.​—⁠1 Cor. 14:⁠25.