1997 “Pagtuo Sa Pulong Sang Dios” Nga Distrito Nga Kombension
1 Ginpahanumdom ni apostol Pablo si Timoteo nga “ang tanan nga Kasulatan gin-inspirar sang Dios.” (2 Tim. 3:16) Bangod ang Pulong sang Dios gin-inspirar, may rason gid kita nga magtuo sa sini. Ang tema sang distrito nga kombension sini nga tuig amo ang “Pagtuo sa Pulong Sang Dios.” Ang programa magapabakod sang aton pagtuo sa Biblia, nahibaluan man naton ang kamatuoran sa madamo na nga tinuig ukon bag-o pa lang nakig-angot sa organisasyon ni Jehova. Dapat kita tanan maghimo sing kahimusan nga matambungan ang bug-os nga programa.
2 Tatlo-ka-Adlaw nga Kombension: Sini nga tuig isa ka tatlo-ka-adlaw nga programa sa distrito nga kombension ang ginhimos para sa aton kaayuhan. Ang 49 ka kombension sa Pilipinas ginalista sa katapusan nga bahin sining suplemento. Nahibaluan na ninyo karon kon diin nga kombension magatambong ang inyo kongregasyon, kag dapat nga nakahimo na kamo sing pat-od nga mga plano nga tambungan ang bug-os nga tatlo ka adlaw sang programa. Nasugilanon na bala ninyo ang inyo mga amo agod tugutan kamo nga makabakasyon sa trabaho?
3 Ang programa magasugod sa Biernes kag Sabado sa alas 8:30 s.a. kag sa Domingo sa alas 9:00 s.a. Magplano sa paghalin sa balay sing temprano agod makalab-ot kamo sa lugar nga hiwatan sing kombension antes magsugod ang programa.
4 Mamati Sing Maayo: Ginpahanumdom ni apostol Pedro ang unang-siglo nga mga Cristiano nga dapat nila pamatian sing maayo ang matagnaon nga pulong subong sang isa ka suga nga nagasiga sa madulom nga duog. (2 Ped. 1:19) Matuod man ini sa aton. Ang pagkabuhi sa sining daan nga kalibutan nga kontrolado ni Satanas daw kaangay sa kon yara kita sa madulom nga duog. Nagapasalamat kita nga ginkuha kita gikan sa espirituwal nga kadudulman. (Col. 1:13; 1 Ped. 2:9; 1 Juan 5:19) Agod magpabilin sa kapawa, dapat naton huptan nga mabakod ang aton pagtuo paagi sa pagpamati sa inspirado nga Pulong ni Jehova.
5 Ayhan dapat kita manikasog agod makakonsentrar sa programa sa kombension, apang pakamaayuhon gid kita tungod sini. Dapat kita manikasog sa pagkadto sa kombension nga nakapahuway sing maayo agod mangin mapagsik kita sa tion sang mga sesyon. Maghatag sing bastante nga tion sa pagkadto sa kombension kada adlaw, agod nakalingkod na kamo antes magsugod ang programa. Nian magbuylog sa nagabukas nga ambahanon kag pangamuyo sa pagsugod sang programa kada adlaw. Ang mga hamtong dapat magpahamtang sing halimbawa, kag dapat hanason sang mga ginikanan ang ila kabataan.—Efe. 6:4.
6 Kon tan-awon naton ang mga titulo sang mga bahin antes magsugod ang programa, mapaabot naton kon ano nga mga punto ang mahimo nga ipresentar sa sina nga sesyon. Magapalambo ini sang aton interes sa materyal kon ginapresentar ini. Madugay na nga ginarekomendar nga magkuha kita sing malip-ot nga mga nota agod buligan kita nga madumduman ang pangunang mga punto sa programa. Kon magkuha kita sing tuman kadamo nga nota, ayhan mawasi naton ang pila ka importante nga mga punto bangod masako gid kita sa pagsulat.
7 Sang nagligad nga tuig madamong hamtong kag pamatan-on ang nakita liwat nga nagalakatlakat sa mga koridor, nagadayandayan sa guwa, kag nagapakigsugilanon sa iban samtang may sesyon, sa baylo nga nagapamati sa kon ano ang gin-aman sang “matutom kag mainandamon nga ulipon” para sa aton kaayuhan. Nagsaad si Jesus nga hatagan kita sing espirituwal nga pagkaon sa nagakaigo nga tion. (Mat. 24:45-47) Busa, dapat kita magtambong agod makabenepisyo gikan sa sinang pagkaon kag indi magpakita sing kakulang sing apresasyon. (2 Cor. 6:1) Natalupangdan man nga kon ang pila ka kabataan ginatak-an, masunson sila nagapangabay sa pagkadto sa kasilyas subong balibad agod makatindog kag makalagaw. Ang nagakaigo nga paghanas sa puluy-an magahimo sang masunson nga pagkadto sa kasilyas nga indi na kinahanglan. Kon kaisa, ang mga pamatan-on nagatinuparay sing pulungkuan, nga nagaistoryahanay kag nagahutikay. Ang aton mga pamatan-on, nga nagaatubang sing madamong pag-ipit karon, dapat magkonsentrar sa materyal nga ginapresentar, nga wala sing ginahimo nga iban nga butang sa tion sang programa. Ang pinamatan-on nga mga luyag nga wala nagahisanto sa mga prinsipio sang Biblia dapat likawan. (Ipaanggid ang 2 Timoteo 2:22.) Ang pagpamati sang tanan, mga hamtong man kag mga pamatan-on, magapadungog kay Jehova kag magapahalipay sa iya.
8 Kon kinahanglan nga laygayan sang isa sang mga attendant ang bisan sin-o may kaangtanan sini, dapat ini batunon subong mahigugmaon nga aman halin kay Jehova. (Gal. 6:1) Dapat dumdumon sang tanan nga ang rason nga nagapanikasog kita sa pagtambong sa kombension amo nga agod mahimo kita ‘mamati kag magtuon.’ (Deut. 31:12) Subong man, “ang maalamon nga tawo magapamati kag magakuha sing dugang nga instruksion.” (Hulu. 1:5) Sa nabilin nga tion antes kamo magtambong sa kombension, hambali subong pamilya ang kinahanglanon nga magtinuparay sing pulungkuan, nagapabilin nga nagalingkod sa tion sang programa, kag nagapamati sing maayo, agod makabenepisyo sing bug-os sa programa.
9 Pamuni nga Nagapahamuot kay Jehova: Ang katawhan ni Jehova ginatan-aw sang bug-os nga kalibutan. (1 Cor. 4:9) Kilala na kita tungod sang aton maayo nga talaksan sang pagpanapot kag pagpamustura. Bangod sang pagsunod sa Makasulatanhon nga mga prinsipio nga masapwan sa 1 Timoteo 2:9, 10 kag sa 1 Pedro 3:3, 4, ang dagway sang madamo nagbalhin sing daku kon ipaanggid sa hitsura nila sang nagsugod sila sa pagpakig-upod sa Cristianong kongregasyon. Luyag naton magbantay nga indi kita mangin kaangay sa kalibutan sa aton dagway—nagasuksok sing dikinaandan nga panapton, nagapauswag sing kalibutanon nga mga uso sang estilo sa buhok, ukon dimaugdang kon mamayo. Ang aton huwaran nga pamayo kag pamustura magabulig sa mga bag-uhan nga nagatambong sa kombension nga makita kon paano sila dapat mamuni.
10 Walay sapayan nga tuman kaayo ang kabilugan nga impresyon nga natigayon sa mga kombension sang nagligad nga tuig, ang kalibutanon nga pamayo kag pamustura isa gihapon ka problema para sa iban nga mga kauturan nga lalaki kag babayi, ilabi na sa tion sang paglingawlingaw. Mga ginikanan, bantayi ninyo sing maayo kon ano ang isuksok sang inyo mga kabataan kag mga tin-edyer. Pat-ura nga wala naton ginapabay-an ang kalibutanon nga mga estilo kag mga uso nga may malain nga epekto sa Cristianong dagway.
11 Hupti ang Maayo nga Paggawi: Ang maayo nga paggawi isa ka tanda sang matuod nga mga Cristiano. (1 Ped. 2:12) Ang aton paggawi bisan diin man kita—sa kombension, sa restawran, kag sa aton dalayunan, subong man kon nagalakbay—makahatag sing maayo nga panaksi kag mahimo nga magapahulag sa iban nga kilalahon si Jehova. (Ipaanggid ang 1 Pedro 3:1, 2.) Pribilehiyo naton nga himayaon ang Dios paagi sa aton paggawi. Kon makabati kita sing maayo nga mga report tuhoy sa aton paggawi, nagakalipay kita, indi bala? Apang, kinahanglan ang pirme nga pagbantay agod maamligan naton ang maayong reputasyon sang katawhan ni Jehova.
12 Madamo na nga pahanumdom ang ginhatag tuhoy sa pagkontrol sa aton kabataan, nga indi sila pagpabay-an nga magduludalagan sa mga kalye sa palibot sang ginahiwatan sang kombension, nga nagatublag sa iban. Bisan pa nga ang mga kombension nagahatag sa aton sing kahigayunan nga makigsugilanon kag makig-upod sa aton mga kauturan, dapat gihapon dumdumon sang mga ginikanan ang ila obligasyon nga bantayan ang ila kabataan sa tanan nga tion. Isa ini ka salabton nga ginahatag ni Jehova sa tanan nga ginikanan. (Hulu. 1:8; Efe. 6:4) Ang wala ginabantayan nga paggawi sang kabataan makaapektar sa maayong reputasyon nga ginpangabudlayan sing lakas sang iban nga mga Saksi ni Jehova nga pabakuron.—Hulu. 29:15.
13 Dumduma nga ang paghatag sing tip sa mga restawran nagakaigo kon ginaserbehan sing personal sang mga serbidor. Subong mga Saksi ni Jehova, luyag naton ipakita ang maayo nga pamatasan sa sini man nga bahin.—Tan-awa ang Awake! sang Hunyo 22, 1986, pahina 24-7.
14 Pagbayad sa mga Gastos Sang Kombension: Kita tanan may mga gastos may kaangtanan sa pagtambong sa mga kombension. May isa pa ka galastuhan nga maayo nga binagbinagon naton. Ang mga pasilidad nga ginagamit sa mga kombension mahal, ilabi na sa mas dalagku nga mga siudad. May iban pa nga mga galastuhan nga dapat bayaran. Ang aton maalwan nga boluntaryo nga mga amot sa mga kombension ginapasalamatan sing daku.—Binu. 20:35; 2 Cor. 9:7, 11, 13.
15 Pulungkuan: Ang mga panuytoy nga tinuig na nga ginhatag maaplikar gihapon, nga amo, MAHIMO LAMANG MAGTIGANA SING PULUNGKUAN PARA SA INYO MALAPIT NGA MGA KATAPO SANG PAMILYA KAG SA IBAN NGA NAGALAKBAY KAUPOD NINYO SA INYO SALAKYAN. Maayo tan-awon nga mas madamo ang nagasunod sa sining panuytoy sining ulihi nga tinuig, kag ginpauswag sini ang mahigugmaon nga atmospera sa mga kombension. Sa kalabanan nga mga duog ang pila ka pulungkuan mas madali nga matigayon sangsa iban. Magpakita palihug sing patugsiling, kag itigana ang mas kombeniente nga mga pulungkuan para sa mga tigulang ukon mga maluya.
16 Mga Kamera, Camcorder, kag Audiocassette Recorder: Ang mga kamera kag mga kasangkapan sa pagrekord mahimo magamit sa mga kombension. Apang, ang paggamit naton sini indi dapat makatublag sa iban nga nagatambong. Indi kita dapat maglakatlakat sa tion sang sesyon nga nagakuha sing retrato, kay makatublag ina sa iban nga nagatinguha sa pagkonsentrar sa programa. Wala sing bisan ano nga sahi sang kasangkapan sa pagrekord ang itakod sa mga sistema sa koryente ukon tunog, kag ini nga kagamitan indi dapat magbalabag sa mga pasilyo, alagyan, ukon sa atubangan sang iban.
17 First Aid: Ang First Aid Department para lamang sa mga emerhensia. Indi sini maatipan ang madugay na nga nagamasakit. Amo sina kon ngaa dapat ninyo binagbinagon sing abanse ang inyo kag sang inyo pamilya nga mga kinahanglanon sa panglawas. Magdala palihug sang inyo kaugalingon nga aspirin, mga bulong nga pangpatunaw, bendahe, sibit, kag kaanggid nga mga butang, kay indi ini matigayon sa kombension. Dapat handaan sang bisan sin-o nga ginakuyap ukon ginaatake, may problema sa tagipusuon, kag sang iban pa, ang ila mga kinahanglanon kon mahimo. Dapat sila magdala sing kinahanglanon nga bulong, kag ang katapo sang pamilya ukon ang kongregasyon nga nakahangop sang ila kahimtangan dapat nga kaupod nila sa tanan nga tion sa paghatag sing bisan anong kinahanglanon nga bulig. Kon ang pila nga may pinasahi nga mga kinahanglanon sa panglawas wala sing kaupod nga mga katapo sang pamilya nga makabulig sa ila, ang ila mga gulang sa kongregasyon dapat maghimo sing kinahanglanon nga mga kahimusan sa pagbulig. Wala sing pinasahi nga mga hulot para sa mga may alerdyi sa mga kombension.
18 Pagkaon sa Kombension: Bangod wala sing serbisyo sa pagkaon sa mga kombension, mas madamo ang nagatambong sa tanan nga sesyon nga nakakonsentrar sa espirituwal nga pagkaon. Madamo nga pagpabutyag sing pasalamat tungod sini nga pagpasimple ang nabaton kutob sang ginsugdan ang kahimusan. Ang tanan dapat magdala sang ila kaugalingon nga palanyagahon, subong sang ginpanugda sa suplemento sang Ang Aton Ministeryo sa Ginharian sang Mayo 1995, mga parapo 11-14. Wala sing kristal nga mga suludlan kag wala sing alkoholiko nga ilimnon ang dalhon sa pasilidad sang kombension. Ang mga cooler sang pagkaon dapat nga magamay lamang agod indi makabalabag sa mga alagyan kag indi dapat pag-itungtong sa mga pulungkuan. Ang iban nga tumalambong nakita nga nagakaon kag nagainom sa tion sang programa. Indi ini pagpakita sing pagtahod. Napanilagan na nga ginasakdag sang iban nga mga kauturan ang mga manugbaligya sa guwa sang pasilidad sang kombension sa tion sang sesyon. Indi ini nagakaigo nga batasan.
19 Ginapabaloran gid naton ang aton espirituwal nga kapiestahan kag ang matawhay, mahidaiton nga atmospera sang pag-inupdanay sa tion sang aton malip-ot nga pagpahuway sa udto. Nahisuno sa katuyuan sini nga kahimusan, sa baylo nga maglakat sa pagbakal sing palanyagahon, palihug magbalon na lang kamo. Sa sina, mas madamo ang inyo tion sa pagpakig-upod sa inyo mga kauturan nga lalaki kag babayi.
20 Pagnegosyo: Indi nagakaigo para kay bisan sin-o nga utod nga hingalitan ang daku nga kadam-an paagi sa pagbaligya sing mga butang, subong sang mga panghapin sa libro ukon T-shirt, abaniko, kag kalendaryo nga may naimprinta nga tema sang kombension. Ang lugar nga ginahiwatan sang kombension mangin isa ka daku nga Kingdom Hall nga wala sing negosyo nga dapat himuon.
21 Malipayon gid kita nga ang “Pagtuo sa Pulong Sang Dios” nga Distrito nga mga Kombension magasugod na sa dili madugay! Luyag naton tanan pat-uron nga naghimo kita sing mga plano agod tambungan ang bug-os nga programa, agod makabenepisyo kita sing bug-os sa maayong espirituwal nga bangkete nga ginhanda ni Jehova para sa aton paagi sa iya organisasyon. Sa sinang paagi ‘masangkapan kita sing bug-os para sa tagsa ka maayong buhat’ sa palaabuton nga mga adlaw.—2 Tim. 3:17.
[Kahon sa pahina 6]
Mga Pahanumdom sa Distrito nga Kombension
Dalayunan: Magapadala kami sing suplay sang Room Request nga mga porma sa tagsa ka kongregasyon sa guwa sang Metro Manila. Dapat sulatan sang mga nagakinahanglan sing dalayunan ang porma kag ihatag ini sa sekretaryo sang inyo kongregasyon. Tan-awon niya ini kag pirmahan, nian ipadala ini sa Watch Tower Convention sa isa sang mga direksion sa ubos. Disiembre 19-21, 1997 Ilagan, Isabela: c/o Zosimo G. Linda, Baculod, Ilagan, 3300 Isabela. Alaminos, Pangasinan: c/o Ferma’s Auto Supply, Alaminos, 2404 Pangasinan. Kidapawan, North Cotabato: c/o Adolfo Adriatico, P. O. Box 34, Kidapawan, 9400 North Cotabato. Cagayan de Oro City: c/o Kingdom Hall, F. Abellanosa Street, 9000 Cagayan de Oro City. Disiembre 26-28, 1997 Vigan, Ilocos Sur: c/o Kingdom Hall, 54 Quirino Boulevard, Vigan, 2700 Ilocos Sur. Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan. Lingayen, Pangasinan: c/o Rufo Macaraeg, Tonton, Lingayen, 2401 Pangasinan. Baguio City (Iloko): c/o Kingdom Hall, 28 Rimando Road, 2600 Baguio City. Binalonan, Pangasinan: c/o Manantan Technical School, Urdaneta, 2428 Pangasinan. Bayombong, Nueva Vizcaya: c/o Artemio Bunuan, Market Site, Bayombong, 3700 Nueva Vizcaya. Cabanatuan City: c/o Rogelio Cuevo, 366 Purok Rosal, Dicarma, 3100 Cabanatuan City. San Fernando, Pampanga: c/o Percasio Dizon, 850 Juliana Subdivision, San Fernando, 2000 Pampanga. Pasig City: c/o Kingdom Hall, 116 Roxas Street, Calumpang, 1800 Marikina City. Quezon City (1): P. O. Box 2044, 1060 Manila. Pasay City: c/o Kingdom Hall, 3160 Visita Street, Sta Cruz, 1200 Makati City. Batangas City: c/o Danilo Victoria, Pastor Road, 4200 Batangas City. Sta Cruz, Laguna: c/o Kingdom Hall, Highway, Bubukal, Sta Cruz, 4009 Laguna. Puerto Princesa City: c/o Kingdom Hall, Malvar Street, 5300 Puerto Princesa City. Cavite City: c/o Kingdom Hall, 487 Padre Pio Street, Caridad, 4100 Cavite City. Baybay, Leyte: c/o Kingdom Hall, M. Quezon kag M. del Pilar Streets, Baybay, 6521 Leyte. Bacolod City: c/o Kingdom Hall, Earth-Mercury Streets, Henrietta Village, 6100 Bacolod City. Roxas City: c/o Manuel B. Loyola, Sr., Kingdom Hall, Dayao, 5800 Roxas City. Dumaguete City: c/o Alexander Echon, 110-A Springville, Tubod, 6200 Dumaguete City. General Santos City: c/o Kingdom Hall, 8 Siniguelas Street, 9500 General Santos City. Tantangan, South Cotabato: c/o Liberato Supnet, New Cuyapo, Tantangan, 9510 South Cotabato. Digos, Davao Sur: c/o Kingdom Hall, Lim Extension, Digos, 8002 Davao Sur. Mati, Davao Oriental: c/o Norberto Morales, 2851 Ravelo Compound, Matiao, Mati, 8200 Davao Oriental. Tagum, Davao Norte: c/o Gil Cadeliña, 1034 Rizal Street, Tagum, 8100 Davao Norte. Tandag, Surigao Sur: c/o Toribio Bernardino, Dawis, Tandag, 8300 Surigao Sur. Zamboanga City: c/o Kingdom Hall, 541 San Jose Road, Baliwasan, 7000 Zamboanga City. Enero 2-4, 1998 Baguio City (Tagalog): c/o Kingdom Hall, 28 Rimando Road, 2600 Baguio City. Bauang, La Union: c/o Romeo Acosta, Calumbaya, Bauang, 2501 La Union. Tarlac, Tarlac: c/o Joaquin Manaloto, Aguso, Tarlac, 2300 Tarlac. Quezon City (2): P. O. Box 2044, 1060 Manila. Malolos, Bulacan: c/o Fructuoso Tan, Kingdom Hall, Masagana Homes Phase 3, Tabang 1st, Guiguinto, 3015 Bulacan. Lucena City: c/o Kingdom Hall, 1 Granja Street, 4301 Lucena City. Pili, Camarines Sur: c/o Bautista Marketing, Pili, 4418 Camarines Sur. Masbate, Masbate: c/o Yolando Alburo, 56-K Tara Street, Masbate, 5400 Masbate. San Jose, Antique: c/o Le Monde Tailoring, San Jose, 5700 Antique. Cebu City: c/o Parcon’s Machine Shop, Bagumbayan Street, 6000 Cebu City. Calbayog City: c/o Sergio Florida, Payahan, 6710 Calbayog City. Tagbilaran City: c/o Felix Acma, 55 Airport Road, 6300 Tagbilaran City. Butuan City: c/o Reynie Tumbaga, Kingdom Hall, Jose Rosales Street, 8600 Butuan City. Koronadal, South Cotabato: c/o Eugenio Ordanza, Poblacion, Surallah, 9512 South Cotabato. Cabantian, Davao City: c/o Cesar’s Portrait, City Hall Drive, San Pedro Street, 8000 Davao City. Toril, Davao City: c/o Cayetano Hormillada, 187 Agton Street, Toril, 8000 Davao City. Surigao City: c/o Alfredo Alutaya, 735 Navarro Street, 8400 Surigao City. Musuan, Bukidnon: c/o Henry Laoyan, Laoyan Compound, Valencia, 8709 Bukidnon. Ozamiz City: c/o Godofredo Lumanag, Kingdom Hall, Pingol Extension, 7200 Ozamiz City.
Bawtismo: Ang mga kandidato sa bawtismo dapat nga yara na sa ila mga pulungkuan sa gintigana nga seksion antes magsugod ang programa sa Sabado sang aga. Ang kada isa nga magapabawtismo dapat magdala sing maugdang nga bathing suit (ukon balas-on) kag tualya. Dapat pat-uron sang mga gulang sang kongregasyon nga nagarepaso sang mga pamangkot sa Aton Ministeryo nga libro upod sa mga kandidato sa bawtismo nga nahangpan sang kada isa ining mga punto. Ang bawtismo bilang simbulo sang dedikasyon isa ka suod kag personal nga butang sa ulot sang indibiduwal kag ni Jehova. Busa, indi nagakaigo para sa mga kandidato ang maghaksanay ukon mag-uyatay sing kamot samtang ginabawtismuhan. Badge Card: Isuksok palihug ang 1997 nga badge card sa tanan nga tion samtang yara sa siudad nga ginahiwatan sing kombension kag samtang nagalakbay pakadto-pakari. Ang mga badge card kag holder dapat kuhaon paagi sa inyo kongregasyon, kay indi ini matigayon sa kombension. Indi pagkalimti nga dalhon ang inyo bag-ong Advance Medical Directive/Release card. Boluntaryo nga Pag-alagad: Makapain bala kamo sing pila ka tion sa kombension agod makabulig sa isa sang mga departamento? Kon makabulig kamo, magreport palihug sa Volunteer Service Department sa kombension. Ang kabataan nga kubos sa 16 anyos ang edad mahimo man makabulig paagi sa pagpangabudlay sa idalom sang pag-atipan sang ginikanan ukon sang iban pa nga masaligan nga hamtong. Paandam: Magpabilin nga alisto sa posible nga mga problema agod malikawan ang dikinahanglanon nga kabudlayan. Sa masami ginabiktima sang mga makawat ang mga pangayaw. Pat-ura nga pirme sirado ang inyo salakyan, kag indi gid magbilin sing bisan anong makita nga butang nga magasulay sa isa sa pagpangawat. Indi maalamon nga magbilin sing malahalon nga mga butang sa inyo pulungkuan. Indi kamo makasiguro nga ang tanan sa inyo palibot isa ka Cristiano. Ngaa magdulot sing pagsulay? May nabaton nga mga report nga ginatinguhaan sang iban nga mga tagaguwa nga buyukon ang kabataan sa pagguwa. HUPTI ANG INYO KABATAAN SA LUGAR NGA PIRME NINYO MAKITA.