Ang Katutom Ginapadyaan

¹ Sa Hebreo 11:6 ginasugiran kita nga ang Dios “manugpadya sa mga nagapangita sa iya.” Ang isa ka paagi nga ginapadyaan niya ang iya debotado nga mga alagad nga nangin ‘matutom sa pila ka butang’ amo ang ‘pagtangdo sa ila sa madamong butang.’ (Mat. 25:23) Sa iban nga hambal, masunson nga ginapadyaan ni Jehova ang maayong binuhatan paagi sa paghatag sa iya matutom nga mga saksi sing dugang nga mga pribilehiyo sa pag-alagad.

² Ang katutom ni apostol Pablo ginpadyaan sang gintangdo sia sa isa ka ministeryo nga nagdul-ong sa iya sa mga siudad kag mga minuro sang Europa kag Asia Minor. (1 Tim. 1:12) Walay sapayan nga dakung panikasog ang nadalahig sa pagtuman sing bug-os sa iya ministeryo, ginpabaloran sing daku ni Pablo ang pribilehiyo nga nabaton niya. (Roma 11:​13; Col. 1:25) Ginpakita niya ang iya tinagipusuon nga apresasyon paagi sa hanuot nga pagpangita sing mga kahigayunan nga makabantala. Paagi sa iya makugi nga pagpanghikot, ginpakita niya sing maathag nga nagkabuhi sia suno sa iya pagtuo. Ang iya halimbawa nagapahulag sa aton nga pakabahandion ang aton mga pribilehiyo sa pag-alagad.

³ Si Jehova Naghatag sa Aton sing Ministeryo: Paano naton mapakita ang kaanggid nga pagtamod sa sining pribilehiyo sa pag-alagad subong sang ginpakita ni Pablo? Nagapangita kita sing mga paagi nga madugangan ang aton bahin sa ministeryo. Ginahimuslan naton ang tanan nga kahigayunan nga makapanaksi sa di-pormal nga paagi subong man sa pamalaybalay. Ginabalikan naton ang tanan nga balay nga wala sing tawo kag ginaduaw liwat ang tanan nga interesado. Kag nagahimo kita sing mga iskedyul nga makadumala sing mga pagtuon sa Biblia sa puluy-an.

⁴ Nahanungod sa aton ministeryo, si Pablo naglaygay: “Mangin hilingagawon sa sini.” (2 Tim. 4:2) Ang butang nga hilingagawon nagakinahanglan sing gilayon nga igtalupangod. Ginahimo bala naton ang aton ministeryo sa hilingagawon nga paagi, ginauna ini sa aton kabuhi? Halimbawa, indi naton luyag nga ang tion nga ihinguyang naton sa pag-alagad sa latagon pagaupangan sang aton mga paglingawlingaw kag iban pa personal nga mga paghimud-os sa talipuspusan sang semana. Sanglit kumbinsido kita nga ang katapusan sining sistema madasig na nga nagahilapit, kumbinsido man kita nga ang pagbantala sing maayong balita sang Ginharian amo ang labing importante nga hilikuton nga sarang naton mahimo.

⁵ Mapakita naton ang katutom sa Dios kon mangin matuod kag mainunungon kita sa iya kag mapinadayunon sa hilikuton nga gintangdo niya sa aton. Himuon naton sing bug-os ang aton ministeryo agod padyaan ni Jehova sing bugana ang aton katutom.