Manikasog sa Paghimo sing Kapin Pa sa Ministeryo
1 Ginpalig-on ni apostol Pablo ang mga Cristiano nga maglakat sa dalanon sang Dios kag ‘magbugana sing labi kag labi pa.’ (1 Tes. 4:1) Ano ang buot silingon sini para sa aton? Nagapahangop ini nga dapat kita magpadayon sa pagpanikasog agod mapauswag ang aton pag-alagad sa Dios, nga nagatinguha pirme sa ‘pagtuman [sing bug-os] sang aton pagpang-alagad.’—2 Tim. 4:5.
2 Motibo: Ginapauswag naton ang aton pagministeryo bangod handum naton nga alagaron ang aton Manunuga sing kapin pa. Luyag naton mag-uswag sa espirituwal kag mangita sing kahigayunan sa pagpauswag sang aton ministeryo. Ang maayong rutina kag nagakaigo nga motibo magabulig sa aton nga malab-ot ang aton mga tulumuron sa pag-alagad sa Dios.—Sal. 1:1, 2; Fil. 4:6; Heb. 10:24, 25.
3 Agod mapasangkad naton ang aton ministeryo dapat naton palambuon ang mahinatagon kag masinakripisyuhon nga panimuot. Ini nga panimuot mahimo nga mapalambo paagi sa serioso nga pagpamalandong sa maayong halimbawa ni Jesus. (Mat. 20:28) Nangin malipayon si Jesus bangod sang iya pag-alagad sa iban sa bug-os niya nga pagministeryo. (Binu. 20:35) Mailog naton si Jesus paagi sa pagpakita sing personal nga interes sa mga tawo kag mangin alisto sa mga kahigayunan sa pagpasangkad sang aton ministeryo.—Isa. 6:8.
4 Ang Papel sang mga Ginikanan: Ang handum sa pag-alagad sa iban kag ang pagpasangkad sang ministeryo mahimo nga mapatudok sa kabataan sa tion sang ila linghod nga edad. Maobserbahan sang mga kabataan ang kaukod sang iban nga miembro sang pamilya kag ang ila aktibo nga pagpakigbahin sa pagpasangkad sang ila ministeryo. Napahulag ang isa ka utod nga lalaki nga manikasog nga mag-uswag sa iya ministeryo bangod sang lamharon pa sia nagaupod sia sa iya lolo sa mga hilikuton sa kongregasyon. Bangod nakita niya ang kaukod kag kalipay sang iya lolo, napahulag sia nga magpangita sing mga kahigayunan nga mag-alagad sa iya mga utod. Isa na sia karon ka ministeryal nga alagad.
5 Kinahanglanon nga mga Utod nga Lalaki: “Kon ang bisan sin-o nagahandum sang palangakoan sang manugtatap, nagahandum sia sing maayong hilikuton.” (1 Tim. 3:1) Ini nga mga pinamulong nagapalig-on sa mga utod nga lalaki nga magpanikasog agod mangin kalipikado para sa dugang pa nga mga pribilehiyo sa pag-alagad sa organisasyon ni Jehova. Indi kinahanglan ang pinasahi nga ikasarang ukon abilidad agod matigayon ang pribilehiyo. Agod matigayon ini sang isa ka utod, dapat niya unahon ang Ginharian kag mangin makugi sa pagministeryo. (Mat. 6:33; 2 Tim. 4:5) Dapat man sia mangin maayong halimbawa sa iban.
6 Bug-os Kalibutan: Ginapadali ni Jehova ang pagpanipon. (Isa. 60:22) Busa, yadtong mga nagasunod sa halimbawa ni Jesus kag nagapanikasog nga mapasangkad ang ila ministeryo, kinahanglanon gid karon. Ang report sa bug-os kalibutan sang 2006 nga tuig sang pag-alagad nagapakita nga 248,327 ang nabawtismuhan. Ginapahangop sini nga may promedyo nga kapin sa 680 ang ginabawtismuhan kada adlaw! Kabay pa nga padayunon naton ang pagpangita sing mga kahigayunan agod mapasangkad ang aton ministeryo.