Bag-ong Programa Sang Sirkito Nga Asambleya

‘Pagdumdom Sing Maayo Sang Adlaw ni Jehova’ amo ang tema sang duha ka adlaw nga programa sang sirkito nga asambleya sugod sa Pebrero, 1998. (2 Ped. 3:12) Gindesinyo ini agod mabatyagan naton ang pagkahilingagawon. Ang mga pumuluyo sang duta pagahukman ni Jehova sa dili madugay. Sin-o ang makalampuwas sa “dakung adlaw sang Dios nga Labing Gamhanan”? Yadto lamang ang nagapabilin nga nagamata sa espirituwal kag nagakabuhi nga may “balaan nga mga buhat sang paggawi kag mga buhat sang diosnon nga debosyon.”​—⁠Bug. 16:​14; 2 Ped. 3:⁠11.

Ang bawtismo kinahanglanon agod ang isa ka tawo makalampuwas sa adlaw ni Jehova. (1 Ped. 3:21) Ang mga manugbantala nga luyag magpabawtismo sa asambleya dapat magpahibalo sa nagadumala nga manugtatap, nga magahimo sing kinahanglanon nga mga kahimusan.

Ang apat-sing-bahin nga simposium, “Ang Sahi Sang mga Tawo nga Dapat Mangin Amo Kita,” magapakita sing maathag kon anong mga buhat ang nalakip sa pagdumdom sing maayo sang presensia sang adlaw ni Jehova. Ang pamulongpulong publiko, “Magpanghikot Sing Maalamon Samtang Nagahilapit ang Adlaw ni Jehova,” magapaathag kon ano ang kahulugan sang ‘pagpangita kay Jehova, sang pagkamatarong, kag pagkahagop,’ agod maluwas.​—⁠Sof. 2:⁠3.

Ang sirkito nga asambleya magahingapos paagi sa duha ka nagapahulag nga pamulongpulong sang nagalakbay nga mga manugtatap, nga natig-uluhan: “Ang Imo Bala Kabuhi Nasentro sa Kamatuoran?” kag “Magplano Sing Abanse nga Ginadumdom ang Adlaw ni Jehova.” Ining mga diskurso magapahulag sa aton nga usisaon ang aton kabuhi kag maghimo sing kinahanglanon nga mga pagbag-o. Maathag nga ginapakita sang tagna sang Biblia kag sang mga hitabo sa kalibutan nga ang adlaw ni Jehova malapit na. Ining programa sang asambleya magapahulag sa aton nga ‘magmaligdong kag magmabinantayon.’ (1 Ped. 5:8) Maghimo na sing pat-od nga mga plano agod matambungan ang duha ka adlaw.