Dapat Kita Mangin Mga Manunudlo, Indi Mga Manugbantala Lamang
1 Natalupangdan nga “literal nga natuptupan sang mga Saksi ni Jehova ang duta paagi sa ila pagpanaksi.” Paano ini nangin posible? Indi paagi sa tawhanon nga kusog ukon gahom, kundi paagi sa espiritu sang Dios nga nagapanghikot sa iya mga alagad samtang ginagamit nila ang lainlain nga mga aman agod tumanon ang ila pagbantala kag pagpanudlo nga hilikuton.—Zac. 4:6; Binu. 1:8.
2 Ang naimprinta nga pahina isa ka epektibo nga paagi sa paghimo sang aton pagbantala nga hilikuton. Sa sulod sang mga tinuig binilyon ka libro, bukleta, brosyur, magasin, kag tract ang gin-imprinta kag ginpanagtag sang mga Saksi ni Jehova agod mabantala ang maayong balita sang Ginharian. Ginapakita sang mga report sa 1997 Yearbook nga ang nabalhag nga literatura nakalab-ot sa daku nga kataason. Sa karon, kapin sa 91 milyones (91,000,000) ka kopya sang New World Translation ang naimprinta. Sa isa ka tuig ang kadamuon sang Ingles nga Lalantawan kag Magmata! nga mga magasin nga gin-imprinta sa Estados Unidos nagdugang sing 7.1 porsiento. Sa Alemanya, ang ginbalhag nga mga magasin nagdugang sing 35 porsiento. Kapin sa un-tersia sang mga magasin nga ginbalhag didto sa Alemanya ang para sa Ruso nga latagon.
3 Ngaa tama kadamo nga literatura ang ginakinahanglan? Sa bug-os nga kalibutan, madamo ang naghulag sa pagpalig-on nga ginhatag nga magpanaksi kita sa bisan diin nga may mga tawo. Bangod mas madamo sa aton ang nagapasangkad sang aton pagpanaksi nga hilikuton—sa publiko nga mga duog, sa mga kalye, kag sa lugar sang negosyo—mas madamo nga literatura ang napahamtang sa mga tawo nga nagpakita sing interes. Madamo sa ila ang talagsa lang, kon may yara gid man, kahigayunan sang nagligad nga makabati sang mensahe sang Ginharian. Agod maatubang ini nga kinahanglanon, ang mga kongregasyon nagahupot sing lainlain nga publikasyon para magamit sa tanan nga bahin sang ministeryo.
4 Ano ang Aton Tulumuron sa Pagpanagtag Sing Literatura? Indi lamang ang pagpahamtang sing literatura ang aton tulumuron. Ang sugo nga maghimo sing mga disipulo nagalakip sing duha ka bahin—pagbantala kag pagtudlo. Una, pribilehiyo naton nga ibantala ang maayong balita sang Ginharian, nagapahibalo sa mga tawo nga amo lamang ini ang paglaum para sa katawhan. (Mat. 10:7; 24:14) Ang aton pasad-sa-Biblia nga literatura isa sang madugay na kag epektibo nga mga paagi sa pagpukaw sing interes kag sa pagpaambit sing ihibalo nahanungod sa Ginharian sa iban.
5 Ikaduha, agod makahimo kita sing mga disipulo, dapat naton itudlo ang tanan nga butang nga ginsugo ni Jesus. (Mat. 11:1; 28:19, 20) Sa liwat, ang aton literatura may importante nga papel sa pagpatudok sing kamatuoran sa tagipusuon sang mga estudyante, nagabulig sa ila nga mangin mga disipulo.
6 Yadtong nagabaton sing literatura mahimo nga ‘mga manugpamati sang pulong,’ apang mahimo nga indi sila mangin mga manugtuman sini kon pabay-an lamang sila. (Sant. 1:22-25) Diutay lamang ang mangin mga disipulo kon wala sing magatuytoy sa ila. (Binu. 8:30, 31) Kinahanglan nila ang isa ka manunudlo nga magabulig sa ila nga pamatud-an sa ila kaugalingon ang kamatuoran nga masapwan sa Kasulatan. (Binu. 17:2, 3) Ang aton tulumuron amo ang buligan sila nga mag-uswag tubtob sa punto nga magdedikar kag magpabawtismo, kag ang hanason sila nga mangin kalipikado sing nagakaigo sa pagtudlo sa iban.—2 Tim. 2:2.
7 Kinahanglan Gid ang Dugang nga mga Manunudlo: Kon nagabantala kita, ginapahayag naton ang maayong balita sing dayag. Walay sapayan, ang pagtudlo nagalakip sang paghanas sa isa sing progresibo. Samtang ang pagbantala nagapahibalo sa iban sang mensahe sang Ginharian, ang pagtudlo nagabulig sa mga indibiduwal nga batunon ang maayong balita kag magpanghikot sa sini. (Luc. 8:15) Ang isa ka manunudlo wala lamang nagabantala; nagapaathag sia, nagapangatarungan upod ang maayo nga argumento, nagahatag sing mga pamatuod, kag nagabuyok.
8 Kon mahimo mas madamo sa aton ang dapat mangin mga manunudlo, indi mga manugbantala lamang. (Heb. 5:12a) Ang pagpanagtag sing literatura isa ka importante nga bahin sang aton hilikuton, apang agod matigayon ang ikaduha nga tulumuron sang aton ministeryo, nasandig gid ini sa kon ano ang ginahimo naton subong mga manunudlo. Bisan nga malipay kita kon makapahamtang kita sing literatura, agod matuman sing bug-os ang aton ministeryo, indi naton dapat tamdon ang pagpahamtang sing literatura subong ang aton katapusan nga tulumuron. (2 Tim. 4:5) Ang pagpahamtang sing literatura isa ka epektibo nga paagi sa pagbukas sang ganhaan padulong sa mga kahigayunan nga matudlo ang kamatuoran sa iban.
9 Maghimo Sing mga Pagduaw Liwat Agod Makasugod Sing mga Pagtuon sa Biblia: Kita tanan mahimo nga nakapahamtang sing madamo nga libro, brosyur, kag magasin, nakatipon sing malaba nga listahan sang mga pagduaw liwat. Dapat kita mag-iskedyul sing regular nga tion agod makaduaw liwat sa pagpukaw sing interes. Ang aton pangunang katuyuan sa pagbalik indi lang ang pagpahamtang sing dugang pa nga literatura kundi ang pagpalig-on sa mga tawo nga basahon kag manginpulos gikan sa kon ano na ang natigayon nila. Ano ayhan ka daku nga espirituwal nga pag-uswag ang nahimo naton kon wala sing isa nga nagbalikbalik agod buligan kita nga matigayon ang sibu nga ihibalo?—Juan 17:3.
10 Tatapa ang tanan nga interesado upod ang tulumuron nga makasugod sing pagtuon sa Biblia ayhan sa brosyur nga Ano ang Ginapatuman sang Dios sa Aton? ukon sa libro nga Ang Ihibalo nga Nagadul-ong sa Kabuhi nga Walay Katapusan. Ining duha ka publikasyon nagatanyag sang mensahe sang Ginharian sa porma nga madali mahangpan. Ang Ginapatuman nga brosyur nagaunod sing kompleto nga kurso sa pagtuon, nga nagatuptop sang sadsaran nga mga panudlo sang Biblia. Ang Ihibalo nga libro nagabulig sa isa nga matudlo ang kamatuoran sing mas detalyado, apang sing simple, maathag, kag malip-ot.
11 Ining simple nga programa sang pagtudlo, suno sa ginpaathag sang suplemento sang Hunyo 1996 nga Ang Aton Ministeryo sa Ginharian, nagapahapos sang pagtudlo para sa manunudlo kag sang pagtuon para sa estudyante. Maghupot sing isa ka kopya sina nga suplemento nga madali ninyo magamit agod marepaso ang mga metodo kag mga paagi sa pagtudlo nga napamatud-an nga epektibo. Ang pila sang mga panugda nga ginahatag sini nagalakip sa kon paano magpakita sing tunay nga personal nga interes sa estudyante, kon daw ano kadamo nga materyal ang tuptupan sa isa ka sesyon, kon ano ang himuon sa mga pamangkot nga wala sing kaangtanan sa topiko, kon paano makahanda sing abanse ang manunudlo kag estudyante para sa pagtinuon, kag kon paano tuytuyan ang estudyante sa organisasyon ni Jehova. Paagi sa pagsunod sa mga panugda, mas madamo sa aton, lakip na ang mga bag-uhan, ang makadumala sing progresibo nga mga pagtuon.
12 Mga Report Tuhoy sa Maayo nga Kadalag-an Gikan sa Latagon: Ang Ginapatuman nga brosyur kag ang Ihibalo nga libro hamili nga mga bulig sa pagpadasig sang proseso sa paghimo sing mga disipulo. Sang mabaton ang Ginapatuman nga brosyur, gilayon ini nga gingamit sang isa ka utod nga lalaki sa Bolivia sa pagsugod sing pagtuon sa isa ka tawo. Apat ka bulan sang ulihi sa distrito nga kombension, ining estudyante isa sang malipayon nga mga kandidato para sa bawtismo!
13 Madamo ang napahulag sa pagdedikar sang ila kabuhi kay Jehova sang matapos nila ang pagtuon sa Ihibalo nga libro. Sa isa ka kongregasyon sa Angola, ang kadamuon sang mga pagtuon sa Biblia nga ginadumalahan sang mga manugbantala nagdugang kutob sa 190 tubtob sa 260 kag ang tumalambong sa mga miting nagdoble kutob sa 180 tubtob sa 360 sa apat ka bulan lamang pagkatapos nga ang Ihibalo nga libro ginsugdan nga gamiton sa sadto nga lugar. Wala madugay pagkatapos sadto, isa pa ka kongregasyon ang gintukod.
14 Pagkatapos sugdan ang iya nahaunang pagtuon sa Ihibalo nga libro, ang isa ka utod nga lalaki nagsiling nga ang pagdumala sa sini “simple kon ihatag lang sang konduktor ang mga pamangkot, basahon ang pila ka nagakaigo nga kasulatan, kag pat-uron nga nakahangop ang estudyante.” Walay sapayan nga naghunahuna sia anay nga kalipikado gid lang nga mga manugbantala ang makadumala sing progresibo nga mga pagtuon sa Biblia kag indi gid niya ini mahimo, narealisar niya nga masarangan niya gali ini, nga nagasiling: “Kon masarangan ko, masarangan man ini ni bisan sin-o.”
15 Paagi sa pagdumala sing mga pagtuon sa Biblia subong bahin sang aton ministeryo, matuman naton ang tulumuron nga paghimo sing mga disipulo. Nasapwan sang mga nagpalambo sing ikasarang sa pagpakigbahin sa sining bahin sang ministeryo nga ini tunay gid nga makaalayaw kag makapaladya. Kabay nga masiling sa aton nga kita man ‘nagabantala sang ginharian sang Dios . . . kag nagatudlo sang mga butang nahanungod kay Ginuong Jesucristo nga may bug-os nga kahilwayan sa paghambal.’—Binu. 28:31.