Ang Teokratikong Eskwelahan Sa Pagministro Para Sa 1998
Ang pag-eskwela nagakahulugan sing “gintudluan ukon ginhanas sa isa ka espesipiko nga ihibalo ukon ikasarang.” Paagi sa Teokratikong Eskwelahan sa Pagministro, dalayon kita nga ginahanas sa ihibalo sang Dios. Subong man, ang aton pagpakigbahin sa sining eskwelahan nagatugot sa aton nga mapalambo ang aton mga ikasarang sa paghambal kag pagtudlo. Ang programa sang eskwelahan para sa 1998 magahatag sa aton sing madamong kahigayunan sa paghimo sing dugang pa nga espirituwal nga pag-uswag.
Samtang ginausisa ninyo ang iskedyul sang eskwelahan sa masunod nga tuig, matalupangdan ninyo nga kon kaisa ang Asaynment Num. 3 ginapasad sa isa ka karakter sang Biblia suno sa masapwan sa mga tomo sang Insight. Dugang pa, ang Kalipay sa Pamilya nga libro gindugang sa kurikulum para sa 1998, kag tuptupan ini sing progresibo sang mga Asaynment Num. 3 kag Num. 4. Kon ang Asaynment Num. 4 napasad sa Kalipay sa Pamilya nga libro, ang isa ka utod nga lalaki magahatag sini subong isa ka pamulongpulong sa kongregasyon. Kag, subong pahanumdom, ang isa nga may bahin sa programa sang eskwelahan indi dapat magsobra sa gintalana nga oras.
Bag-o nga Bahin: Para sa aton personal nga kaayuhan, ang “Suplemento nga Iskedyul sa Pagbasa sa Biblia” makita nga may bracket pagkatapos sang numero sang ambahanon para sa kada semana. Walay sapayan nga ang semanal nga programa sang eskwelahan wala napasad sa sini, himua nga tulumuron nga sundon ini. Magabulig ini sa imo nga mangin batasan ang pagbasa sang Biblia adlaw-adlaw kon wala mo pa ini ginahimo.
Para sa dugang nga impormasyon nahanungod sa mga asaynment, laygay, kag nasulat nga mga repaso, basaha palihug sing maayo ang mga instruksion nga masapwan sa “Iskedyul Sang Teokratikong Eskwelahan sa Pagministro Para sa 1998,” subong man ang pahina 3 sang Oktubre 1996 nga Ang Aton Ministeryo sa Ginharian.
Kon wala pa ikaw makapalista sa Teokratikong Eskwelahan sa Pagministro, ginaagda namon kamo nga magpalista na karon. Ining pinasahi nga eskwelahan padayon nga may importante nga papel sa paghanas sa mapainubuson kag debotado nga mga alagad ni Jehova nga mangin mas kalipikado subong mga ministro niya.—1 Tim. 4:13-16.