Pagpanaksi Paagi sa Maayo nga Paggawi
1 Sa matinuguton nga katilingban karon, madamong pamatan-on ang mapinatumbayaon nga nagapatuyang sang ila kabuhi sa droga, imoralidad, pagrebelde, kag kasingki. Sa kabaliskaran, ang huwaran nga paggawi sang mabuot nga mga pamatan-on sa Cristianong kongregasyon makaparepresko tan-awon kag isa gid ka matahom nga butang kay Jehova. Isa ini ka makusog nga panaksi nga mahimo makaganyat sa iban sa kamatuoran.—1 Ped. 2:12.
2 Ginapakita sang madamong eksperiensia nga ang maayong paggawi sang Cristianong mga pamatan-on may positibo nga epekto sa mga tagpanilag. Nagahambal tuhoy sa isa ka lamharon nga Saksi nga estudyante niya, isa ka maestra ang nagsugid sa bug-os nga klase nga si Jehova, ang Dios sining bata nga babayi, amo ang matuod nga Dios. Nasiling niya ini bangod sang matinahuron pirme nga paggawi sang bata. Isa pa ka manunudlo ang nagsulat sa Sosiedad, nga nagasiling: “Luyag ko kamo hatagan sing komendasyon tungod sa inyo mabuot nga mga pamatan-on sa inyo relihion. . . . Ang inyo mga pamatan-on mga huwaran gid. Ginarespeto nila ang mga magulang sa ila, matinahuron sila, kag maugdang mamayo. Kag nahibaluan gid nila ang ila mga Biblia! Amo gid sina dapat ang relihion!”
3 Isa pa ka maestra ang nagdayaw sa maayong paggawi sang siete-anyos nga Saksi sa iya klase. Naganyat sia sa malulo kag maayo nga personalidad sang bata nga lalaki, nga naghimo sa iya nga tuhay gid sa iban nga mga bata nga lalaki. Nagdayaw gid sia sa iya serioso nga panimuot sa iya relihioso nga mga pagtuluuhan—wala sia mahuya nga mangin tuhay bangod sang iya ginapatihan. Nakita niya nga ang iya konsiensia nahanas kag sarang niya “makilala ang husto kag sayop.” (Heb. 5:14) Sang ulihi, ginduaw sang iloy sang bata ang maestra, kag nasugdan ang isa ka pagtuon sa Biblia. Sang ulihi, ang maestra nabawtismuhan kag nagregular payunir!
4 Isa ka pamatan-on nga lalaki ang nabuyok bangod sang maayong paggawi sang isa ka Saksi sa iya eskwelahan. Tuhay gid sia—tuman ka matinahuron, palatuon, kag pirme maugdang sa iya pamayo; subong man, indi kaangay sa iban nga mga babayi, wala gid sia nagakiat sa mga lalaki. Nakita niya nga nagakabuhi sia suno sa mga prinsipio sang Biblia. Ginpamangkot sia sang pamatan-on tuhoy sa iya relihioso nga mga pagtuluuhan kag nagdayaw sia sa nahibaluan sang bata nga babayi. Nagtuon sia, nabawtismuhan sa wala madugay, kag sang ulihi nagpayunir kag nag-alagad sa Bethel.
5 Kon ikaw isa ka lamharon nga Cristiano nga maluyag sa paghatag sing maayo nga panaksi sa iban, bantayi ang imo paggawi sa tanan nga paagi. Indi gid magpabayabaya paagi sa pag-ugyon sa matinuguton nga mga panimuot, pagtamod, ukon estilo sang pagkabuhi sang kalibutan. Magpahamtang sing mataas nga halimbawa sa imo panghambal, pamayo, kag pamustura, indi lamang samtang nagapakigbahin sa ministeryo sa latagon kag sa mga miting sa kongregasyon kundi man samtang sa eskwelahan kag nagalingawlingaw. (1 Tim. 4:12) May matuod gid ikaw nga kalipay kon may magpakita sing interes sa kamatuoran bangod ‘ginapaiwag mo ang imo kapawa’ paagi sa imo maayo nga paggawi.—Mat. 5:16.