Mga Pamatan-on nga Nagasiga Subong mga Sulu
1. Paano ginapakita sang Biblia nga talalupangdon gid ang mga Cristiano, kag paano ina nga mga pulong maaplikar sa Cristianong mga pamatan-on karon?
1 Ginsugiran ni Jesus ang iya mga disipulo: “Kamo ang kapawa sang kalibutan.” (Mat. 5:14, 16) Kaangay sang isa ka siudad nga nahamtang sa ibabaw sang bukid, nga nagabadlak sa silak sang adlaw, mangin talalupangdon gid sila. Madamong Cristianong pamatan-on karon ang ‘nagasiga subong nga mga sulu sa kalibutan’ paagi sa ila matarong nga paggawi kag makugi nga pagbantala.—Fil. 2:15; Mal. 3:18.
2. Ano ang pila ka paagi nga makapanaksi kamo sa inyo mga manunudlo kag mga klasmeyt?
2 Sa Eskwelahan: Paano ka makapanaksi sa eskwelahan? Ang iban nga mga pamatan-on nagakalit sa mga paghinun-anon sa klase tuhoy sa droga, ebolusyon, kag terorismo—sa pagsambit sang pila. Ang isa ka utod nga babayi naggamit sang naasayn sa iya nga salaysay tuhoy sa terorismo sa pagpanaksi tuhoy sa Ginharian sang Dios subong amo ang matuod nga paglaum sang katawhan. Nalipay gid ang maestra sa sining nahanda sing maayo nga report, kag nagbukas ini sing dugang pa nga pagpanaksi.
3. Paano ninyo mapasiga ang inyo kapawa sa eskwelahan paagi sa inyo paggawi?
3 Ang isa pa ka paagi nga magasiga kamo subong sulu amo ang inyo paggawi kag maugdang nga pamayo kag pamustura. (1 Cor. 4:9; 1 Tim. 2:9) Kon makita sang mga estudyante kag mga manunudlo nga maayo ang inyo paggawi, ang pila mahimo maganyat sa kamatuoran bangod sini kag nagahatag ini sa inyo sang kahigayunan nga makapaambit sang mga kamatuoran sa Biblia. (1 Ped. 2:12; 3:1, 2) Ang pagpakita sang diosnon nga paggawi mahimo indi mahapos, apang pakamaayuhon kamo sing bugana ni Jehova. (1 Ped. 3:16, 17; 4:14) Agod mapukaw ang ila interes sa maayong balita, mahimo kamo magbasa sing mga literatura sa Biblia kon tigpalahuway ukon ibutang ini sa duog nga madali makita sang iban.
4. Ano ang pila ka kaayuhan sa pagpanaksi sa eskwelahan?
4 Ang pagpasiga sang inyo kapawa sa eskwelahan magapalig-on sang inyo pagtuo kag magabulig sa inyo nga mapabugal ang pag-alagad kay Jehova. (Jer. 9:24) Pangamlig man ini. Ang isa ka utod nga babayi nagsiling, “Ang isa ka kaayuhan tuhoy sa pagsugid sang akon mga pagpati amo nga ang mga estudyante wala na nagaipit sa akon sa paghimo sang mga butang nga supak sa Biblia.”
5. (a) Paano ginpasangkad sang pila ka pamatan-on ang ila ministeryo? (b) Ano ang inyo espirituwal nga mga tulumuron?
5 Pagpasangkad Sang Pag-alagad: Ang isa pa ka paagi nga ang mga pamatan-on magasiga subong mga sulu amo ang pagpasangkad sang ila ministeryo. Pagkagradwar sa hayskul, ang isa ka utod nga lalaki nagsaylo kon diin mas kinahanglanon ang mga manugbantala sang Ginharian. Miembro sia sang gamay nga kongregasyon nga may isa lang ka gulang. “Nalipay gid ako sa akon kabuhi diri,” sulat niya sa iya abyan. “Makapapagsik gid ang ministeryo! Makapakigsugilanon kami sa tagsa ka balay sing mga 20 minutos bangod luyag pamatian sang mga tawo ang tanan mo nga inugsiling sa ila.” Nagdugang pa sia: “Kuntani amo man sini ang himuon sang tanan nga pamatan-on agod mabatyagan man nila ang akon kalipay. Wala na sing mas maayo pa sangsa bug-os nga alagdon si Jehova.”
6. Ngaa ginapabugal gid ninyo ang mga pamatan-on sa inyo kongregasyon?
6 Ginapabugal gid namon kamo nga mga pamatan-on nga nagasiga subong mga sulu sa kalibutan! (1 Tes. 2:20) Samtang ginaalagad ninyo si Jehova sing bug-os tagipusuon, kalag, hunahuna, kag kusog, magaani kamo sing “isa ka gatos ka pilo karon sa sining panag-on sang tion . . . kag sa nagapakari nga sistema sang mga butang sing kabuhi nga walay katapusan.”—Mar. 10:29, 30; 12:30.