Isa ka Gatos ka Libo!

Amo ina ang kadamuon sang mga pagtuon sa Biblia nga luyag naton makita nga ireport sa Pilipinas para sa bulan sang Agosto 1998. Posible bala naton ini malab-ot? Huo! Sadtong Pebrero kag Abril, 1994 nagreport kita sing kapin sa 100,000 ka pagtuon. Sadto nga tion, may yara lamang kapin sa 118,000 ka manugbantala sa latagon. Karon may yara kita kapin sa 126,000 ka manugbantala, apang ang aton pagtuon sa Biblia sini nga tuig sang pag-alagad nagapromedyo lamang sing 78,807. Matuod, madamo sang aton anay mga ginatun-an ang bawtismado na karon kag busa indi na sarang maisip, apang ginalauman nga padayon nga masugdan ang bag-ong mga pagtuon sa pagbulos sa ila. Ngaa indi manikasog sing daku nga makasugod sing bag-ong pagtuon sa Biblia sini nga bulan nga sarang mareport sa Agosto? Tilawi nga gamiton ang simple nga panugda tuhoy sa pagsugod sing pagtuon sa una nga pagduaw sa Ginapatuman nga brosyur nga masapwan sa parapo 5 sang artikulo sa pahina 8 sining Ang Aton Ministeryo sa Ginharian. Kon ang tanan sa kapin sa 16,000 ka regular payunir subong man mga manugbantala sang kongregasyon manikasog sing daku nga makasugod sing bag-ong pagtuon nga mareport sa Agosto, indi mabudlay lab-uton ang aton tulumuron nga 100,000 ka pagtuon. Mangin isa gid ina ka singgit sang pagdayaw kay Jehova!​—⁠Sal. 47:⁠1.