Malab-ot Bala Naton ang Aton Tulumuron Sini nga Bulan?

¹ Sadtong Pebrero kag Abril, 1994, ang sanga sang Pilipinas nagreport sing kapin sa 100,000 ka pagtuon sa Biblia. Ginpanugda anay sa Hulyo 1998 nga Ang Aton Ministeryo sa Ginharian nga himuon naton nga aton tulumuron sa Agosto nga malab-ot liwat ini nga kadamuon. Ano ang himuon naton subong indibiduwal agod malab-ot ini nga tulumuron?

² Batuna ang Hangkat: Sa madamong kongregasyon, kapin sa katunga sang mga manugbantala ang wala nagadumala sing tayuyon nga pagtuon sa Biblia. Kon ikaw isa sa ila, ginapalig-on namon nga himuon mo nga isa ka pinasahi nga tulumuron sini nga bulan ang makasugod sing isa ka pagtuon sa Biblia. Kon makasugod ka sing pagtuon sa nahauna nga semana sang Agosto, dayon kon mapadayon ini sing duha pa ka beses pagkatapos sina, sarang ini mareport sa katapusan sang Agosto subong bag-ong pagtuon sa Biblia.​—⁠Tan-awa ang “Pamangkot” sa pahina 7.

³ Kon nagapakigbahin ka sa ministeryo, ayhan sa hilikuton sa dalan, dipormal nga pagpanaksi, ukon regular nga pamalaybalay nga hilikuton, magtanyag sing pagtuon sang Biblia sa puluy-an. Sarang mo ini mahimo sa imo mismo introduksion. Magabulig man ini sa mga tawo nga mahangpan nga indi kita “mga manuglibod sang pulong sang Dios,” ukon interesado lamang sa pagpahamtang sing mga magasin, kundi nagapangita sa mga handa magtuon tuhoy sa mga ginapatuman sang Dios. (2 Cor. 2:17) Ang brosyur nga Ginapatuman isa ka maayo gid nga paagi sa pagtanyag sing 16-ka-semana nga kurso sa Biblia.​—⁠Tan-awa Ang Aton Ministeryo sa Ginharian, Hulyo 1998, pahina 8.

⁴ Sa masami ang mga pagtuon sarang masugdan upod sa imo mga kakilala, subong sang mga katapo sang pamilya, himata, kaupod sa trabaho, kabutho, mga tawo sa tiangge ukon tiendahan nga masunson mo ginapakig-angutan. Ngaa indi ka maghimo sing isa ka listahan sang posible matanyagan sing pagtuon kag nian tan-awa kon bala batunon sang isa sa ila ang pagtuon sa Biblia?

⁵ Pagtuon sa Biblia Sang Pamilya: Ginareport nga madamong padre-de-pamilya ang wala nagadumala sing tayuyon nga pagtuon sang pamilya, ukon, kon nagadumala gid man sila, masunson nga wala nila ini ginareport bisan pa may yara dibawtismado nga katapo sang pamilya nga nagatambong. Kon ikaw isa ka padre-de-pamilya nga nagpatumbaya sa sining bahin sang hilikuton sa pagtuon sa Biblia, amo na ini ang maayo nga tion nga matadlong ini paagi sa pagsugod kag pagreport sang pagtuon sang imo pamilya.

⁶ Dugang pa, ginapalig-on namon ang mga nagadumala na sing mga pagtuon, subong sang mga payunir, nga tinguhaan nga makasugod sing isa ka bag-o nga pagtuon sa Agosto. Kon himuon ini sang tagsa ka payunir, madali naton malab-ot ang kapin sa 100,000 ka pagtuon sini nga bulan. Gani mangabudlay kita tanan sing lakas nga malab-ot ang aton tulumuron sini nga bulan kag nian padayon nga buligan yadtong ginatun-an naton sa pag-uswag padulong sa dedikasyon.