Progresibo nga Pagbinagbinag sa Hilingagawon nga Hilikuton Sang Paghimo Sing mga Disipulo

¹ Antes magbiya sa duta, ginsugo ni Jesus ang iya mga sumulunod nga “maghimo sing mga disipulo sa mga tawo sang tanan nga kapungsuran.” Nagakinahanglan ini nga magahimo sila sing maid-id nga pagbantala kag pagtudlo kag sa pagpasangkad sang ila hilikuton sa bug-os napuy-an nga duta. (Mat. 28:​19, 20; Binu. 1:8) Ginkabig bala nila ini nga sugo subong isa ka lulan​—⁠nga tuman kabudlay pas-anon? Indi suno kay apostol Juan. Pagkatapos makahinguyang sing 65 ka tuig subong manughimo sing disipulo, sia nagsulat: “Amo ini ang kahulugan sang gugma sang Dios, nga sundon naton ang iya mga sugo; apang ang iya mga sugo indi makapabug-at.”​—⁠1 Juan 5:⁠3.

² Ang Makasulatanhon nga rekord sang hilikuton sang unang mga Cristiano nagapamatuod nga ginpangabudlayan nila nga may pagkahilingagawon ang ila hilikuton nga paghimo sing mga disipulo ni Jesucristo. (2 Tim. 4:​1, 2) Ginhimo nila ini, indi lamang subong katungdanan, kundi bangod sang ila mahigugmaon nga handum nga dayawon ang Dios kag dalhon ang paglaum nga kaluwasan sa iban. (Binu. 13:​47-49) Bangod ang tanan nga nangin mga disipulo nangin mga manughimo man sing disipulo pagkatapos sadto, ang Cristianong kongregasyon madasig nga nag-uswag sadtong nahaunang siglo.​—⁠Binu. 5:​14; 6:​7; 16:⁠5.

³ Ang Hilikuton sa Paghimo Sing Disipulo Nagadasig: Ang pinakadaku nga hilikuton sa paghimo sing disipulo sa tanan nga tion ginahimo sa sining ika-20 nga siglo! Sa karon, minilyon ka tawo na ang nagbaton sa maayong balita kag naghulag sa sini. (Luc. 8:15) Sanglit ang tion madasig nga nagakaubos para sa karon nga sistema sang mga butang, “ang matutom kag mainandamon nga ulipon” nag-aman sa aton sing mga kasangkapan nga nagapaposible agod madasig nga matun-an sang bunayag sing tagipusuon nga mga tawo ang kamatuoran.​—⁠Mat. 24:⁠45.

⁴ Sang 1995 nabaton naton ang libro nga Ang Ihibalo nga Nagadul-ong sa Kabuhi nga Walay Katapusan, kag sang 1996 ginsundan ini sang brosyur nga Ano ang Ginapatuman sang Dios sa Aton? Nahanungod sa Ihibalo nga libro, ang Enero 15, 1996, nga guwa sang Ang Lalantawan, pahina 14, nagsiling: “Ining 192-pahina nga libro sarang matun-an sa malip-ot lamang nga tion, kag yadtong ‘ginatangdo sing husto para sa kabuhi nga walay katapusan’ makatuon sing bastante sa kalalangan sang pagtuon sini agod makadedikar kay Jehova kag makapabawtismo.”​—⁠Binu. 13:⁠48.

⁵ Ang suplemento sang Hunyo 1996 nga Ang Aton Ministeryo sa Ginharian, “Kon Paano Maghimo sing mga Disipulo Paagi sa Ihibalo nga Libro,” naghatag sa aton sini nga tulumuron: “Depende sa sirkunstansia kag ikasarang sang estudyante, ayhan posible para sa imo nga tuptupan ang kalabanan nga mga kapitulo sa isa ka sesyon sa isa ka oras ukon kapin, nga wala ginadali ang pagtuon. Ang mga estudyante magauswag sing maayo pa kon ginasunod sang manunudlo kag sang estudyante ang ila iskedyul sang pagtuon kada semana.” Ang artikulo nagpadayon sa pagsiling: “Ginapaabot nga sa tion nga matapos na sang isa ang pagtuon sa Ihibalo nga libro, ang iya sinseridad kag hanuot nga interes sa pag-alagad sa Dios makita.” Ang “Pamangkot” sa Oktubre 1996 nga Ang Aton Ministeryo sa Ginharian nagpaathag: “Ginapaabot nga sa sulod sang halos malip-ot nga tion, mabuligan sang isa ka epektibo nga manunudlo ang hanuot nga estudyante sa pagtigayon sing bastante nga ihibalo agod makadesisyon sing intelihente sa pag-alagad kay Jehova.”

⁶ Ang Ihibalo nga Libro May mga Resulta: Sang ginbawtismuhan ang isa ka lamharon nga babayi, ginsaysay niya ang iya balatyagon tuhoy sa pagtuon sa Ihibalo nga libro. Sa pila ka tion, nagtuon sia anay sa Mabuhi sing Dayon nga libro. Sang ang Ihibalo nga libro ginpaguwa, ang utod nga babayi nga nagadumala sing pagtuon sa iya nagsaylo sa bag-ong libro. Nakita sa gilayon sang estudyante nga nagkinahanglan ini nga dapat sia magdesisyon, kag napahulag sia nga mag-uswag sing madasig kutob sadto nga tion. Ang lamharon nga babayi, nga karon utod na naton, nagsiling: “Ang Mabuhi sing Dayon nga libro nagbulig sa akon nga higugmaon si Jehova, apang ang Ihibalo nga libro nagbulig sa akon nga magdesisyon nga alagaran si Jehova.”

⁷ Binagbinaga kon daw ano kadasig natun-an sang isa pa ka babayi ang kamatuoran. Pagkatapos sang iya ikaduha nga pagtuon, nagtambong sia sa miting sa Kingdom Hall sa tion sang pagduaw sang manugtatap sang sirkito. Sadto nga semana, sa iya ikatlo nga pagtuon, ginsugiran niya sia nga nagdedikar na sia kay Jehova kag luyag niya nga mangin dibawtismado nga manugbantala. Nakigsapol sia sa mga gulang, nga nag-aprobar sa iya subong manugbantala, kag pagkadason nga semana nagsugod sia sa pag-alagad sa latagon. Nangin interesado gid sia sa iya pagtuon sa Biblia nga nagbakasyon sia gikan sa iya trabaho agod magtuon sing duha ukon tatlo ka beses sa isa ka semana kag maghinguyang sing mas madamo nga tion sa ministeryo. Kon kaisa, duha ukon tatlo ka kapitulo ang ginatuptupan nila sa kada sesyon. Ginsugdan niya nga iaplikar ang iya natun-an sa tanan nga bahin sang iya kabuhi, natapos ang Ihibalo nga libro sa apat ka semana, kag nag-uswag padulong sa bawtismo!

⁸ Ginlaragway sang bana sang isa ka utod nga babayi ang iya kaugalingon subong “isa [anay] ka tipiko nga ditumuluo nga tiayon.” Isa ka adlaw, gintanyagan sia sing pagtuon sa Biblia sang isa ka utod nga lalaki sa Ihibalo nga libro sa kondisyon nga mahimo sia makauntat pagkatapos sang nahauna nga pagtuon ukon bisan san-o pagkatapos sina. Ang bana nagpasugot nga tilawan ini, walay sapayan nga indi sia maayo nga estudyante sang bata pa sia kag wala pa gid makatuon sing bisan ano nga sahi sang relihioso nga literatura sa sulod sang kapin sa 20 ka tuig. Ano ang reaksion niya sa pagtuon sa Ihibalo nga libro? Sia nagsiling: “Makalilipay gid mahibaluan nga ining bulig sa Biblia ginsulat sing tuman ka simple. Ang impormasyon ginpresentar sing tuman kaathag kag makatarunganon amo nga wala magdugay, may kalangkag ko na nga ginahulat ang amon masunod nga pagtuon. Malantipon nga ginsunod sang nagtudlo sa akon ang mga metodo sa paghimo sing disipulo nga ginbalay sang Sosiedad, kag sa bulig sang espiritu ni Jehova, nabawtismuhan ako apat ka bulan sang ulihi. Makasiling gid ako nga kon ginapalambo naton ang gugma sa paghimo sing mga disipulo, padayon nga ginapangita ang mga matarong sing tagipusuon sa ministeryo sa latagon, ginagamit ang Ihibalo nga libro kag ang iban pa nga mga bulig sa Biblia nga ginaaman sang Sosiedad kag, sing labi pa ka importante, ginapangayo ang panuytoy ni Jehova paagi sa pangamuyo, matigayon naton ang espesyal gid nga pribilehiyo nga makabulig sa paghimo sing mga disipulo.” Ang nasambit sa ibabaw tumalagsahon gid nga mga eksperiensia. Ang kalabanan sa aton mga estudyante wala magsulod sa kamatuoran sing subong sini kadasig.

⁹ Ang mga Estudyante Nagauswag sa Lainlain nga Kadasigon: Dapat batunon nga ang mga ikasarang sang mga manunudlo kag mga estudyante sang Pulong sang Dios nagalainlain sing daku. Ang espirituwal nga pagtubo mahimo mangin mahinay ukon madasig. Ang iban nga mga estudyante nagauswag sing mas madasig sangsa iban. Ang kadasigon sang espirituwal nga pag-uswag sang isa ka tawo mahimo nga apektado sang iya tinun-an, sang kadakuon sang iya apresasyon sa espirituwal nga mga butang, kag sang pagkatudok sang iya debosyon kay Jehova. Indi tanan nga ginatun-an naton may “mas dungganon sing panghunahuna” nga tun-an ang Kasulatan adlaw-adlaw, subong sang ginhimo sang dumaan nga taga-Berea nga nangin mga tumuluo.​—⁠Binu. 17:​11, 12.

¹⁰ Amo sina kon ngaa ang suplemento sang Abril 1998 nga Ang Aton Ministeryo sa Ginharian, “Kinahanglan​—⁠Dugang Pa nga mga Pagtuon sa Biblia,” nagahatag sining matinuuron nga direksion: “Sa pagkamatuod, indi palareho ang pag-uswag sang kada estudyante sa Biblia. Ang iban indi subong ka mahuyugon sa espirituwal sangsa iban ukon subong kaabtik sa paghangop sa mga butang nga ginatudlo. Ang iban tuman kasako kag mahimo nga indi makahinguyang sing tion nga kinahanglanon agod matuptupan ang bug-os nga kapitulo kada semana. Busa, sa pila ka hitabo ayhan kinahanglan ang kapin sa isa ka sesyon agod matuptupan ang pila ka kapitulo kag dugang pa nga binulan agod matapos ang libro.”

¹¹ Ginahuptan Sang mga Nagahimo Sing Disipulo ang Timbang nga Pagtamod: Kinahanglan tulutimbangon ang kadasigon sang pagtuon suno sa mga sirkunstansia kag ikasarang sang estudyante. Sanglit ginapalig-on kita sa pagsugod sing mga pagtuon sa Ginapatuman nga brosyur, ayhan duha ukon tatlo ka bulan ang kinahanglan agod matuptupan ini antes magsaylo sa Ihibalo nga libro. Kon sundon naton ang tanan nga panugda nga ginbalay sa suplemento sang Hunyo 1996 nga Ang Aton Ministeryo sa Ginharian, mahimo ini magakinahanglan sing anom ukon siam pa ka bulan agod matapos ang Ihibalo nga libro. Ang iban nga bag-o pa lang nakasugod sing pagtuon sa Ihibalo nga libro nagsaylo sa Ginapatuman nga brosyur agod buligan ang estudyante nga matun-an sing mas madasig ang sadsaran nga mga kamatuoran sa Biblia. Pagkatapos sina ang pagtuon sa Ihibalo nga libro ginpadayon. Kon nasugdan na ang pagtuon sa Ihibalo nga libro kag maayo ang pag-uswag, ayhan mas maayo nga tun-an ang Ginapatuman nga brosyur pagkatapos sang libro, sa amo ginarepaso sing madasig ang sadsaran nga mga kamatuoran sang Pulong sang Dios. Ano man ang kahimtangan, indi naton luyag punggan ang estudyante sa pagtigayon sing sibu nga ihibalo agod lamang matapos sing madasig ang libro. Ang kada estudyante nagakinahanglan sing malig-on nga sadsaran para sa sining bag-ong natukiban nga pagtuo sa Pulong sang Dios.

¹² Bangod nakahibalo kita kon diin na kita sa lakat sang panahon, mas hilingagawon karon sangsa nagligad nga buligan ang iban sa pagtuon sing kamatuoran. Luwas sa padayon nga pagpangamuyo nga makasugod sing bag-ong mga pagtuon sa Biblia, ipangamuyo naton yadtong nagatuon na upod sa aton. Nian malipay kita nga padayon nga bawtismuhan ang dugang pa nga mga disipulo “sa tanan nga adlaw tubtob sa katapusan sang sistema sang mga butang.”​—⁠Mat. 28:⁠20.