“Paano Ko Bala . . . Luwas Kon May Isa nga Magtuytoy sa Akon?”
1 Sang ginpamangkot sang ebanghelisador nga si Felipe ang Etiopiahanon nga eunuco kon nahangpan niya ang ginabasa niya gikan sa Pulong sang Dios, ang lalaki nagsabat: “Tunay, paano ko bala ini mahimo, luwas kon may isa nga magtuytoy sa akon?” Si Felipe malipayon nga nagbulig sa iya nga mahangpan ang maayong balita tuhoy kay Jesus, nga nagresulta sa gilayon nga pagpabawtismo sang lalaki. (Binu. 8:26-38) Gintuman ni Felipe ang sugo ni Cristo nga ‘maghimo sing mga disipulo sa mga tawo sa tanan nga kapungsuran, nagabawtismo sa ila kag nagatudlo sa ila.’—Mat. 28:19, 20.
2 Dapat naton tumanon ang sugo nga maghimo sing mga disipulo, subong sang ginhimo ni Felipe. Apang, ang madasig nga espirituwal nga pag-uswag sang Etiopiahanon nga eunuco masunson nga indi naton makita sa mga tawo nga ginatun-an naton sa Biblia. Yadto nga lalaki, nga isa ka Judiyong proselita nga sampaton sa Kasulatan, may mabinatunon nga tagipusuon kag kinahanglan na lamang niya nga batunon si Jesus subong ang ginsaad nga Mesias. Makahalangkat gid kon ang ginatun-an naton wala sing nahibaluan sa Biblia, ginpatalang sang mga panudlo sang butig nga relihion, ukon ginapabug-atan sang mabudlay nga personal nga mga problema. Ano ang magabulig sa aton agod magmadinalag-on sa pagtuytoy sa mga estudyante sang Biblia padulong sa dedikasyon kag bawtismo?
3 Hantupa ang Espirituwal nga mga Kinahanglanon sang Estudyante sang Biblia: Ginbinagbinag sang suplemento sang Agosto 1998 nga Ang Aton Ministeryo sa Ginharian ang kalawigon sang tion nga mahimo kita magtuon sa mga tawo, nga nagagamit sing Ginapatuman nga brosyur kag sing Ihibalo nga libro. Naghatag ini sini nga panuytoy: “Kinahanglan pasibuon ang kadasigon sang pagtuon suno sa mga sirkunstansia kag ikasarang sang estudyante. . . . Indi naton luyag punggan ang estudyante sa pagtigayon sing maathag nga paghangop agod lamang matapos sing madasig ang libro. Ang kada estudyante nagakinahanglan sing malig-on nga sadsaran para sa iya bag-ong natukiban nga pagtuo sa Pulong sang Dios.” Gani, nagakaigo nga indi pagdalion nga tuptupan ang materyal sa Ihibalo nga libro sa panikasog nga tapuson ang libro sa sulod sang anom ka bulan. Mahimo nga kapin sa anom ka bulan ang ginakinahanglan agod mabuligan ang pila ka indibiduwal nga mag-uswag padulong sa bawtismo. Samtang ginadumalahan ninyo ang pagtuon kada semana, gamita ang ano man nga tion nga kinahanglanon agod buligan ang estudyante nga mahangpan kag batunon nga ang iya ginatun-an naghalin sa Pulong sang Dios. Sa pila ka hitabo, mahimo nga duha tubtob tatlo ka semana ang ginakinahanglan agod matuptupan ang isa ka kapitulo sa Ihibalo nga libro. Magahatag ini sing tion agod mabasa kag mapaathag ang madamo sang ginsambit nga mga kasulatan.—Roma 12:2.
4 Apang, ano abi kon sa tapos matun-an ang Ihibalo nga libro, nahantop mo nga ang paghangop sang estudyante sa kamatuoran kinahanglan pa nga pauswagon ukon nga wala pa sia mapahulag sing bug-os sa pagtindog para sa kamatuoran kag sa pagdedikar sang iya kabuhi sa Dios? (1 Cor. 14:20) Ano pa ang imo himuon agod tuytuyan sia sa dalan nga nagadul-ong sa kabuhi?—Mat. 7:14.
5 Busga ang Espirituwal nga mga Kinahanglanon sang Estudyante sang Biblia: Kon maathag gid nga ang estudyante nagauswag, bisan pa sing mahinay, kag ginapalambo niya ang apresasyon sa natun-an niya, nian padayuna ang pagtuon sa Biblia sa ikaduha nga libro pagkatapos sang Ginapatuman nga brosyur kag sang Ihibalo nga libro. Mahimo nga indi ini kinahanglanon sa tanan nga kahimtangan, apang kon kinahanglanon, padayuna ang pagtuon sa True Peace nga libro, sa Nahiusa sa Pagsimba nga libro, ukon sa God’s Word nga libro. Ang kalabanan nga mga manugbantala may personal nga kopya sining mga libro nga magamit kon ang kongregasyon wala sing suplay. Kon kinahanglanon ini nga mga libro mahimo orderon sa sanga. Sa tanan nga kahimtangan, ang Ginapatuman nga brosyur kag ang Ihibalo nga libro dapat anay tun-an. Ang pagtuon sa Biblia, mga pagduaw liwat, kag oras nga ginhinguyang sa pagpadayon sang pagtuon dapat isipon kag ireport, bisan pa nga ang estudyante nabawtismuhan antes matapos ang ikaduha nga libro.
6 Nagakahulugan bala ini nga yadtong bag-o lang nabawtismuhan apang nagtuon sa isa lamang ka libro dapat liwat buligan nga magtuon sang ikaduha nga libro? Indi na kinahanglan. Apang, mahimo nga nangin di-aktibo sila ukon mahimo nga wala nag-uswag sa kamatuoran, kag mahimo nga nagabatyag sila nga kinahanglan nila ang personal nga bulig agod maaplikar sing labi pa ang kamatuoran sa ila kabuhi. Ang manugtatap sa pag-alagad dapat pakig-angutan antes himuon liwat ang pagtuon upod sa isa ka bawtismado nga manugbantala. Apang, kon may kilala kamo nga nagtuon anay sa Ihibalo nga libro apang wala gid mag-uswag padulong sa dedikasyon kag bawtismo, mahimo nga kamo na mismo ang magbuot sa paghibalo kon bala luyag nila padayunon ang ila pagtuon sa Biblia.
7 Isa ka tanda sang Cristianong gugma nga hatagan sing suod, personal nga igtalupangod ang tagsa ka interesado nga tawo nga ginatun-an naton. Ang aton tulumuron amo ang pagbulig sa estudyante nga matigayon ang daku pa nga paghangop sa kamatuoran sang Pulong sang Dios. Nian sarang sia makahimo sing pat-od kag may ihibalo nga panindugan sa kamatuoran kag magdedikar sang iya kabuhi kay Jehova, nagasimbulo sina nga dedikasyon paagi sa bawtismo sa tubig.—Sal. 40:8; Efe. 3:17-19.
8 Nadumduman bala ninyo ang natabo sang nabawtismuhan na ang Etiopiahanon nga eunuco? ‘Padayon sia nga naglakat nga nagakasadya’ subong bag-ong disipulo ni Jesucristo. (Binu. 8:39, 40) Kabay nga kita kag ang mga tawo nga madinalag-on nga gintuytuyan naton sa dalanon sang kamatuoran makasapo sing daku nga kalipay sa pag-alagad kay Jehova nga Dios—sa karon kag sa walay katubtuban!