Mga Manugtatap nga Nagapanguna—Ang Sekretaryo

¹ Ang sekretaryo sang kongregasyon may importante nga katungdanan sa pagpat-od nga “ang tanan nga butang himuon sing nagakaigo kag suno sa kahimusan.” (1 Cor. 14:40) Subong katapo sang Komite sa Pag-alagad Sang Kongregasyon, ginaatipan niya ang mga sulat kag importante nga mga rekord sang kongregasyon. Bisan ang iya katungdanan indi matalupangdan sang tanan kaangay sang iban nga mga gulang, ang iya ginahimo kinahanglanon kag ginapasalamatan sing daku.

² Kon makabaton sing sulat halin sa Sosiedad ukon sa iban pa, ginadipara ini sang sekretaryo kag ginapat-od nga masabat ini kon kinahanglanon. Ginasiguro niya nga ang nabaton nga mga sulat mabasa sang tanan nga gulang kag dayon ginatago ini sa file subong reperensia. Ginausisa niya ang mga order form para sa mga magasin kag mga literatura kag ginapadala ini sa Sosiedad. Direkta niya nga ginadumalahan ang mga nagauyat sing kuwenta kag suskripsion subong man ang tanan nga butang may kaangtanan sa kombension.

³ Sanglit dapat ipadala sang sekretaryo ang binulan nga report sa pag-alagad sa latagon sang kongregasyon sa Sosiedad sa ikan-um nga adlaw sang bulan, kinahanglan naton tanan ireport sing maaga ang aton hinimuan sa latagon sa katapusan sang kada bulan. Nian ginasulat niya ang mga report sa pag-alagad sa mga Congregation’s Publisher Record card. Mahimo matan-aw sang bisan sin-o nga manugbantala ang iya personal nga rekord sang hilikuton.

⁴ Kon may manugbantala nga magasaylo sa kongregasyon ukon sa iban nga kongregasyon, ang sekretaryo nagapangabay ukon nagapadala sing sulat sa mga gulang sa iban nga kongregasyon nga nagapakilala sa manugbantala lakip ang iya Congregation’s Publisher Record card.​—⁠Aton Ministeryo, p. 104-5.

⁵ Ginarepaso sang sekretaryo ang hinimuan sang mga payunir, nagasugid sa mga gulang, kag labi na sa manugtatap sa pag-alagad, sang mahimo nga mga problema sang mga payunir. Ginapahibalo niya ang mga konduktor sa Pagtinuon Sang Kongregasyon sa Libro tuhoy sa mga manugbantala nga indi tayuyon sa pag-alagad sa latagon. Ang sekretaryo kag ang manugtatap sa pag-alagad nagapanguna sa paghituhog sang mga panikasog nga maatipan ang mga di-aktibo.​—⁠Ang Aton Ministeryo sa Ginharian, Disiembre 1987, p. 1.

⁶ Nahangpan sing maayo ang mga katungdanan sang sekretaryo, kabay nga himuon naton ang aton bug-os nga masarangan agod mahimo niya ang iya pagkatulugyanan sing mas mahapos.​—⁠1 Cor. 4:⁠2.