Mangin Epektibo sa Imo Ministeryo

¹ Ang langit nagadulom, kag ang makahaladlok nga gahod labi nga nagabaskog tubtob nga nangin makabulungol. Ang katulad sang aso nga panganod nagakunsad. Ano ini? Isa ka hangaway sang minilyon ka apan nga nagapadulong sa paglaglag sing bug-os sa duta! Ini nga danyag nga ginlaragway ni manalagna Joel may katumanan karon sa pagbantala nga hilikuton sang hinaplas nga mga alagad sang Dios kag sang ila mga kaupdanan, ang dakung kadam-an.

² Ang Mayo 1, 1998 nga Ang Lalantawan, pahina 11, parapo 19, nagsiling: “Ang modernong-adlaw nga hangaway nga mga apan sang Dios nagapanaksi sing maid-id sa ‘siudad’ sang Cristiandad. (Joel 2:9) . . . Ginataklas gihapon nila ang tanan nga balagbag, nagasulod sa minilyon ka puluy-an, nagapalapit sa mga tawo sa kalye, nagapakighambal sa ila sa telepono, kag ginapakig-angutan sila sa bisan anong posible nga paagi samtang ginabantala nila ang mensahe ni Jehova.” Indi bala isa ka daku nga pribilehiyo nga makigbahin sa sining gintangdo sang Dios nga hilikuton?

³ Indi kaangay sa literal nga mga apan, nga ang lamang nga tuyo amo ang busgon ang ila kaugalingon, kita subong mga alagad ni Jehova nabalaka sing daku sa kabuhi sadtong aton ginabantalaan. Luyag naton buligan ang iban nga matun-an ang dalayawon nga mga kamatuoran sang Pulong sang Dios kag pahulagon sa paghimo sing mga tikang nga magadul-ong sa ila walay katapusan nga kaluwasan. (Juan 17:​3; 1 Tim. 4:16) Gani, luyag naton mangin epektibo sa kon paano naton ginahimo ang aton ministeryo. Bisan ano man nga paagi sang pagbantala ang ginagamit, dapat naton binagbinagon kon bala ginahimo naton ini sa paagi kag sa tion nga makatigayon sing labing maayo nga mga resulta. Sanglit “ang danyag sining kalibutan nagabalhin,” maayo nga tun-an naton ang aton mga metodo kag ang aton mga paagi agod mapat-od nga ginaatubang naton ang hangkat nga mangin subong ka mapatubason kon mahimo.​—⁠1 Cor. 7:⁠31.

⁴ Samtang nagapanikasog kita nga masugilanon ang mga tawo sa madamo nga paagi, ang pamalaybalay nga hilikuton amo gihapon ang labing importante nga bahin sang aton ministeryo. Natukiban mo bala nga ang mga tawo masunson nga wala sa balay ukon nagakatulog kon magduaw ka? Makabalang-aw gid, kay wala mo mapaambit sa ila ang mensahe sang maayong balita! Paano mo atubangon ini nga hangkat?

⁵ Mangin Mapasibusibuon kag Makatarunganon: Sa unang-siglo nga Israel, ang mga mangingisda nagpangisda sa gab-i. Ngaa sa gab-i? Bisan pa indi ini ang labing masulhay nga tion para sa ila, amo ini ang labing maayo nga tion nga makahulik sing madamo nga isda. Amo ini ang tion nga madamo ang mapangisda. Nagakomento sa sining batasan, Ang Lalantawan sang Hunyo 15, 1992, nagsiling: “Dapat man naton tun-an ang aton teritoryo agod mangisda kita, kon hambalon pa, kon ang kalabanan nga tawo yara sa balay kag magapamati.” Ang mahalungon nga pagpanilag sa sosyal nga kinabatasan sa pila ka pungsod nagpakita nga sa madamong kabalayan, bisan pa nga ang mga tawo yara sa balay sa pagduaw naton sing temprano sa Sabado kag Domingo sang aga, kinaandan na nga wala sila nagasapak sa aton mga pagduaw sa sina nga tion. Kon amo sini ang kahimtangan sa inyo lugar, mabalhin bala ninyo ang oras sang inyo pagduaw sa uluudto na ukon bisan sa hapon? Isa ini ka maayong paagi sa pagpauswag sang pagkaepektibo sang aton ministeryo subong man sa pagpakita sing patugsiling sa aton mga isigkatawo, nga isa ka pamatuod sang matuod nga Cristianong gugma.​—⁠Mat. 7:⁠12.

⁶ Sa Filipos 4:​5, ginapahanumdom kita ni apostol Pablo nga dapat naton ‘ipakilala sa tanan nga tawo ang aton pagkamakatarunganon.’ Nahisanto sa sining inspirado nga panuytoy, luyag naton nga mangin timbang kag makatarunganon sa aton mga paagi samtang ginahimo naton ang aton hilikuton sa pagbantala sing makugihon kag mapagsik. Indi naton luyag ‘mag-isol sa pagtudlo sa dayag kag sa pamalaybalay,’ kundi luyag naton pat-uron nga ginahimo naton ang aton pamalaybalay nga ministeryo sa mga tion nga makatarunganon kag mapatubason. (Binu. 20:20) Kaangay sadtong mga mangingisda sa unang-siglo nga Israel, interesado kita sa ‘pagpangisda’ sa mga tion nga madamo kita sing mahulik, indi sa mga tion nga labing masulhay sa aton kaugalingon.

⁷ Anong mga pagbag-o ang himuon sa mga lugar nga indi luyag sang mga tawo nga duawon sing aga pa kaayo? Ang iban nga mga hubon sang mga gulang naghimo sing kahimusan agod makapakigbahin ang grupo sa iban nga mga porma sang ministeryo, subong sang pagpanaksi sa dalan, pagpanaksi sa duog nga may negosyo, ukon mga pagduaw liwat, antes magduaw sa mga kabalayan. Ang iban nga mga kongregasyon nagtalana sang mga oras sa pagtipon para sa pag-alagad sa latagon sa mga uluudto na, ukon sa alas 12:​00 sang udto. Pagkatapos sina, ang grupo direkta nga nagapamalaybalay kag nagapadayon sa pag-alagad tubtob sa maaga nga bahin sang hapon. Sa pila ka teritoryo, ang maaga nga bahin sang hapon, sa baylo nga sa aga, ayhan amo ang labing maayo nga tion sa pagtipon para sa pag-alagad sa latagon. Ini nga mga pagbag-o mahimo nga makabulig sa labi pa nga pagkamapatubason sa pamalaybalay nga hilikuton.

⁸ Mangin Mahantupon kag Mataktikanhon: Samtang nagapakigsugilanon kita sa mga tawo sa pamalaybalay, makasumalang kita sing lainlain nga reaksion sa aton mensahe. Ang iban nga mga tagbalay nagapamati, ang iban wala nagasapak, kag ang pila mahimo nga mabaison ukon makiawayon. Tuhoy sa naulihi, sa pahina 7 sang Reasoning From the Scriptures, ginapahanumdom kita nga wala kita nagapanikasog nga “‘madaug ang mga pagpakigbais’ sa mga tawo nga wala nagapakita sing pagtahod sa kamatuoran.” Kon ang tagbalay indi mainabyanon, labing maayo nga maghalin na lang kita. Indi gid naton pagpaakigon ang mga tawo paagi sa pagpamilit nga makighambal sila sa aton ukon batunon nila ang aton pagtamod. Wala naton ginapilit ang aton mensahe sa mga tawo. Indi ina makatarunganon kag makatuga sing mga problema sa iban nga mga Saksi kag sa hilikuton sa kabilugan.

⁹ Antes mangabudlay sa isa ka teritoryo, maalamon nga tan-awon sa territory card ang napat-inan nga mga direksion diin indi luyag sang mga residente nga magduaw kita. Kon may amo sina nga mga direksion, ang kada manugbantala nga nagapangabudlay sa sina nga kalye dapat sugiran kon diin ang indi dapat kadtuan. Wala sing dapat magmatumato sa pagduaw sa sining mga puluy-an kon wala ginsilingan sang manugtatap sa pag-alagad nga himuon ini.​—⁠Tan-awa ang Hunyo 1994 nga Ang Aton Ministeryo sa Ginharian, “Pamangkot.”

¹⁰ Mapauswag naton ang aton pagkaepektibo paagi sa pagkamahinantupon samtang nagapamalaybalay. Mangin mapanilagon samtang nagahinampot sa isa ka balay. Sirado bala ang tanan nga kurtina? Matinong bala? Ayhan nagapatimaan ini nga nagakatulog ang mga nagapuyo sa sini. Ayhan, mangin mas mabungahon ang pagpakighambal naton sa tagbalay kon magbalik na lang kita sa ulihi. Ayhan labing maayo nga ligaran anay ini nga balay, ginalista ang numero sang balay. Mahimo mo agihan liwat ang balay antes maghalin sa teritoryo ukon tandaan agod maduaw liwat sa lain nga oras.

¹¹ Mahimo gihapon mag-utwas ang mga kahimtangan diin dihungod naton nga napabugtaw ang isa nga nagakatulog ukon ayhan natublag sia. Mahimo nga daw naugot ukon naakig sia. Ano ang himuon naton? Ang Hulubaton 17:​27 nagalaygay: “Ang tawo nga mahinantupon mabugnaw sa espiritu.” Walay sapayan nga wala kita nagapangayo sing pasaylo tungod sa aton ministeryo, pat-od gid nga mahimo naton mapabutyag ang aton pagkasubo nga nagduaw kita sa indi kombeniente nga oras. Matinahuron kita nga makapangabay kon bala mahimo kita makabalik sa iban nga oras nga mas kombeniente sa iya. Ang hanuot nga pagpabutyag sing personal nga kabalaka sa malum-ok nga tingog masunson nga nagabulig agod magtawhay ang subong sini nga tawo. (Hulu. 15:1) Kon ang tagbalay magasugid sa aton nga pirme panggab-i ang iya obra, mahimo ini masulat sa territory card agod maduaw sia sa nagakaigo nga oras.

¹² Ang paghantop nagakaigo man samtang nagapanikasog kita sa pagpangabudlay sing maid-id sa aton teritoryo. Sanglit madamo nga tawo ang wala sa balay sa aton una nga pagduaw, dapat kita manikasog sing labi pa nga masugilanon sila agod mapaambit ang mensahe sang kaluwasan sa ila. (Roma 10:13) May mga report nga kon kaisa ang mga manugbantala nagaduaw sa isa ka balay sing pila ka beses sa isa ka adlaw sa panikasog nga may maabtan nga tawo sa balay. Natalupangdan ini sang mga kaingod. Mahimo mag-utwas ang dimaayo nga impresyon nga ang mga Saksi ni Jehova ‘pirme nagaduaw’ sa ila kalye. Paano ini malikawan?

¹³ Magmahinantupon. Kon nagaduaw liwat sa balay nga wala anay sing tawo, may mga patimaan bala nga may tawo na? Kon ang sulat ukon mga flier (balasahon nga ginapanagtag) nagalabaw sa buson ukon nagalusot sa idalom sang puwertahan, mahimo nga wala pa ang tagbalay kag ang pagduaw sa sini nga oras indi nagakaigo. Kon ang tagbalay indi masugilanon pagligad sang pila ka paninguha sa nagakalainlain nga oras sa isa ka adlaw, subong sang sa gab-i, ayhan mahimo sia masugilanon sa telepono. Kon indi, ang tract ukon handbill mahimo mabilin sing mainandamon sa idalom sang puwertahan, ilabi na kon ang teritoryo masunson gid nga ginatuptupan sing makatarunganon. Ayhan masugilanon sia sa masunod nga pagpangabudlay sa teritoryo.

¹⁴ Dapat naton likawan ang malawig nga pagpakighambal sa ganhaan kon ang tagbalay nagakabasa sang ulan. Kon ginapasulod sa balay, maghalong nga indi mahigkuan ang salog. Magmahinantupon kon may ido nga nagataghol. Kon nagapangabudlay sa mga apartment, maghambal sing mahinay kag likawi ang paggahod nga nagatublag sa mga nagapuyo sa sini kag nagapahibalo nga yara ikaw.

¹⁵ Mangin Mahim-ong kag Talahuron: Paagi sa maayo nga pag-organisar, malikawan naton ang daku, kitaon dayon nga grupo nga nagapunsok sa teritoryo. Ang iban nga mga tagbalay mahimo nga kulbaan kon mag-inabot sa atubangan sang ila balay ang pila ka salakyan nga may sakay nga daku nga grupo sang mga manugbantala. Indi naton luyag nga makahatag sing impresyon nga “ginasalakay” naton ang kabalayan. Ang mga kahimusan sa pagpangabudlay sa teritoryo labing maayo nga himuon sa miting sa pag-alagad sa latagon. Ang magagmay nga mga grupo sang mga manugbantala, subong sang isa ka pamilya, indi tanto ka makakululba sa mga tagbalay kag mas mahapos nga organisahon samtang ginapangabudlayan ang teritoryo.

¹⁶ Ang kahim-ong nagakinahanglan nga ang mga ginikanan magatatap sing maayo sang paggawi sang ila kabataan samtang nagapangabudlay sa teritoryo. Ang kabataan dapat nga maayo ang pamatasan kon nagaupod sa mga hamtong sa ganhaan. Ang kabataan indi dapat pagtugutan sa paghampang ukon sa paglagawlagaw, nga nagaganyat sing dinagakaigo nga igtalupangod sa mga pumuluyo ukon sa mga nagalabay.

¹⁷ Kinahanglan man ang pagkatimbang kon tuhoy sa pagpahuway agod makapangape (makapamahaw). Ang Aton Ministeryo sa Ginharian, Hunyo 1995, pahina 3, nagsiling: “Kon nagaalagad kita sa latagon, mahimo naton mawasi ang hamili nga mga tion paagi sa pagpamahaw. Apang, kon mainit gid ang tiempo, ang pagpahuway mahimo nga magaparepresko sa aton kag magabulig agod makapadayon kita. Apang, ginapakamaayo sang iban nga magpabilin nga masako sa pagpanaksi sa mga tawo kag sa pagpaiway sang pagpamahaw upod sa mga kauturan sa tion nga gintigana para sa pagministeryo.” Bisan pa nga ang pagdulog para makapabugnaw isa ka personal nga desisyon, natalupangdan nga kon kaisa, ang daku nga mga grupo sang mga kauturan nga lalaki kag babayi nagakitaay sa palamahawan ukon sa restawran. Luwas sa oras nga kinahanglan agod maserbehan, ang presensia sang isa ka grupo mahimo nga makahaladlok sa iban nga bumalakal. Kon kaisa, ang mga eksperiensia sa pag-alagad sa latagon mabaskog nga ginahambalan, kag nagabuhin ini sa dignidad sang aton ministeryo kag sang pagkaepektibo sini. Paagi sa pagkamahinantupon, malikawan sang mga manugbantala ang pagginutok sa isa ka establisimiento kag ang pagkuha sing dikinahanglanon nga tion gikan sa ministeryo.

¹⁸ Madamo ang nakaagom sing maayo nga mga resulta paagi sa pagpalapit sa mga tawo diin man sila masalapuan​—⁠sa mga dalan, sa mga paradahan, sa mga parke, kag sa iban pa publiko nga mga duog. Luyag man naton diri makahatag sing maayo nga panaksi, indi lamang paagi sa aton pinamulong kundi paagi man sa aton pagkamakatarunganon. Dapat pat-uron sang mga manugbantala sang tagsa ka kongregasyon nga ginatahod nila ang mga dulunan sang ila mga teritoryo agod indi nila makibon ang mga tawo sa komersial nga mga lugar kag mga parke ukon mga empleyado sa mga negosyo, subong sang mga gasolinahan, nga bukas sa sulod sang 24 ka oras. Agod pat-uron nga ginahimo naton ang aton ministeryo sing mahim-ong kag sing talahuron, magapangabudlay lamang kita sa sulod sang gintangdo sa aton nga teritoryo luwas kon may espesipiko nga mga kahimusan nga ginhimo sa kalalangan sang Komite sa Pag-alagad Sang Kongregasyon sang pihak nga kongregasyon, agod mabuligan sila.​—⁠Ipaanggid ang 2 Corinto 10:​13-15.

¹⁹ Ang pila ka kongregasyon nga may madamo nga lugar nga posible ang dayag nga pagpanaksi nag-organisar sini nga mga lugar nga mangin mga teritoryo. Nian ang isa ka territory card ginhatag sa isa ka indibiduwal nga manugbantala ukon sa isa ka grupo. Ginapahapos sini ang mas epektibo nga pagtuptop kag nagaamlig batok sa tuman kadamo nga manugbantala nga nagapangabudlay sa isa ka lugar sa isa ka tion, nahisuno sa prinsipio sang 1 Corinto 14:​40: “Ang tanan nga butang himuon sing nagakaigo kag suno sa kahimusan.”

²⁰ Ang aton personal nga hitsura dapat pirme nga mangin talahuron kag nagapakilala sa mga ministro nga nagadala sang ngalan ni Jehova. Amo man sa kagamitan nga ginagamit naton. Ang gubaon nga bag kag nagpilo nga pamusod sang mga pahina ukon mahigko nga mga Biblia nagahalit sa mensahe sang Ginharian. Ginasiling nga ang pamayo kag pamustura “isa ka laktod nga paagi sang pagpaalinton nga nagahatag sa palibot nga populasyon sing impormasyon sa kon sin-o kag sa kon ano ikaw kag sa kon diin ikaw nagakabagay sa kahimusan sang mga butang.” Gani, ang aton hitsura indi dapat nga baraghal ukon mahigko, indi hinambog ukon madayaw, kundi pirme “takus sang maayong balita.”​—⁠Filip. 1:​27; ipaanggid ang 1 Timoteo 2:​9, 10.

²¹ Sa 1 Corinto 9:​26, si apostol Pablo nagsiling: “Ang paagi sang akon pagdalagan indi wala sing kapat-uran; ang paagi sang akon pagtumod sang sumbag indi agod makasumbag sa hangin.” Bilang pag-ilog kay Pablo, determinado kita nga may yara epektibo, mapatubason nga ministeryo. Samtang nagapakigbahin kita sing makugi sa pagpanaksi nga hilikuton subong bahin sang “hangaway nga mga apan” ni Jehova sa karon, kabay nga gamiton naton ang Cristianong pagkamakatarunganon kag pagkamahinantupon sa pagdul-ong sang mensahe sang kaluwasan sa tanan sa aton teritoryo.