Dapat Kita Magduaw sa Liwat kag Liwat

¹ Namati ka bala dayon sang may una nga nakighambal sa imo tuhoy sa maayong balita? Kon wala, mahimo nga nagpasalamat ka nga nagduaw sa liwat kag liwat ang mga Saksi tubtob nga ginbaton mo sang ulihi ang isa ka pagtuon sa Biblia. Maayo ini hunahunaon kon pirme ninyo ginapangabudlayan ang inyo gintangdo nga teritoryo.

² Ang kabuhi sang tawo pirme nagabalhin. Nagaatubang sila sing bag-ong mga problema ukon mga kahimtangan, nagapamati sing makatulublag nga mga hitabo sa komunidad ukon sa kalibutan, nagabatas sing mga problema sa pangabuhi, ukon nagaeksperiensia sing balatian ukon kamatayon sa pamilya. Ini nga mga butang mahimo nga magpahulag sa ila nga hibaluon ang rason sa sining mga kalisdanan. Dapat naton mahantop ang mga butang nga nagapabug-at sa hunahuna sang mga tawo kag nian magsabat paagi sa makalulugpay nga mensahe.

³ Isa Ini ka Hilikuton sa Pagsalbar: Hunahunaa ang mga manugsalbar sa isa ka kapahamakan. Bisan pa ang iban mahimo nga nagapangita sa isa ka lugar diin diutay lamang ang makita nga nakasalbar, wala sila nagapabuyanbuyan kag nagadulog bangod ang ila mga kaupdanan mas madamo sing nasalbar sa iban nga lugar. Ang aton hilikuton sa pagsalbar wala pa matapos. Kada tuig, ginatos ka libo nga luyag makalampuwas sa “dakung kapipit-an” ang nakit-an.​—⁠Bug. 7:​9, 14.

⁴ “Ang tagsatagsa nga nagatawag sa ngalan ni Jehova maluwas.” (Roma 10:​13-15) Ginapadulot sini nga pinamulong sa tagsatagsa sa aton ang kinahanglanon nga magpadayon sa pagbantala. Kutob sang una nga matuptupan ang aton teritoryo, ang mga kabataan nagdinalagku kag yara na sa husto nga edad agod binagbinagon mismo sing hanuot ang ila palaabuton kag ang katuyuan sang kabuhi. Wala kita makahibalo kon sin-o sa ulihi ang magapamati. (Manugw. 11:6) Madamong nagapamatok anay ang nagbaton sang kamatuoran. Ang aton hilikuton, indi ang paghukom sa mga tawo, kundi ang padayon nga paghatag sa ila sing kahigayunan nga makapamati kag masalbar gikan sa sining daan nga kalibutan. Subong sang ginhimo sang mga disipulo ni Jesus sang una, dapat kita ‘magkadto sing padayon’ sa mga tawo kag tinguhaan nga pukawon ang ila interes sa mensahe sang Ginharian.​—⁠Mat. 10:​6, 7.

⁵ Ang katunayan nga bukas pa gihapon ang dalan agod magbantala kita isa ka pagpakita sang kaluoy ni Jehova. (2 Ped. 3:9) Samtang ginatugutan naton ang iban sa pagpamati sa mensahe sa liwat kag liwat, ginapadaku naton ang gugma sang Dios, kag sa sining paagi ginadayaw naton sia.