Ngaa Padayon Kita Nga Nagabalik?
1 Napamangkot mo na bala ina sa imo kaugalingon, ayhan samtang nagahanda ka sa pagguwa sa pag-alagad? Sulit-sulit naton ginapangabudlayan ang aton teritoryo, sing tuig-tuig. Kilala na sang madamo nga mga tagbalay kon sin-o kita kag wala sila nagapamati sa aton. Ang iban nagasiling sa aton sing prangka nga indi na magbalik. Pila lamang ang mahimo nga nagapamati. Gani nagakaigo ang pamangkot: “Ngaa padayon kita nga nagabalik?” Binagbinaga ang masunod nga mga rason.
2 Una sa tanan, ginasugo kita nga padayon nga ibantala ang mensahe sang Ginharian tubtob magaabot ang katapusan. (Mat. 24:14; 28:19, 20) Namangkot si manalagna Isaias kon tubtob san-o niya padayunon ang iya pagbantala nga hilikuton. Ang sabat nga nabaton niya narekord sa Isaias 6:11. Wala sing duhaduha sa sini—ginsugo sia nga padayon nga magbalik nga dala ang mensahe sang Dios. Sa karon man, bisan pa indi sila mamati, ginapaabot ni Jehova nga padayon kita nga magaduaw sa mga tawo sa aton teritoryo. (Ezeq. 3:10, 11) Isa ini ka sagrado nga responsabilidad nga gintulin sa aton.—1 Cor. 9:17.
3 Ang isa pa ka rason nga padayon kita nga nagabalik amo nga nagahatag ini sa aton sing kahigayunan nga ipakita ang kadalumon sang aton debosyon kay Jehova. (1 Juan 5:3) Isa pa, kon binagbinagon naton kon ano nga palaabuton ang ginatigana para sa katawhan, paano naton punggan ang aton kaugalingon nga indi pagpaandaman ang aton mga isigkatawo? (2 Tim. 4:2; Sant. 2:8) Ang aton katutom sa pagtuman sang aton asaynment nagahatag sing sulit-sulit nga kahigayunan para sa ila nga pamatian ang mensahe sang Dios, agod indi sila makasiling nga wala sila ginpaandaman.—Ezeq. 5:13.
4 Dugang pa, wala gid kita makahibalo kon san-o magabalhin ang panimuot sang pila ka tawo. Mahimo nga bangod ini sa pagbalhin sang ila mga sirkunstansia, sa trahedya sa ila pamilya, ukon sa mga kahimtangan sa kalibutan nga nagahilabot sa ila. Dugang pa, mahimo kita makasiling sing butang nga makapukaw sing maayo nga sabat. (Manugw. 9:11; 1 Cor. 7:31) Subong man, ang mga tawo nagasaylo. Mahimo naton masalapuan ang bag-ong mga pumuluyo sa aton teritoryo nga magapamati sa maayong balita.
5 Padayon bala kita nga magabalik? Huo! Ang Kasulatan nagahatag sa aton sing nagakaigo nga pangpapagsik agod padayon nga magbalik. Kon matapos na ang pagbantala nga hilikuton, si Jehova magabulahan sa aton bangod sang aton dalayon nga panikasog sa ministeryo, kag bulahanon niya ang mga nagapamati sa aton.—1 Tim. 4:16.