Kon Paano ang mga Katapo sang Pamilya Nagabinuligay nga Makapakigbahin sing Bug-os—Sa mga Miting sang Kongregasyon
1 Dapat sundon sang Cristianong mga pamilya ang sugo nga magtipon sing tingob sa mga miting sang kongregasyon. (Heb. 10:24, 25) Paagi sa maayo nga pagbinuligay, ang tanan magamadinalag-on sa paghanda, pagtambong, kag pagpakigbahin sa mga miting. Ang mga kahimtangan sang pamilya nanuhaytuhay, apang may mahimo ang Cristianong bana, tumuluo nga asawa, ukon solo nga ginikanan agod mapasanyog ang pag-inupdanay sang pamilya sa espirituwal nga mga butang, bisan pila man kadamo ang kabataan sa puluy-an kag ano man ang ila pangidaron.—Hulu. 1:8.
2 Maghinguyang sing Tion sa Paghanda: Ang mga katapo sang pamilya nagabinuligay agod pat-uron nga ang kada isa nakahanda sing maayo para sa mga miting sang kongregasyon. Ginabinagbinag sang madamo ang artikulo para sa semanal nga Pagtinuon sa Lalantawan sing magkaupod. Ginahandaan sang pila ang Pagtinuon Sang Kongregasyon sa Libro ukon ginabasa ang semanal nga pagbasa sa Biblia subong isa ka pamilya. Ang tulumuron amo ang pagdumdom sa pangunang mga punto antes magtambong sa mga miting. Sa sina nga paagi, ang tanan labi nga makabenepisyo sa kon ano ang mapamatian kag masangkapan sa pagkomento kon may higayon.—1 Tim. 4:15.
3 Magplano sa Pagpakigbahin: Ang tanan sa pamilya dapat may tulumuron nga ipahayag ang iya paglaum sa iban paagi sa pagkomento sa mga miting. (Heb. 10:23) Nagakinahanglan bala sing bulig ukon pagpalig-on ang isa ka katapo sang pamilya agod mahimo ini? Ano nga bulig ang ginakinahanglan sang kada isa sa paghanda sing mga asaynment para sa Teokratikong Eskwelahan sa Pagministro? Ginaapresyar sang mga asawa kon ang ila mga bana nagapakita sing interes kag ayhan nagahatag sing ideya para sa isa ka nagakaigo nga ilustrasyon ukon isa ka praktikal nga danyag. Ang mga ginikanan indi kinahanglan magbatyag nga sila dapat ang maghanda sang mga bahin sang ila lamharon nga kabataan. Nagapugong ini sang inisyatibo sang kabataan. Apang ang mga ginikanan mahimo makabulig sa ila kabataan kag makapamati samtang nagaensayo sila sing mabaskog.—Efe. 6:4.
4 Maghimo sing Kahimusan sa Pagtambong: Ang kabataan sarang matudluan kutob sa pagkabata sa pag-ilis kag sa paghanda sa paglakat pakadto sa miting sa gintalana nga tion. Ang mga katapo sang pamilya dapat magbinuligay sa pagtatap sa mga hilikuton sa balay agod wala sing maulihi.—Tan-awa ang mga panugda sa mga libro nga Kalipay sang Pamilya, pahina 112, kag Young People Ask, pahina 316-17.
5 Sarang mahunahuna sang mga ginikanan kag kabataan ang mga pinamulong anay ni Josue sang una, nga nagsiling: “Para sa akon kag sa akon panimalay, magaalagad kami kay Jehova.” Nian mamat-od nga magbinuligay agod makapakigbahin sing bug-os sa mga miting sang kongregasyon.—Jos. 24:15.