Ibantala ang Maayong Balita Sing Malangkagon
1 “Nagahandum ako sa pagpakigkita sa inyo . . . Nalangkag ako nga ibantala man ang maayong balita sa inyo.” Amo sini ang ginpabutyag ni apostol Pablo sa pamuno sang iya sulat sa mga kauturan sa Roma. Ngaa nalangkag si Pablo sa pagduaw sa ila? Sia nagsiling: “Agod matigayon ko man ang iban nga bunga sa tunga ninyo . . . Kay wala ko ginakahuya ang maayong balita; ini, sa katunayan, amo ang gahom sang Dios para sa kaluwasan.”—Roma 1:11-16.
2 Ginpabanaag ni Pablo ini man nga kalangkag sa pagpakighambal sa mga tigulang nga lalaki sa Efeso. Ginpahanumdom niya sila: “Kutob sa nahaunang adlaw nga nagtapak ako sa distrito sang Asia . . . , wala ako mag-isol . . . sa pagtudlo sa inyo sa dayag kag sa pamalaybalay. Kundi nagpanaksi ako sing maid-id sa mga Judiyo kag sa mga Griego.” (Binu. 20:18-21) Sa bug-os nga teritoryo nga gintangdo sa iya, nalangkag si Pablo nga ipalapnag ang maayong balita sang kaluwasan kag tigayunon ang bunga sang Ginharian. Isa gid ka maayo nga espiritu nga ilugon!
3 Mahimo naton pamangkuton ang aton kaugalingon: ‘Ginapakita ko bala ini man nga kalangkag sa pagbantala sing maayong balita sa akon komunidad? Sa baylo nga tamdon ang pagbantala nga hilikuton subong isa lamang ka katungdanan, nalangkag bala ako nga ipaambit ang maayong balita sa madamo nga tawo kon mahimo? Ginbinagbinag ko bala sing mapinangamuyuon ang akon personal nga mga kahimtangan? Gintun-an ko bala ang tanan nga posibilidad sa akon teritoryo, subong sang pagbantala sa mga ganhaan, sa dalan, sa mga lugar nga may negosyo, sa telepono, kag sing dipormal?’
4 Malangkagon nga Makigbahin sa Abril: Ang bulan sang Abril isa ka maayo nga tion agod dugangan ang aton personal nga bahin sa pagbantala nga hilikuton. Ang ginpanubuan nga lalab-uton nga oras nagapaposible sa madamo nga makaauxiliary payunir. Ayhan ang imo mga kahimtangan nagatugot sa imo sa pag-auxiliary payunir sa Abril kag Mayo. Ukon mahimo ikaw magregular payunir, bangod sang ginpanubuan nga lalab-uton nga oras. Kon ikaw isa ka manugbantala sang kongregasyon, makahinguyang ka bala sing mas madamo nga oras sangsa kinaandan sa pag-alagad sini nga bulan kag sa masunod, nagahatag sing suporta sa mga makapayunir? Magapahalipay gid ina sa tagipusuon ni Jehova!
5 Ang mga manugbantala sang Ginharian dapat, kaangay ni Pablo, padayon nga magpakita sing kalangkag paagi sa pagpanikasog sa pagbantala nga hilikuton. Malipay gid kita kon ginahimo naton ang aton bug-os nga masarangan sa ministeryo. May amo anay sini nga kalipay si Pablo tuhoy sa iya balaan nga pag-alagad. Maayo nga ilugon naton ang iya maayo gid nga halimbawa.—Roma 11:13; 1 Cor. 4:16.