Magplano nga Daan!

¹ Ang organisasyon ni Jehova nagaaman sing regular nga programa sang teokratikong mga hilikuton nga gindesinyo para sa aton espirituwal nga mga kinahanglanon. Bangod sang pagpabalor sa sini, ginahimuslan naton ang tanan nga kahimusan, subong sang mga pagduaw sang nagalakbay nga manugtatap, mga asambleya kag mga kombension, kag iban pa pinasahi nga mga hilikuton nga ginplano sing lokal. (Mat. 5:3) Apang, wala makabenepisyo ang iban sa madamo sining espirituwal nga mga aman bangod sang ila lain nga mga plano. Ano ang himuon agod malikawan ini? Paano naton mapat-od nga wala ginapahigad sang indi teokratikong mga hilikuton ang “mas importante nga mga butang”?​—⁠Filip. 1:⁠10.

² Ang Maalamon nga Pagplano Kinahanglanon: Ang Hulubaton 21:5 nagalaygay: “Ang mga plano sang makugi nagapadulong gid sa kaayuhan, apang ang tagsatagsa nga padasudaso nagapadulong gid sa kinawad-on.” Agod matigayon ang espirituwal nga “kaayuhan,” dapat kita magplano nga daan sing makugi, nagadumdom sang teokratikong mga hilikuton nga ginhimos. Dapat naton iskedyulon ang aton personal nga mga hilikuton para sa isa ka tion nga indi ini magaupang agod mangin yara kita sa pag-ani sing espirituwal nga mga kabulahanan. Kon padasudaso kita nga magplano sa paghimo sing mga butang nga personal naton nga luyag himuon, nga wala ginahunahuna ang palaabuton nga teokratikong mga okasyon, mahimo nga magaantos kita sing espirituwal nga “kinawad-on.”

³ Indi Pagwasiha! Kita tanan nagaplano para sa palaabuton, lakip ang mga bakasyon, mga paglakbay may kaangtanan sa negosyo, mga pagduaw sa mga himata, kag iban pa. Antes ka magdesisyon ukon maghimo sing mga plano, tan-awa ang iskedyul sang palaabuton nga teokratikong mga hilikuton. Kon makita mo nga ang manugtatap sang sirkito manug-abot ukon ang asambleya naiskedyul sa tion man nga ayhan wala ka, panikasugi sing hanuot nga bag-uhon ang imo iskedyul agod makapakigbahin ka. Ginapahibalo kita sing abanse gid tuhoy sa dalagku nga mga hitabo nga naiskedyul para sa palaabuton. Ang mga gulang sa inyo kongregasyon makasugid sa imo sang lokal nga mga plano.

⁴ Paagi sa pagbinagbinag sang palaabuton kag sa pagplano nga daan sang mas importante nga mga butang, “mapun-an [kita] sing matarong nga bunga, . . . sa kahimayaan kag kadayawan sang Dios.”​—⁠Filip. 1:⁠11.