Mga Miting sa Serbisyo Para sa Mayo
Semana sang Mayo 3
8 min: Lokal nga mga pahibalo. Pinili nga Mga Pahibalo gikan sa Ang Aton Ministeryo sa Ginharian. Mga Balita Teokratiko.
17 min: “Tudlui ang Iban nga Makabenepisyo.” Limitehi ang introduksion sa kubos sa isa ka minuto, kag sundan sing pamangkot-kag-sabat nga paghinun-anon. Nagagamit sang kapitulo 13 sang Ihibalo nga libro, ipakita kon paano ang mga tawo praktikal nga nakabenepisyo paagi sa pagtuon, paghangop, kag pag-aplikar sang mga prinsipio sang Biblia.
20 min: “Mga Paagi Agod Mapasangkad ang Inyo Ministeryo.” Ginahambalan sang duha ka gulang ang artikulo bilang sabat sa mga pamangkot sang lainlain nga kauturan sa tumalambong. Ang isa ka tin-edyer nga manugbantala, isa ka mag-asawa, kag isa ka manugretiro nga utod nga lalaki nagapamangkot tuhoy sa mga paagi nga mahimo nila mapasangkad ang ila ministeryo. Ang praktikal nga mga panugda matigayon gikan sa artikulo kag sa kapitulo 9 sang Aton Ministeryo nga libro, nagahugod sa “Ano Bala ang Imo Espirituwal nga mga Tulumuron Para sa Palaabuton?,’” pahina 116-18. Ang mga manugbantala nagapasalamat sa mabuligon nga impormasyon nga ginaaman sang Sosiedad nga nagapakita kon paano magplano agod mapasangkad ang hilikuton sang pag-alagad sa malapit nga palaabuton.
Ambahanon 11 kag nagatakop nga pangamuyo.
Semana sang Mayo 10
10 min: Lokal nga mga pahibalo. Report sa kuwenta.
20 min: Himud-usi ang Bug-os Tion nga Pag-alagad nga Tulumuron. Paghinun-anon sang isa ka gulang kag sang isa ukon duha ka pamatan-on, pasad sa Disiembre 15, 1988, Lalantawan, pahina 25-7. Ang mga pamatan-on nagatinguha sa pagpamat-od kon ano nga tulumuron ang ila himud-usan pagkatapos sang ila sekular nga edukasyon. Nagapakita sila sing interes sa materyal nga mga bentaha nga ginatan-ay sang kalibutanon nga mga karera. Ginapakita sang gulang ang maayong mga rason kon ngaa mas maayo nga panikasugan ang pagpayunir. Ang mga pamatan-on nagaugyon apang nagaduhaduha nga makapayunir sila kag maamanan ang kaugalingon sa materyal. Ginapakita sang gulang kon paano ang mga ginikanan nagakabalaka man tuhoy sa kon paano nila suportahan ang ila kaugalingon kag walay duhaduha nga makahatag sing mabuligon nga laygay tuhoy sini, ginagamit ang mga punto gikan sa parapo 13 sa pahina 21 sang Agosto 15, 1997, Lalantawan. Nian ginasugid niya ang mga eksperiensia gikan sa artikulo sa Disiembre 15, 1988 nga Lalantawan, nga nagapakita nga ang pagpayunir isa ka makatarunganon kag sarang malab-ot nga tulumuron nga nagapahalipay sa madamo. Ang paghambalanay nagatapos paagi sa pagpabutyag sang mga pamatan-on sing pasalamat sa mga komento sang gulang kag sa ila determinasyon nga pamensaron sing maayo ang paghimud-os sa tulumuron nga makapakigbahin sing bug-os sa pag-alagad sang Ginharian.
15 min: Pamulongpulong sa “Paano Mo Mapakita ang Matuod nga Pagkamapainubuson?” Pasad ini sa artikulo sa Pebrero 1, 1999, Lalantawan, pahina 6 kag 7.
Ambahanon 19 kag nagatakop nga pangamuyo.
Semana sang Mayo 17
10 min: Lokal nga mga pahibalo.
15 min: “Magplano nga Daan!” Pamangkot-kag-sabat nga paghinun-anon sa artikulo. Repasuha ang tanan nga teokratikong mga hilikuton nga ginaplano sing lokal para sa masunod nga pila ka bulan. Palig-una ang tanan nga markahan ang mga petsa sa ila kalendaryo kag indi pagtugutan ang iban pa nga butang sa pagbalabag.
20 min: Paghanas sa mga Kabataan sa mga Miting kag sa Pag-alagad sa Latagon. Pamulongpulong sang isa ka gulang. Kutob sa pagkabata, ang aton mga kabataan dapat magtambong sa mga miting kag mag-upod sa aton sa latagon. Ang paghanas kag eksperiensia nga matigayon nila mangin isa ka malig-on nga sadsaran para sa ila pagtuo kag kakugi sa ulihi nga mga tinuig. Sa mga miting, ang mga kabataan dapat magpungko upod sang ila mga ginikanan kag indi dapat pagtugutan sa pagtublag sa iban. Dapat man nila likawan ang pagduludalagan sa sulod ukon sa guwa sang Kingdom Hall antes kag pagkatapos sang mga miting. (Tan-awa ang om-HV, pahina 63 kag 64.) Kon nagaalagad sa latagon, importante nga tamdon sing serioso sang mga kabataan ang ministeryo kag maggawi sing nagakaigo. Dapat nila likawan ang paghinarasharas; ang pag-alagad sa latagon indi tion sa paghampang. Labing maayo nga mag-upod sila sa mga hamtong. Dapat sila buligan sa pagpakigbahin sa paghatag sing mga presentasyon suno sa ila mga ikasarang. (Tan-awa ang Agosto 1, 1988, Lalantawan, pahina 15, parapo 20.) Ang mga ginikanan amo ang may salabton sa paghatag sing pagtatap; indi nila dapat pagpakadtuon ang mga kabataan sa mga miting antes mag-alagad sa latagon nga wala sing may edad-edad nga utod nga magatatap sa ila. Dayawa ang mga kabataan kon maayo ang ginahimo nila.
Ambahanon 29 kag nagatakop nga pangamuyo.
Semana sang Mayo 24
15 min: Lokal nga mga pahibalo. Repasuha ang Abril 15, 1999 nga sulat sang Sosiedad, may kaangtanan sa Please Follow Up (S-43) form. Ipaathag kon paano ini makabulig sa pagtatap sa mga interesado nga nasapwan kon nagapanaksi sing dipormal ukon kon nakasugilanon sa mga tawo nga lain sing lenguahe. Palig-una ang mga manugbantala nga gamiton sing maayo ining mga porma.
12 min: Pamulongpulong sang isa ka gulang tuhoy sa mga punto sa “Pamangkot” sa pahina 3.
18 min: Nagapakigbahin Bala Kita sa Hilikuton sa Pagpainpain? Makapahulag nga pamulongpulong sang manugtatap sa pag-alagad, pasad sa Hulyo 1, 1997, Lalantawan, pahina 30-1.
Ambahanon 32 kag nagatakop nga pangamuyo.
Semana sang Mayo 31
15 min: Lokal nga mga pahibalo. Pahanumduma ang tanan nga ihatag ang ila report sa pag-alagad sa latagon para sa Mayo. Repasuha ang tanyag nga literatura para sa Hunyo. Kon nagatanyag sing Ihibalo nga libro, mahimo ilakip ang isa ka kopya sang mas daan nga 192-pahina nga libro nga madamo sing stock ang kongregasyon. Ipasundayag ang isa ka halimbawa nga presentasyon.
15 min: Lokal nga mga kinahanglanon.
15 min: Ano ang Sayop sa Akon Relihion? Paghinun-anon sang duha ka ministeryal nga alagad. Masumalang naton ang madamo nga tawo nga pabor sa kamatuoran kag nagadayaw sa mga Saksi ni Jehova. Apang, ang kaangtanan nga ginahuptan nila sa ila simbahan nagapugong sa ila. Nabudlayan sila sa pagpati nga kita lamang ang may matuod nga relihion kag nga ang ila porma sang pagsimba butig. Nangin daku ini nga balagbag sa ila espirituwal nga pag-uswag. Ginarepaso sang mga utod ang anom ka rason nga ginsambit sa pahina 204 sang Reasoning nga libro, nga nagapakita sing maathag nga wala ginasunod sang iban nga mga relihion ang Biblia. Palig-una ang tumalambong nga gamiton ining mga punto sa pagbulig sing mataktikanhon sa mga sinsero nga binagbinagon ang ila relihiosong mga pagpati.
Ambahanon 50 kag nagatakop nga pangamuyo.