Pamangkot

◼ Anong mga publikasyon ang dapat naton tun-an upod sa mga bag-uhan antes sang ila bawtismo?

Antes madedikar sang isa ka tawo ang iya kabuhi kay Jehova kag mabawtismuhan, dapat sia magkuha sing sibu nga ihibalo. (Juan 17:3) Matigayon niya ang impormasyon nga kinahanglan niya paagi sa pagtuon lunsay sa brosyur nga Ano ang Ginapatuman sang Dios sa Aton? kag sa libro nga Ang Ihibalo nga Nagadul-ong sa Kabuhi nga Walay Katapusan. Sa kalabanan nga hitabo ang Ginapatuman nga brosyur dapat una nga tun-an. Apang, kon ang pagtuon nasugdan na sa Ihibalo nga libro, ang Ginapatuman nga brosyur dapat tun-an kon matapos na ang libro. Ngaa kinahanglanon ini?

Ang Ginapatuman nga brosyur nagahatag sing kabilugan nga pagtamod sa sadsaran nga mga panudlo sang Biblia. Kon una tun-an, magahatag ini sa estudyante sing panguna nga paghangop tuhoy sa mga tulumanon agod mapahamut-an si Jehova. Kon ulihi tun-an, mangin maayo ini nga repaso sa kon ano ang natuptupan sa Ihibalo nga libro. Sa duha ka hitabo, palig-una ang estudyante nga tan-awon ang nagasakdag nga mga kasulatan kag pamalandungan ini. Pat-ura nga ipatalupangod ang mga laragway, kay tuman ini ka epektibo nga mga bulig sa pagtudlo.​—⁠Tan-awa ang Enero 15, 1997, Lalantawan, pahina 16-17.

Sa tion nga matapos sang isa ka estudyante sang Biblia ang pagtuon sa duha ka publikasyon, mahimo na niya masabat ang tanan nga pamangkot nga repasuhon sang mga gulang upod sa iya bilang paghanda para sa bawtismo. Kon amo, ayhan indi na kinahanglan nga magdumala sing isa ka pormal nga pagtuon upod sa iya sa bisan ano pa nga publikasyon, bisan pa nga ang nagadumala dapat padayon nga magpakita sing daku nga interes sa iya pag-uswag.​—⁠Tan-awa ang Enero 15, 1996, Lalantawan, pahina 14, 17.