Ang Sekular nga Edukasyon kag ang Inyo Espirituwal nga mga Tulumuron
1 Ang pagtigayon sing maayong sadsaran nga edukasyon sang bata pa kamo makahatag sing akademikong mga ikasarang nga kinahanglanon agod makabasa kag makasulat kamo sing maayo kag mahangpan ang heograpiya, maragtas, matematika, kag siensia. Sa proseso, matun-an ninyo kon paano makahunahuna sing maathag, mausisa ang mga katunayan, malubad ang mga problema, kag makapamensar sing mapuslanon nga mga ideya. Ini nga pagtuon mapuslanon sa inyo bug-os nga kabuhi. Paano ang inyo sekular nga edukasyon maangot sa inyo espirituwal nga mga tulumuron sa kabuhi kag makabulig sa inyo sa pagkuha sing “praktikal nga kaalam kag ikasarang sa paghunahuna”?—Hulu. 3:21, 22.
2 Mangin Mapuslanon sa Pag-alagad sa Dios: Samtang nagaeskwela kamo, magpamati sing maayo sa klase kag himua sing maayo ang inyo mga asaynment nga ginahimo sa balay. Kon matun-an gid ninyo ang maayo nga pagbasa kag ang mga pamatasan sa pagtuon, mas mahapos ninyo nga mausisa ang Pulong sang Dios kag mahuptan ang inyo kaugalingon nga mabakod sa espirituwal. (Binu. 17:11) Ang madamo nga ihibalo magabulig sa inyo nga makigbagay sa mga tawo nga may nanuhaytuhay nga gindak-an, interes, kag pagtuluuhan kon masugilanon ninyo sila sa ministeryo. Ang edukasyon nga inyo matigayon sa eskwelahan mangin mapuslanon samtang ginahimo ninyo ang inyo Cristianong mga responsabilidad sa organisasyon sang Dios.—Ipaanggid ang 2 Timoteo 2:21; 4:11.
3 Magtuon nga Suportahan ang Kaugalingon: Kon maukod kamo, matun-an man ninyo ang mga ikasarang nga kinahanglanon agod makapangabuhi kamo pagkatapos sang gradwasyon. (Ipaanggid ang 1 Timoteo 5:8.) Pilia sing maayo ang inyo mga subject. Sa baylo nga magkonsentrar sa patag nga limitado lamang ang higayon nga makatrabaho, binagbinaga ang pagtuon sing palangabuhian ukon ikasarang nga magabulig sa inyo nga makakita sing nagakaigo nga trabaho bisan diin. (Hulu. 22:29) Ini nga paghanas magabulig sa inyo nga masuportahan ang kaugalingon kon mamat-od kamo nga mag-alagad kon diin mas daku ang kinahanglanon.—Ipaanggid ang Binuhatan 18:1-4.
4 Ang pagkuha sing maayong sadsaran nga edukasyon samtang nagaeskwela makabulig sa inyo sa pagpasangkad sang inyo ministeryo. Mangabudlay sing lakas agod matigayon ang mga ikasarang nga kinahanglan agod masuportahan ang kaugalingon samtang nagauswag kamo sa inyo pag-alagad kay Jehova. Sa amo, ang inyo pag-eskwela magabulig sa inyo nga malab-ot ang inyo espirituwal nga mga tulumuron.