Ang Matuod nga Pagsimba Nagauswag sa Nasidlangan nga Europa
1 Ang unang-siglo nga mga Cristiano makugi nga mga manugbantala sing Ginharian. Nagkalipay sila sang ang mga kongregasyon “nagdugang sa kadamuon adlaw-adlaw.” (Binu. 16:5) Bangod sang ila masidla nga pagbantala, ang matuod nga pagsimba naglab-ot sa Asia, Aprika, kag Europa, nga nagresulta sa bugana nga pag-ani sing mga tumuluo.
2 Sa sining tion sang katapusan, ang matuod nga pagsimba padayon nga nagauswag ilabi na sa mga kadutaan sang Nasidlangan nga Europa. Sa mga kapungsuran diin ginadumilian kita anay sang gobierno tubtob sang maaga nga bahin sang katuigan 1990, nagaagom kita karon sing tumalagsahon nga mga pagdugang. Ginapakita sang 1999 Yearbook nga duha sini nga mga pungsod, ang Rusya kag Ukraine, nagreport ang tagsa sing kapin sa 100,000 ka manugbantala nga nagapakigbahin sa dayag nga ministeryo. Sa 15 ka teritoryo sang anay Unyon Sobyet, sugod sang 1991 kapin sa 220,000 ka tawo ang nagdedikar sang ila kaugalingon kay Jehova kag nabawtismuhan! Ining madasig nga pag-uswag nagkinahanglan sang pagpatindog sing madamong bag-ong Kingdom Hall kag Assembly Hall subong man sang pagpasangkad sa pila ka pasilidad sang sanga.
3 Ang isa ka bahin sang Society Kingdom Hall Fund ginagamit karon agod ipahulam sa mga kongregasyon sa mga kadutaan diin kinahanglanon kaayo ang dugang nga mga Kingdom Hall apang limitado lamang ang kuwarta kag may daku nga mga problema sa ekonomiya. Sa ulot sang Marso 1996 kag Oktubre 1998, ang Sosiedad nag-aprobar sing 359 ka Kingdom Hall loan request gikan sa mga sanga talatapan nga nagatatap sang 11 ka kadutaan sa Nasidlangan nga Europa. Ang gin-amot nga kuwarta ginagamit sa pagbakal sing lote kag materyales para sa pagpatindog sing bag-ong mga Kingdom Hall kag sa pagbulig sa mga kongregasyon sa pagpakay-o sa daan nga mga pasilidad. Ang mga retrato nga makita diri nagahatag sa aton sing ideya kon paano ang mga amot sa Society Kingdom Hall Fund sa Estados Unidos kag sa iban nga mga pungsod nakabulig sa aton mga kauturan sa Nasidlangan nga Europa.
4 Sang 1998, ang Bulgaria nakatigayon sing 12-porsiento nga pag-uswag, kag ang mga kauturan nalipay sang ang ila nahaunang Kingdom Hall gindedikar sang Abril sadto nga tuig. Ang Croatia nakatigayon sing 4-porsiento nga pag-uswag, kag sa karon ang mga kauturan didto nagapatindog sing madamo pa nga Kingdom Hall, sa pagpasangkad sa matuod nga pagsimba. Sa Hungary mga 80 ka Kingdom Hall ang ginagamit sang 144 ka kongregasyon. Nagakahulugan ini nga sa 235 ka kongregasyon sa sina nga pungsod, 61 porsiento ang may kaugalingon nga duog sa pagsimba. Sa Macedonia ang programa tuhoy sa pagpatindog sing mga Kingdom Hall nakahuman sing duha ka bag-ong tilipunan, kag madamo pa ang ginapatindog. Sang tig-ilinit sang 1999, ang doble nga Kingdom Hall nahuman sa kabisera nga siudad sang Skopje. Ini nga tilipunan may kapasidad nga magamit sang di-magkubos anom ka kongregasyon.
5 Sang nagligad nga tuig sa Rusya, sa promedyo, kapin sa 260 ka tawo ang nabawtismuhan kada semana! Nagasunod sang sulundan nga gingamit sa iban nga mga pungsod, ang sanga sang Rusya nag-organisar karon sing 12 ka Regional Building Committee sa kabug-usan sang ila malapad nga teritoryo, sa pagsakdag sa palaabuton nga mga proyekto sa pagpatindog sing mga Kingdom Hall. Sa naaminhan nga bahin sang St. Petersburg, ginapatindog karon ang nahaunang Assembly Hall sa sina nga pungsod, nga makapalingkod sa 1,600. Ang pasilidad magalakip man sa lima ka Kingdom Hall nga may 200 ka pulungkuan ang tagsa. Agod matatap ang espirituwal nga mga kinahanglanon sang aton mga kauturan kag madamong interesado sa Ukraine, 84 ka Kingdom Hall ang nahuman na kag 80 ang ginapatindog pa.
6 Wala bala nagapahalipay sa aton mga tagipusuon ini nga pag-uswag sa Nasidlangan nga Europa? Bisan diin man kita nagapuyo, ang pagsangkad sang matuod nga pagsimba nagapahanumdom sa aton nga ang Dios wala sing pinasulabi kag nga ang iya pagpailob magakahulugan sing kaluwasan para sa “dakung kadam-an.” (Bug. 7:9; 2 Ped. 3:9) Daw ano nga pribilehiyo para sa aton nga may diutay nga bahin sa pag-amot sa espirituwal nga pag-uswag sang iban, bisan sa mga didto sa malayo nga kadutaan! Ang Hulubaton 28:27 nagapasalig sa aton nga “sia nga nagahatag sa imol indi mawad-an.” Ang aton kahanda sa pagbulig sa mga galastuhon sa sining pagpatindog nagaresulta sa “pag-alangay” sang materyal nga mga butang, nagapaposible sa tanan nga mabatyagan ang kalipay bangod sang paghatag kag ang kasadya bangod sang nakita nga pag-uswag sang matuod nga pagsimba sa bug-os nga kalibutan.—2 Cor. 8:14, 15; Binu. 20:35.
[Retrato sa pahina 3]
Săcele, Romania
[Retrato sa pahina 3]
Maardu, Estonia
[Retrato sa pahina 3]
Sevnica, Slovenia
[Retrato sa pahina 3]
Tiszavasvári, Hungary
[Mga retrato sa pahina 4]
Jūrmala, Latvia
[Mga retrato sa pahina 4]
Tallinn, Estonia
[Retrato sa pahina 4, 5]
Taurage, Lithuania
[Retrato sa pahina 4, 5]
Belgrade, Yugoslavia
[Mga retrato sa pahina 5]
Prievidza, Slovakia
[Retrato sa pahina 5]
Mátészalka, Hungary
[Mga Retrato sa pahina 6]
Ruma, Yugoslavia
[Retrato sa pahina 6]
Vranov nad Topl’ou, Slovakia
[Mga Retrato sa pahina 6]
Tornakalns, Latvia