Pamangkot

◼ Handa bala kamo sa isa ka emerhensia?

Sa karon, “ang tion kag wala ginapaabot nga hitabo” masunson nagatuga sing emerhensia nga pagpabulong. (Manugw. 9:11) Agod makahanda kita sa sining mahimo nga hitabo, si Jehova naghatag sing bulig paagi sa iya organisasyon, apang ginapaabot niya nga himuon naton ang aton bahin. Yari sa ubos ang isa ka listahan agod buligan kamo.

• Dalha pirme ang Advance Medical Directive/Release card.

• Pat-ura nga dala sang inyo kabataan ang bag-o nga Identity Card.

• Repasuha ang suplemento sang Enero 1993 nga Ang Aton Ministeryo sa Ginharian, nagaensayo kon paano mangatarungan sa mga doktor may kaangtanan sa pagbulong sa inyo anak.

• Repasuha ang mga artikulo tuhoy sa mga bahin sang dugo kag sa mga alternatibo sa dugo. (Ginarekomendar: Ang Lalantawan, Oktubre 1, 1994, pahina 31; Hunyo 1, 1990, pahina 30-1; Marso 1, 1989, pahina 30-1; Awake!, Disiembre 8, 1994, pahina 23-7; Agosto 8, 1993, pahina 22-5; Nobiembre 22, 1991, pahina 10; kag mga suplemento sang Enero 1993 kag Pebrero 1991 nga Ang Aton Ministeryo sa Ginharian. Tagua ini sa isa ka folder agod makuha sa gilayon.)

• Mamat-od suno sa konsiensia kon magsugot kamo sa paggamit sing mga makina nga nagapasirkular sang dugo sa guwa sang lawas ukon kon magbaton kamo sing mga produkto nga may mga bahin sang dugo.

• Antes magkadto sa ospital, kon mahimo, pahibalua ang mga gulang agod masuportahan nila kamo kag mapakig-angutan ang Hospital Liaison Committee (HLC) kon kinahanglanon.

Athaga ang Inyo Pagpangindi sa Dugo: Ginapakita sang mga report nga ang iban nga mga kauturan nagahulat tubtob sa ulihi na nga tion nga pahibaluon ang nagabulong nga mga doktor nga indi nila luyag sing dugo. Indi ini makatarunganon sa mga doktor kag nagabutang ini sa inyo sa katalagman nga matayunan. Kon nahibaluan sang mga doktor ang inyo mga pagtuluuhan kag ang inyo mga luyag ginasuportahan sang ginpirmahan nga mga dokumento nga nagasambit sang inyo espesipiko nga mga luyag, nagabulig ini sa ila nga magtrabaho nga wala sing pagpalantang kag masunson nga nagahatag sa ila sing higayon nga makadesisyon kon ano ang himuon nga wala nagagamit sing dugo.

Sanglit ang emerhensia nga pagpabulong mahimo mahanabo bisan san-o nga tion, sa masami kon san-o nga wala gid ninyo ini ginapaabot, maghimo na karon sing mga tikang agod maamligan ang inyo kaugalingon kag ang inyo kabataan nga indi matayunan sing dugo.​—⁠Hulu. 16:​20; 22:⁠3.