Ano ang Isiling Ninyo sa Isa ka Muslim?

¹ Nakaagi na bala kamo nga makapanaksi sa isa ka Muslim? Kon amo, ayhan nahibaluan ninyo nga ang mga Muslim may hugot nga pagtuo sa Dios. Walay sapayan sina, diutay lamang ang ila nahibaluan tuhoy sa nagapakari nga Paraiso sa duta suno sa gintagna sang mga manalagna ni Jehova, kag luyag naton ipaambit ina nga paglaum sa ila. (1 Tim. 2:​3, 4) Ang masunod nga impormasyon magabulig sa inyo agod makapanaksi sing maayo.

² Ang mga Muslim nagapati sa Allah, ukon sa Dios, kag nagapati sila nga si Muḥammad propeta sang Dios. Ang ila balaan nga tulun-an amo ang Koran, kag ang ila relihion ginatawag nga Islam, nga nagakahulugan sing “pagpasakop.” Ang Koran nagasiling nga ang pagbutig kag ang pagsimba sa mga diosdios sala, nga ang Dios isa, kag nga indi sia bahin sang isa ka Trinidad. Subong man, nagatudlo ini sang pagkadi-mamalatyon sang kalag, sang kalayuhon nga impierno, kag sang langitnon nga paraiso. Ginabaton sang mga Muslim ang Biblia subong Pulong sang Dios apang nagapati sila nga gin-islan na ini, samtang ang Koran, nga yara gihapon sa iya orihinal nga lenguahe, nagapabilin nga putli.

³ Mangin Mainabyanon, Mataktikanhon, kag Mahantupon: Samtang nagapakigsugilanon sa isa ka Muslim, mangin mainabyanon kag mataktikanhon. (Hulu. 25:15) Dumduma nga ang pagtuluuhan sang mga Muslim natukod sing malig-on kag ang kalabanan sini natun-an paagi sa pagsaulo lamang. Gani, ang pagpangatarungan sa relihioso nga mga panudlo kag ang pagpamatuod sa ila kon ano ang kabubut-on sang Dios indi bahin sang ila espirituwal nga pagtubo. (Roma 12:2) Agod buligan ang mga Muslim, ang pailob kag paghangop kinahanglanon.​—⁠1 Cor. 9:​19-23.

⁴ Likawi ang paggamit sing mga ekspresyon nga sa hunahuna sang isa ka Muslim magaangot sa inyo sa Cristiandad. Athaga nga indi kamo bahin sang Katoliko ukon Protestante nga relihion, nga kamo tuhay. Ipatalupangod ang Biblia subong Libro sang Dios. Sanglit wala maluyagi sang mga Muslim ang termino nga “Anak sang Dios,” masunson nga labing maayo nga indi ini paggamiton ukon hambalan lamang ini nga butang tubtob may espirituwal na nga pag-uswag. Apang, mahimo kamo makahambal tuhoy kay Jesus, ginapatuhuyan sia subong isa ka propeta ukon mensahero. Likawi ang pagbais. Kon makita ninyo nga naakig sia, matinahuron nga maglakat na lang sa gilayon.

⁵ Labing maayo nga makighambal sa isa lamang ka tawo kag indi sa isa ka grupo. Sa masami, maayo nga ang mga babayi magpanaksi sa mga babayi, kag ang mga lalaki, sa mga lalaki. Maathag nga may mga eksepsion ini, apang ang maayo nga paghantop dapat gamiton. Subong man, madamong Muslim ang sensitibo sa ginakabig nila nga indi maugdang nga pamayo kag pamustura sang mga babayi. Ang utod nga mga babayi dapat mangin alisto sa sini.​—⁠1 Cor. 10:​31-33.

⁶ Mga Butang nga Mahambalan: Maghambal sing prangka tuhoy sa pagkadaku sang Dios kag sang iya gugma. Indi magpangalag-ag sa pagsiling nga ikaw isa ka matuod nga tumuluo, nga ang Dios isa lamang (indi isa ka Trinidad), kag ang pagsimba sa mga diosdios sala. Maghambal tuhoy sa kalautan sa kalibutan karon​—⁠mga inaway, sibil nga kinagubot, pagdumot sa rasa, kag pagkasalimpapaw nga makita gid sa tunga sang madamong relihioso nga tawo.

⁷ Ang brosyur nga The Guidance of God​—⁠Our Way to Paradise magahatag sa inyo sing dugang nga paghangop sa mga topiko nga sarang magamit agod masugdan ang pagpakigsugilanon sa mga Muslim. Gindesinyo ini sa pagganyat sa mga Muslim nga nagapuyo sa isa ka palibot diin hilway sila nga makatuon sang Biblia. May yara kami limitado nga suplay sa sanga talatapan kag madamo pa ang magaabot sa dili madugay.

⁸ Subong isa ka presentasyon, mahimo ka makasiling:

◼ “Nagapanikasog gid ako nga masugilanon ang mga Muslim. Nakabasa na ako tuhoy sa inyo relihion kag nagapati nga husto ako sa pagsiling nga ang mga Muslim nagatuo sa isa ka matuod nga Dios kag sa tanan nga propeta. [Pasabta sia.] Luyag ko ipakighambal sa imo ang isa anay ka tagna nga ang duta himuon nga paraiso. Mahimo ko bala mabasa sa imo ang ginsulat sang propeta? [Basaha ang Isaias 11:​6-9.] Ini nga tagna nagapahunahuna sa akon sang isa ka binalikwat gikan sa Koran nga mabasa sa sining brosyur.” Ipakita ang pahina 9 sang Guidance of God nga brosyur, kag basaha ang binalikwat sa madukot nga letra, nga nagapatuhoy sa pagpanubli sang mga matarong sa duta. Kon may interes, padayuna ang paghambalanay paagi sa pagpaathag sang parapo 7 tubtob 9 sa pihak nga pahina. Ibilin ang brosyur, kag maghimo sing kahimusan sa pagduaw liwat.

⁹ Kon nagaagda sa isa sa pagbinagbinag sang Guidance of God nga brosyur, labing maayo nga tawgon ini nga isa ka paghambalanay, indi isa ka pagtuon sa Biblia. Kon matapos na ninyo ang brosyur, ang estudyante dapat nga handa na sa pagtuon sa Ginapatuman nga brosyur ukon sa Ihibalo nga libro. Ang iban pa nga mga publikasyon nga gindesinyo ilabi na para sa mga Muslim amo ang tract nga How to Find the Road to Paradise kag ang polyeto nga The Time for True Submission to God.

¹⁰ Upod ining ihibalo sa Islamiko nga mga pagtuluuhan kag pagkasensitibo, mangin mahantupon kita sa aton pagpili sing literatura nga itanyag naton sa mga Muslim kag sa kon paano kita magpanaksi sa ila. Kabay nga padayon nga pakamaayuhon ni Jehova ang aton mga panikasog nga buligan ang tanan nga sahi sang mga tawo sa pagtawag sa iya ngalan kag maluwas.​—⁠Binu. 2:⁠21.