Tipigi
Ginagamit Mo Bala Ini nga mga Brosyur?
Ang Biblia—Ano ang Mensahe Sini?
Gindesinyo para sa mga diutay lang ang nahibaluan sa Biblia, ilabi na para sa indi Cristiano nga mga relihion
Kon paano itanyag: “Luyag namon mahibaluan ang imo opinyon parte sa ginasiling diri sa Kasulatan (ukon sining balaan nga libro). [Basaha ang Salmo 37:11 nga ginsambit sa seksion 11.] Ano sa banta mo ang mangin kahimtangan sang duta kon matuman na ini nga tagna? [Tuguti sia nga magsabat.] Isa lang ini ka halimbawa sang paglaum kag paumpaw nga mabaton gikan sa Biblia bisan ano man ang aton kultura kag pagtuluuhan.” Basaha ang parapo sa idalom sang tig-ulo sa pahina 3, kag itanyag ang brosyur.
Testingi ini: Kon may ginatun-an ka sa Ginatudlo Sang Biblia nga katapo sang indi Cristiano nga relihion, binagbinaga ninyo sing makadali ang isa ka seksion sini nga brosyur antes ukon pagkatapos sang inyo pagtuon agod mahatagan sia sing background parte sa Biblia.
Isa Ka Libro Para sa Tanan nga Tawo
Gindesinyo para sa mga edukado pero diutay lang ang nahibaluan sa Biblia
Kon paano itanyag: Basaha ang 2 Timoteo 3:16, 17, dayon magsiling: “Ugyon ka bala sa ginsiling diri nga ang Biblia gin-inspirar sang Dios, ukon isa lang ini ka maayo nga libro? [Tuguti sia nga magsabat.] Ang kada tawo may opinyon sa sini nga pamangkot, pero pila lang gid ang nag-usisa sing maayo sa Biblia. [Basaha ang eksperiensia sa idalom sang tig-ulo sa pahina 3.] Ining matahom nga brosyur nagasugid sang maayo nga mga rason kon ngaa dapat binagbinagon sang mga tawo ang ginaunod sang Biblia bisan ano man ang ila ginhalinan ukon pagtuluuhan.”
Testingi ini: Kon batunon sang tagbalay ang brosyur, magsiling: “Ang isa ka rason kon ngaa madamo nga tawo ang nagahunahuna nga indi importante ang Biblia amo ang sayop nga ginahimo kag ginatudlo sang relihion. Sa pagbalik ko, ipakita ko sa imo ang isa ka halimbawa sini.” Sa imo pagbalik, binagbinaga ang pila ka impormasyon sa pahina 4-5.
Mahimo Ikaw Mangin Abyan sang Dios!
Gindesinyo para sa mga diutay sing tinun-an ukon indi maayo magbasa
Kon paano itanyag: “Sa banta mo, posible ayhan nga mangin abyan kita sang Dios? [Tuguti sia nga magsabat. Dayon basaha ang Santiago 2:23.] Ini nga brosyur makabulig sa aton nga mangin abyan sang Dios, pareho kay Abraham.”
Testingi ini: Ipasundayag ang pagtuon sa Biblia sa una nga pagpakigsugilanon ukon sa pagbalik-duaw paagi sa pagbinagbinag sang bug-os ukon bahin sang leksion 1.
Isa ka Makaalayaw nga Kabuhi—Kon Paano Ini Maagom
Gindesinyo para sa mga indi relihioso
Kon paano itanyag: “Madamo nga tawo ang luyag gid mangin malipayon. Pero tanan kita nagaatubang sang mga problema. Kon may problema kita, nagapangayo kita sing laygay sa isa ka masaligan nga paryente ukon abyan. Ang iban nagakuha man sing laygay sa mga libro ukon sa Internet. Sa banta mo, sa diin gid kita makakita sing maayo nga laygay? [Tuguti sia nga magsabat.] Ang pila nakakita sing praktikal nga laygay sa Biblia. Ari ang isa ka halimbawa. [Ipakita sa tagbalay ang kapitulo 2, kag basaha ang isa sa ginsambit nga mga teksto.] Ini nga brosyur nagapaathag kon paano mangin malipayon ukon makaalayaw ang aton kabuhi.”
Testingi ini: Kon batunon sang tagbalay ang brosyur, magsiling: “May mga nagasiling nga indi sibu ang Biblia. Sa akon pagbalik, luyag ko ipakita sa imo ang isa ka halimbawa nga nagapakita nga ang Biblia sibu sa siensia.” Sa imo pagbalik, binagbinaga ang parapo 4 sa pahina 12.
The Origin of Life—Five Questions Worth Asking
Gindesinyo para sa mga pamatan-on nga Cristiano nga ginatudluan sang ebolusyon sa eskwelahan kag makabulig man kon nagapangatarungan sa mga ebolusyonista, agnostiko, kag ateista (Ini nga brosyur wala gindesinyo agod itanyag sa pagpamalaybalay.)
Kon paano gamiton kon nagapakighambal sa ebolusyonista ukon ateista: “Halos ang tanan nga libro sa siensia nagatudlo sang ebolusyon. Nagapati ka bala nga ang ebolusyon teoriya lang, ukon napamatud-an na ini nga kamatuoran? [Tuguti sia nga magsabat.] Indi bala nga dapat anay naton binagbinagon ang ginasiling sang magtimbang nga bahin para makahimo sing husto nga desisyon? Ini nga brosyur nagapresentar sang pila ka ebidensia nga nagkumbinsi sa madamo nga gintuga gid ang kabuhi.”
Testingi ini: Kon ara ka sa eskwelahan, ibutang ang brosyur sa ibabaw sang imo bangko kag tan-awa kon may klasmeyt ka nga mamangkot parte sa sini.
Why Should We Worship God in Love and Truth?
Gindesinyo para sa mga Hindu
Kon paano itanyag: “Ang bantog nga pangamuyo sa India nagasiling: ‘Halin sa kabutigan tuytuyi ako sa kamatuoran. Halin sa kadudulman tuytuyi ako sa kapawa.’ Sa banta mo, importante bala nga simbahon naton ang Dios sa gugma kag kamatuoran? [Tuguti sia nga magsabat.] Talupangda ang ginsiling ni Jesus parte sa sini.” Basaha ang Juan 4:24. Dayon basaha ang parapo 4 sa pahina 3 kag itanyag ang brosyur.
Testingi ini: Kon batunon sang tagbalay ang brosyur, magsiling: “Ang pila ka maalam nga Hindu nagasiling nga ang kamatuoran natago sa aton tagipusuon. Ang iban naman nagasiling nga makita ini sa sagrado nga kasulatan. Sa pagbalik ko, luyag ko binagbinagon ang pamangkot sa katapusan sang parapo 3 sa pahina 4: ‘Diin naton dapat pangitaon ang kamatuoran halin sa Dios?’”
The Pathway to Peace and Happiness
Gindesinyo para sa mga Budhista
Kon paano itanyag sa may edad na nga Budhista: “Mahimo nga pareho sa akon nabalaka ka man sa tuman kadamo nga malain nga impormasyon nga lapnag sa karon kag ang mangin epekto sini sa aton kabataan. Sa banta mo, ngaa madamo nga pamatan-on sa karon ang nagahimo sing imoralidad? [Tuguti sia nga magsabat.] Kabalo ka bala nga gintagna na ini sa isa ka libro nga ginsulat antes pa natukod ang relihion nga Cristiano, Hindu, kag Muslim? [Basaha ang 2 Timoteo 3:1-3.] Talupangda nga ini nga mga batasan nagalapnag sa karon bisan pa nagauswag ang ihibalo sang tawo. [Basaha ang bersikulo 7.] Ini nga publikasyon nakabulig sa akon nga mahangpan ang mga kamatuoran nga wala pa gid matun-an sang kalabanan. Luyag mo bala ini basahon?”
Testingi ini: Sa imo pagbalik, palambua ang iya interes sa Biblia. Dayon, ipakita ang mga pamangkot sa likod sang brosyur kag ang kupon para sa libro nga Ginatudlo Sang Biblia. Isiling nga may dala ka nga isa ka kopya kon luyag niya ini makita. Ipakita ang mga kaundan sang libro kag binagbinaga ang isa ukon duha ka parapo sang kapitulo nga iya pilion.
Our Problems—Who Will Help Us Solve Them?
Gindesinyo para sa mga Hindu
Kon paano itanyag: “Madamo sang nasugilanon namon ang nalugaw-an gid sa kalautan nga nakita nila sa kalibutan. Sa banta mo, dulaon ayhan sa ulihi sang Dios ang mga problema sa kalibutan? [Tuguti sia nga magsabat.] Ini nga tagna nagahatag sa aton sing paglaum. [Basaha ang Salmo 37:11.] Ang ginbasa ko bag-o lang, halin sa Biblia, ang libro nga masami nga ginahangop kag ginagamit sang indi husto. Mahimo makibot ka nga mahibaluan nga ang Biblia indi gali isa ka libro sang mga Amerikano; wala sini ginasakdag ang kolonyalismo ukon ang pagpasulabi sa rasa. Apang ini nga libro nagahatag sing paglaum nga sa ulihi dulaon sang Dios ang aton mga problema. Nagaunod man ini sang mga prinsipio nga makabulig sa aton nga maatubang ang mga problema sa karon. Ini nga brosyur nagahatag sing dugang pa nga impormasyon.”
Testingi ini: Sa imo pagbalik, palambua ang interes sang tagbalay sa Biblia. Dayon, ipakita sa iya ang mga piktyur sa pahina 4-5 sang Ginatudlo Sang Biblia nga libro. Basaha ang bisan isa lang sa ginsambit nga mga teksto dayon itanyag ang libro.
Will There Ever Be a World Without War?
Gindesinyo para sa mga Judiyo
Kon paano itanyag: “Sa bug-os nga maragtas, ang mga tawo nagaantos bangod sa inaway. Sa banta mo, ngaa nagapadayon gihapon ang inaway bisan pa nagasiling ang mga tawo nga luyag nila sing paghidait? [Tuguti sia nga magsabat.] Ang tagna ni Isaias nagahatag sa aton sing paglaum. [Basaha ang Isaias 2:4.] Apang may mga pamangkot gihapon nga nagautwas: San-o kag paano matuman ang tagna ni Isaias? Ngaa makasalig kita nga ang ginasiling sang Kasulatan matuman gid? Sabton sini nga brosyur ini nga mga pamangkot.”
Testingi ini: Kon batunon sang tagbalay ang brosyur, ipakita sa iya ang pahina 16-17 dayon magsiling: “Madamo ang nagadumdom sang malain nga mga hitabo pareho sang Holocaust dayon nagapamangkot, ‘Kon may Dios man gid, ngaa ginatugutan niya ang pag-antos?’ Puede naton binagbinagon ini sa akon pagbalik.”
The Guidance of God—Our Way to Paradise
Gindesinyo para sa mga Muslim nga nagaistar sa mga lugar nga hilway sila sa pagtuon sa Biblia
Kon paano itanyag: “Nakahibalo ako nga ang mga Muslim nagapati sa isa ka matuod nga Dios kag sa tanan nga manalagna. Husto bala? [Tuguti sia nga magsabat.] Luyag ko isugid sa imo ang isa ka tagna sang una nga nagasiling nga ang duta himuon nga isa ka paraiso. Puede ko bala basahon sa imo ina nga tagna? [Basaha ang Isaias 11:6-9.] Madamo ang nagapalibog kon paano himuon sang Dios ini nga mga pagbag-o sa duta. Ini nga brosyur nagasugid kon ano ang ginasiling sang mga manalagna tuhoy sini.”
Testingi ini: Kon batunon sang tagbalay ang brosyur, magsiling: “Ining tulun-an sang Dios nagapaathag nga sa ginsuguran, ang tawo nagaistar sa paraiso. Pagbalik ko, luyag ko sabton ang pamangkot nga, ‘Paano ginsikway sang tawo ang panuytoy sang Dios kag ginpahalin sa paraiso?’” Sa imo pagbalik, binagbinaga ang una nga yunit sa pahina 6.
Real Faith—Your Key to a Happy Life
Gindesinyo para sa mga Muslim nga nagaistar sa mga lugar nga hilway sila sa pagtuon sa Biblia
Kon paano itanyag: Ipakita ang piktyur sa pahina 16-17 dayon magsiling: “Tuhay gid ang kahimtangan diri kon ipaanggid sa makita naton sa kalibutan sa karon. Sa banta mo, maabot pa ayhan ang tion nga mangin kaangay sini ang kalibutan? [Tuguti sia nga magsabat.] Talupangda kon ano ang ginsaad sining tulun-an sang Dios. [Basaha ang isa sa ginsambit nga mga teksto sa imo Biblia.] Ini nga brosyur makabulig sa aton nga palambuon ang matuod nga pagtuo sa sini nga mga saad.”
Testingi ini: Sa hingapusan sang imo una nga pagpakigsugilanon, papilia ang tagbalay sing isa ka pamangkot sa likod sang brosyur. Dayon maghimo sing kahimusan nga magbalik agod binagbinagon ang sabat sa brosyur.
Lasting Peace and Happiness—How to Find Them
Gindesinyo para sa mga Chinese
Kon paano itanyag: “Madamo sing mga kabudlayan sa karon nga mahimo magdula sang aton kalipay. Sa banta mo, ano ang makabulig sa imo nga mangin malipayon bisan pa may mga problema? [Tuguti sia nga magsabat.] Madamo nga tawo ang nangin malipayon bangod sa pagsunod sa laygay sang Biblia. [Basaha ang Salmo 119:1, 2.] Nagasiling ang iban nga ang Biblia libro lang sang mga Amerikano. Pero talupangda ini. [Binagbinaga ang parapo 16 sa pahina 17.] Ini nga brosyur nagabinagbinag kon paano kita makatigayon sing matuod nga kalinong kag kalipay.”
Testingi ini: Kon batunon sang tagbalay ang brosyur, basaha ninyo ang una nga tatlo ka dinalan sang parapo 18 sa pahina 17, dayon magsiling: “Pagbalik ko, gusto ko ipakita sa imo kon ano ang aton paglaum sa palaabuton suno sa Biblia.” Pagbalik mo, binagbinaga ang isa sa mga punto sa parapo 6 sa pahina 30.