May Espiritu Ka Bala sang Pagsakripisyo sa Kaugalingon?

¹ Tungod sang apresasyon sa di-mahamkunon nga ginhimo ni Jesucristo sa katawhan, nagapahulag ini sa aton tanan nga gamiton ang aton mga ikasarang, kakugi, kag kusog sa nagasakripisyo-sa-kaugalingon nga paagi. Ang Kasulatan nagapakiluoy: “Ipresentar ninyo ang inyo mga lawas nga isa ka halad nga buhi, balaan, kalahamut-an sa Dios, isa ka sagrado nga pag-alagad.” (Roma 12:1) Ang pulupanag-on nga pag-usisa sa kaugalingon magabulig sa imo nga mahibaluan kon bala ginapakita mo gid ina nga sahi sang espiritu suno sa ginatugot sang imo kahimtangan.

² Sa Pagkuha sing Ihibalo sa Biblia: Nagtalana ka bala sing tion agod basahon kag tun-an ang Biblia sing regular? Ginasunod mo bala ina nga iskedyul? Batasan mo bala nga handaan sing maayo ang mga miting sa kongregasyon? Kon ikaw ulo sang pamilya, may regular ka bala nga pagtuon sa Biblia upod sa imo panimalay? Agod himuon ini, mahimo nga isakripisyo mo ang oras nga ginahinguyang mo sa pagtan-aw sing telebisyon ukon sa kompyuter ukon sa iban pa nga mga hilikuton. Apang, diutay gid lang ini nga sakripisyo, sa pagkahibalo nga ang oras nga ginahinguyang sa Pulong sang Dios magatuytoy sa imo sa kabuhi nga walay katapusan!​—⁠Juan 17:⁠3.

³ Sa Paghanas sa Imo mga Anak: Ang labing maayo nga tion sa pagsugod nga tun-an ang dalanon sang pagsakripisyo sa kaugalingon amo ang pagkabata. Tudlui ang inyo mga kabataan nga samtang may tion sa paghampang, may tion man sa pagpangabudlay kag sa teokratikong mga hilikuton. (Efe. 6:4) Hatagi sila sing pila ka mapuslanon nga hilikuton sa balay. Maghimo sing regular nga iskedyul sa pagpakigbahin sa ministeryo upod sa ila. Pabakura ang imo instruksion paagi sa imo mismo maayo nga halimbawa.

⁴ Sa mga Hilikuton sa Kongregasyon: Ang kongregasyon nagauswag kon ang tanan nga yari diri nagasakripisyo sing kinabubut-on agod mahimo ang mga butang sa kaayuhan sang tanan. (Heb. 13:16) Mahimo ka bala makahinguyang sing dugang pa nga tion sa hilikuton nga pagbantala sing Ginharian kag paghimo sing disipulo? Makaboluntaryo ka bala sa pagbulig sa mga masakiton ukon sa mga tigulang, ayhan sa pagsugat kag sa pagdul-ong sa ila sa mga miting?

⁵ Antes himuon ang pinakadaku nga sakripisyo sa iya tawhanon nga kabuhi, ginlaygayan ni Jesus ang iya mga disipulo nga ituon ang ila mga mata sa mga intereses sang Ginharian, sa amo nagahimo sang tanan pa nga butang sa kabuhi nga segundaryo lamang. (Mat. 6:33) Ang pagtigayon sini nga espiritu sang pagsakripisyo-sa-kaugalingon magapahalipay sa aton sing labi pa samtang padayon naton nga ginaalagad si Jehova sing masinadyahon.