Regular Ka Bala nga Manugbantala sang Ginharian?
1 Nalipay kita tanan sang natapos sang sanga sang Pilipinas ang nagligad nga tuig sa pag-alagad nga may kataason nga 132,496 ka manugbantala sang Agosto 1999. Apang ang promedyo nga kadamuon sang manugbantala sina nga tuig 128,106. Maathag gid nga nabudlayan ang pila sa aton nga mga manugbantala nga mangin regular nga mga manugbantala sang Ginharian. Sa katunayan, ginapakita sang mga analysis report halin sa mga kongregasyon nga kapin sa 19,000 sang aktibo nga manugbantala ang wala magreport nga nakigbahin sa ministeryo kada bulan. Nagapati kami nga ang masunod nga pagpalig-on makabulig agod malubad ang kahimtangan.
2 Apresyaha ang Pribilehiyo: Dapat gid naton apresyahon ang aton pribilehiyo nga ipaambit ang maayong balita sang Ginharian sa iban. Ini nga hilikuton nagapahalipay sang tagipusuon ni Jehova kag nagabulig sa mga bunayag sing tagipusuon nga matun-an ang dalan padulong sa kabuhi. (Hulu. 27:11; 1 Tim. 4:16) Ang pagpanaksi sing regular nagapabakod sang aton eksperiensia sa ministeryo kag nagaresulta sa balatyagon nga may kalipay kag may hinimuan.
3 Ireport ang Hilikuton: Ang iban nga nagapakigbahin sa pag-alagad sa latagon wala nagareport sang ila hinimuan sa husto nga tion. Indi gid kita dapat magbatyag nga ang aton panikasog indi takus ireport. (Ipaanggid ang Marcos 12:41-44.) Dapat gid naton ireport ang aton ginhimo! Ang pagtigayon sing organisado nga sistema sa balay, subong sang paggamit sing kalendaryo, sa pagrekord sang oras nga ginhinguyang sa ministeryo mangin isa ka dalayon nga pahanumdom sa paghimo sing isa ka sibu nga report sa gilayon pagkatapos sang tagsa ka bulan.
4 Ihatag ang Kinahanglanon nga Bulig: Ang lokal nga mga kahimusan agod buligan ang mga nagakinahanglan sing bulig nga mangin regular sa pagpakigbahin sa ministeryo dapat pauswagon. Ang sekretaryo sang kongregasyon kag ang mga konduktor sang pagtinuon sa libro dapat maghimo sing kahimusan agod makabulig ang eksperiensiado nga mga manugbantala. Kon may mga anak ka ukon iban pa nga mga estudyante sang Biblia nga indi bawtismado nga mga manugbantala, hanasa sila sa pagreport sang ila hilikuton kada bulan.
5 Dumduma ang sugilanon, “Mapinasalamaton sa Bug-os nga Kabuhi Sang Pag-alagad kay Jehova,” sa Oktubre 1, 1997, Lalantawan. Si Sister Ottilie Mydland sang Norway nangin regular nga manugbantala sing maayong balita antes sia ginbawtismuhan sang 1921. Kapituan kag anom ka tuig sang ulihi, sa edad nga 99 anyos, sia nagsiling: “Nalipay ako nga posible gihapon para sa akon nga mangin regular nga manugbantala.” Daw ano ka dalayawon nga panimuot agod ilugon sang tanan nga alagad ni Jehova!