Bag-ong Programa sa Pinasahi nga Adlaw nga Asambleya
Ang tema sang programa sang pinasahi nga adlaw nga asambleya sugod sa Pebrero 2001 amo ang “Mangin Hamtong sa Ikasarang sa Paghangop.” (1 Cor. 14:20) Ngaa mapuslanon gid para sa aton nga magtambong? Nagapuyo kita sa kalibutan nga puno sing kalainan. Agod mabatuan ini, dapat naton palambuon ang aton ikasarang sa espirituwal nga paghangop agod madaug naton ang malain paagi sa maayo. Amo sina ang mabulig sa aton sang programa sa pinasahi nga adlaw nga asambleya.
Sa nagabukas nga sesyon, ang manugtatap sa sirkito magabinagbinag sang “Mga Bulig Agod Mangin Hamtong sa Paghangop sa Biblia.” Ipakita niya sa aton kon paano mangin malig-on sa Cristianong pagtuo. Ipatalupangod sang dinapit nga humalambal kon paano ang aktuwal nga pagsunod, ukon pag-aplikar, sa mga prinsipio sang Biblia kinahanglanon gid sa pagpalambo sang maalamon nga paghantop, samtang nagapamulongpulong sia sa tema nga “Amligi ang Espirituwalidad Paagi sa Paghanas Sang Imo Ikasarang sa Paghantop.”
Dapat man palambuon sang mga pamatan-on ang ikasarang sa paghangop. Binagbinagon ini sa mga bahin, “Kon Ngaa Mangin mga Lapsag sa Kalainan” kag “Ang mga Pamatan-on nga Nagatigayon Sing Paghangop Karon.” Pamatii ang mga pamatan-on nga nagasaysay kon ano ang ila ginahimo sa pagpabakod sang ila kaugalingon sa espirituwal agod makontrol nila ang bisan ano man nga pagkamausisaon tuhoy sa malain nga mga ginahimo sang kalibutan kag malikawan ang problema.
Paano kita makasapo sing labi gid nga kalipay sa kabuhi? Ipaathag ini sang dinapit nga humalambal sa katapusan nga pamulongpulong nga “Manginpulos Paagi sa Pag-aplikar sa mga Prinsipio Sang Biblia Sing Mahangpunon.” Magahatag sia sing mga halimbawa agod ipakita nga ang pagsunod sa Pulong sang Dios nagabulig sa aton sa paglubad sang mga problema, sa pagdesisyon, kag sa pagpanginpulos gid sa ginatudlo ni Jehova sa aton.
Yadtong luyag magsimbulo sang ila dedikasyon sa Dios paagi sa pagpabawtismo sa tubig sa asambleya dapat magpahibalo sa gilayon sa nagadumala nga manugtatap. Markahi ang inyo kalendaryo sa gilayon nga ang petsa sang pinasahi nga adlaw nga asambleya ginpahibalo, kag maghimo sing pat-od nga mga plano agod makabenepisyo gikan sa sining bugana nga programa. Tambungi ang tanan nga bahin sang pinasahi nga adlaw nga asambleya! Magapabakod ini sa imo agod mabatas ining malaut nga sistema kag magpabilin nga matutom kay Jehova.