Bag-ong Programa sang Pinasahi nga Adlaw nga Asambleya
Ang tema sa programa sang pinasahi nga adlaw nga asambleya para sa bag-ong tuig nga pag-alagad may mabakod nga sadsaran sa Kasulatan: “Magpasakop Kamo sa Dios—Pamatuki Ninyo ang Yawa.” (Sant. 4:7) Maayo ini nga laygay para sa sining mabudlay nga mga tion! Bangod sang pagsunod naton sa mga sugo sang Dios, direkta nga ginapamatukan naton si Satanas. Tudluan kita sang programa kon paano magtindog sing malig-on batok sa nagaguba-pagtuo kag malauton nga mga padugi sang Yawa. Ano ang pila sa espirituwal nga mga bahandi nga matigayon naton sa sining asambleya?
Ipakita sang manugtatap sa sirkito kon paano ang “Pagpadayag Sing Diosnon nga Pagpasakop Subong mga Katapo Sang Pamilya” magapabakod sa mga pamilya nga mabatuan ang mga pag-ipit sang kalibutan. Ang nahauna nga pamulongpulong sang dinapit nga humalambal sa sini nga adlaw, “Ang Kahulugan Sang Pagpamatok sa Yawa,” magapaathag kon ngaa kag kon paano dapat kita magpanghikot sing malig-on agod batuan ang mga tulumuron ni Satanas nga gub-on ang aton espirituwalidad. Ang duha ka bahin ilabi na nga gindesinyo para sa mga pamatan-on, nga dapat man mangin alisto sa mga padugi sang Yawa. Madamong Cristiano nga mga may edad na karon ang wala magpasulay sa mga kailigbon sang kalibutan sang bata pa sila. Malipay kita sa pagpamati sa pila sang ila personal nga mga eksperiensia.
Ang tanan nga katapo sang tawhanon nga katilingban dapat magpasakop sa awtoridad. Sa amo, ang katapusan nga pamulongpulong sang dinapit nga humalambal nagapatalupangod sang apat ka bahin diin dapat kita magpakita sing diosnon nga pagpasakop: (1) sa mga gobierno, (2) sa kongregasyon, (3) sa sekular nga mga palamugnan, kag (4) sa pamilya. Daw ano ka mapuslanon nga programa!
Ang mga luyag magpabawtismo sa sining pinasahi nga adlaw nga asambleya dapat magpahibalo sa gilayon sa nagadumala nga manugtatap. Dapat naton tanan tandaan ang petsa sa aton kalendaryo kag magplano nga tambungan ang bug-os nga programa sang asambleya. Ang mga pagpakamaayo nga mabaton naton mangin walay katapusan samtang nagapasakop kita kay Jehova sing dayon.